ಈ ವಿಷಯದ ಕುರಿತಾದ ಸಂಪೂರ್ಣ ಮಾಹಿತಿ ಇಲ್ಲಿದೆ.

ಇದು ಹೇಗೆ ತಯಾರಾಗುತ್ತದೆ?

ಹಂತ 1: ರೈತರಿಂದ ಅಥವಾ ಅಕ್ಕಿ ಗಿರಣಿಗಳಿಂದ ಭತ್ತದ ಹೊಟ್ಟನ್ನು ಸಂಗ್ರಹಿಸಲಾಗುತ್ತದೆ. ಇದನ್ನು ನೇರವಾಗಿ ಬಳಸಬಹುದು ಅಥವಾ ನಿಯಂತ್ರಿತ ವಾತಾವರಣದಲ್ಲಿ ಸುಟ್ಟು "ಭತ್ತದ ಹೊಟ್ಟಿನ ಬೂದಿ'ಯನ್ನಾಗಿ ಪರಿವರ್ತಿಸಲಾಗುತ್ತದೆ.

ಹಂತ 2: ಈ ಹೊಟ್ಟು ಅಥವಾ ಬೂದಿಯಲ್ಲಿ "ಸಿಲಿಕಾ'(Silica) ಅಂಶ ಹೆಚ್ಚಿನ ಪ್ರಮಾಣದಲ್ಲಿರುತ್ತದೆ. ಇದನ್ನು ಜೇಡಿಮಣ್ಣು , ಸಿಮೆಂಟ್‌, ಅಥವಾ ಫ್ಲೆ„ ಆಶ್‌ ಜತೆಗೆ ಸೂಕ್ತ ಅನುಪಾತದಲ್ಲಿ ಬೆರೆಸಲಾಗುತ್ತದೆ.

ಹಂತ 3: ತಯಾರಿಸಿದ ಮಿಶ್ರಣವನ್ನು ಇಟ್ಟಿಗೆಯ ಆಕಾರದ ಅಚ್ಚುಗಳಿಗೆ ಹಾಕಿ ಹೈಡ್ರಾಲಿಕ್‌ ಯಂತ್ರಗಳ ಮೂಲಕ ಅತಿಯಾದ ಒತ್ತಡದಲ್ಲಿ ಸಂಕುಚಿತಗೊಳಿಸಲಾಗುತ್ತದೆ.

ಹಂತ 4: ಇವುಗಳನ್ನು ಸೂರ್ಯನ ಬಿಸಿಲಿನಲ್ಲಿ ಒಣಗಿಸಲಾಗುತ್ತದೆ.

ಇಟ್ಟಿಗೆಯನ್ನು ಭಟ್ಟಿಯಲ್ಲಿ ಬೇಯಿಸುವಾಗ, ಹೊಟ್ಟಿನಲ್ಲಿರುವ ಇಂಗಾಲವೇ ಇಂಧನವಾಗಿ ಉರಿದು ಇಟ್ಟಿಗೆಗೆ ಹೆಚ್ಚಿನ ಗಟ್ಟಿತನವನ್ನು ನೀಡುತ್ತದೆ.

ವಿವಿಧ ದೇಶಗಳಲ್ಲಿ ಬಳಕೆ

ಈ ಕ್ರಾಂತಿಕಾರಿ ತಂತ್ರಜ್ಞಾನವು ಅಕ್ಕಿಯನ್ನು ಅತೀ ಹೆಚ್ಚು ಉತ್ಪಾದಿಸುವ ಏಷ್ಯನ್‌ ದೇಶಗಳಲ್ಲಿ ಹೆಚ್ಚು ಜನಪ್ರಿಯವಾಗುತ್ತಿದೆ. ಭಾರತ, ಚೀನ, ವಿಯೆಟ್ನಾಂ, ಫಿಲಿಪ್, ಮತ್ತು ಇಂಡೋನೇಷ್ಯಾ ದೇಶಗಳಲ್ಲಿ ಭತ್ತದ ಹೊಟ್ಟನ್ನು ಬಳಸಿದ ಇಟ್ಟಿಗೆಗಳನ್ನು ವ್ಯಾಪಕವಾಗಿ ಬಳಸಲಾಗುತ್ತಿದೆ. ಜರ್ಮನಿ, ಅಮೆರಿಕ ಮತ್ತು ಬ್ರಿಟನ್‌ನಂತಹ ಅಭಿವೃದ್ಧಿ ಹೊಂದಿದ ದೇಶಗಳಲ್ಲಿ "ಗ್ರೀನ್‌ ಬಿಲ್ಡಿಂಗ್‌' ನಿಯಮಗಳ ಅಡಿಯಲ್ಲಿ ಈ ಇಕೋ-ಬ್ರಿಕ್ಸ್ ಗಳಿಗೆ ಬೇಡಿಕೆ ಹೆಚ್ಚಿದೆ. ಆಫ್ರಿಕಾದ ಹಲವು ರಾಷ್ಟ್ರಗಳೂ ಈ ಕಡಿಮೆ-ವೆಚ್ಚದ ತಂತ್ರಜ್ಞಾನವನ್ನು ಅಳವಡಿಸಿಕೊಳ್ಳುತ್ತಿವೆ.

ಬೆಲೆಯ ವಿವರ

ಸಾಮಾನ್ಯ ಮಣ್ಣಿನ ಇಟ್ಟಿಗೆಗೆ ಹೋಲಿಸಿದರೆ ಇದು ಆರ್ಥಿಕವಾಗಿ ಹೆಚ್ಚು ಲಾಭದಾಯಕವಾಗಿದೆ. ಭಾರತದ ಮಾರುಕಟ್ಟೆಯಲ್ಲಿ ಒಂದು ಸಾಮಾನ್ಯ ಮಣ್ಣಿನ ಇಟ್ಟಿಗೆಯ ಬೆಲೆ 6 ರೂ. ನಿಂದ 10 ರೂ. ಗಳಷ್ಟಿರುತ್ತದೆ. ಆದರೆ ಭತ್ತದ ಹೊಟ್ಟಿನ ಬಳಕೆಯಿಂದ ತಯಾರಾದ ಇಟ್ಟಿಗೆಯ ಉತ್ಪಾದನ ವೆಚ್ಚ ಕೇವಲ 4 ರೂ. ನಿಂದ 5 ರೂ. ಗಳ ಆಸುಪಾಸಿನಲ್ಲಿರುತ್ತದೆ. ಕಚ್ಚಾವಸ್ತು ಉಚಿತವಾದ

ಕೃಷಿ ತ್ಯಾಜ್ಯವಾಗಿರುವುದರಿಂದ ಉತ್ಪಾದನ ವೆಚ್ಚದಲ್ಲಿ ಸುಮಾರು ಶೇ. 15 ರಿಂದ 25 ರಷ್ಟು ಉಳಿತಾಯವಾಗುತ್ತದೆ. ಇವುಗಳ ಆಕಾರ ನಿಖರವಾಗಿರುವುದರಿಂದ ಗೋಡೆ ಕಟ್ಟಲು ಬೇಕಾಗುವ ಸಿಮೆಂಟ್‌ ಮತ್ತು ಮರಳಿನ ಬಳಕೆಯಲ್ಲೂ ಶೇ. 10 ರಷ್ಟು ಹಣ ಉಳಿಯುತ್ತದೆ.

ಭಾರತಕ್ಕಿದೆ ಅಧಿಕ ಲಾಭ!

ಭಾರತವು ವಿಶ್ವದ ಎರಡನೇ ಅತೀ ದೊಡ್ಡ ಅಕ್ಕಿ ಉತ್ಪಾದಕ ರಾಷ್ಟ್ರವಾ ಗಿದೆ. ಚಳಿಗಾಲದಲ್ಲಿ ದಿಲ್ಲಿ, ಪಂಜಾಬ್‌ ಮತ್ತು ಹರಿಯಾಣಗಳಲ್ಲಿ ಕೃಷಿ ತ್ಯಾಜ್ಯವನ್ನು ಸುಡುವುದರಿಂದ ಉಂಟಾಗುವ ವಾಯುಮಾಲಿನ್ಯ ದೇಶದ ಅತೀ ದೊಡ್ಡ ಸಮಸ್ಯೆಯಾಗಿದೆ. ಈ ನಿಟ್ಟಿನಲ್ಲಿ, ಭತ್ತದ ಹೊಟ್ಟನ್ನು ಇಟ್ಟಿಗೆ ತಯಾರಿಕೆಗೆ ಬಳಸುವುದು ಭಾರತಕ್ಕೆ "ಒಂದೇ ಕಲ್ಲಿಗೆ ಎರಡು ಹಕ್ಕಿ' ಹೊಡೆದಂತಾಗುತ್ತದೆ. ಇದು ಕೇವಲ ತ್ಯಾಜ್ಯ ವಿಲೇವಾರಿ ಹಾಗೂ ವಾಯುಮಾಲಿನ್ಯದ ಸಮಸ್ಯೆಗೆ ಮಾತ್ರ ಪರಿಹಾರವಲ್ಲ, ಬದಲಿಗೆ ತ್ಯಾಜ್ಯವನ್ನು ಮಾರಿ ರೈತರು ಹೆಚ್ಚುವರಿ ಆದಾಯ ಗಳಿಸಲೂ ದಾರಿಯಾಗುತ್ತದೆ. ಭಾರತ ಸರಕಾರದ ಮಹತ್ವಾಕಾಂಕ್ಷಿ "ಪ್ರಧಾನ ಮಂತ್ರಿ ಆವಾಸ್‌ ಯೋಜನೆ' (ಪಿಎಂಎವೈ) ಅಡಿಯಲ್ಲಿ ನಿರ್ಮಾಣವಾಗುವ ಮನೆಗಳಿಗೆ ಇಂತಹ ಅಗ್ಗದ ಹಾಗೂ ಸುಸ್ಥಿರ ಇಟ್ಟಿಗೆಗಳನ್ನು ಬಳಸಿದರೆ "ಸ್ವಚ್ಛ ಭಾರತ' ಹಾಗೂ "ಹಸುರು ಭಾರತ'ದ ಕನಸುಗಳು‌ ವೇಗ ಪಡೆಯಬಹುದು.

ಸಾಮಾನ್ಯ ಇಟ್ಟಿಗೆಗಳಿಗಿಂತ ವಿಭಿನ್ನ ಈ ಇಟ್ಟಿಗೆ!

ಹಗುರ ತೂಕ ಮತ್ತು ಶಕ್ತಿ: ಸಾಮಾನ್ಯ ಕೆಂಪು ಇಟ್ಟಿಗೆಗಳಿಗಿಂತ ಇವು ಶೇಕಡಾ 20-30% ರಷ್ಟು ಹಗುರವಾಗಿರುತ್ತವೆ. ಇದರಿಂದ ಇಡೀ ಕಟ್ಟಡದ ತೂಕ ಕಡಿಮೆಯಾಗಿ, ಭೂಕಂಪನವನ್ನು ತಡೆಯುವ ಸಾಮರ್ಥ್ಯ ಹೆಚ್ಚುತ್ತದೆ.

ಉತ್ತಮ ಉಷ್ಣ ನಿರೋಧಕತೆ

(Thermal Insulation): ಭತ್ತದ ಹೊಟ್ಟಿನ ಇಟ್ಟಿಗೆಗಳು ಶಾಖವನ್ನು ತಡೆಯುವ ಗುಣ ಹೊಂದಿವೆ. ಇದರಿಂದಾಗಿ ಬೇಸಿಗೆಯಲ್ಲಿ ಮನೆಯ ಒಳಾಂಗಣ ತಂಪಾಗಿರುತ್ತದೆ ಹಾಗೂ ಹವಾನಿಯಂತ್ರಕಗಳ ವಿದ್ಯುತ್‌ ಬಳಕೆ ಗಣನೀಯವಾಗಿ ಕಡಿಮೆಯಾಗುತ್ತದೆ. ಪರಿಸರ ಸಂರಕ್ಷಣೆ: ಸಾಮಾನ್ಯ ಇಟ್ಟಿಗೆಗಳನ್ನು ತಯಾರಿಸಲು ಅಪಾರ ಪ್ರಮಾಣದ ಫಲವತ್ತಾದ ಮೇಲ್ಮಣ್ಣನ್ನು ಅಗೆಯಬೇಕು. ಕೃಷಿ ತ್ಯಾಜ್ಯ ಬಳಸುವುದರಿಂದ ಮಣ್ಣಿನ ಸವೆತ ತಪ್ಪುತ್ತದೆ ಮತ್ತು ಕಾರ್ಬನ್‌ ಹೊರಸೂಸುವಿಕೆ ಕಡಿಮೆಯಾಗುತ್ತದೆ. ನೀರು ಹೀರುವಿಕೆ: ವೈಜ್ಞಾನಿಕವಾಗಿ ತಯಾರಾದ ಈ ಇಟ್ಟಿಗೆಗಳು ಕಡಿಮೆ ನೀರನ್ನು ಹೀರಿಕೊಳ್ಳುತ್ತವೆ. ಹೀಗಾಗಿ ಮಳೆಗಾಲದಲ್ಲಿ ಗೋಡೆಗಳಲ್ಲಿ ತೇವಾಂಶ ಉಂಟಾಗುವುದಿಲ್ಲ

* ಅವನೀಶ್‌ ಭಟ್‌, ಸವಣೂರು