ಮೊಟ್ಟೆಯ ಹಳದಿ ಲೋಳೆಯಲ್ಲಿ (Yolk) ಸುಮಾರು 180 ಮಿಲಿ ಗ್ರಾಂ ಕೊಲೆಸ್ಟ್ರಾಲ್ ಇರುವುದರಿಂದ ಇದನ್ನು ದೀರ್ಘಕಾಲದವರೆಗೆ ಸಂಶಯದಿಂದ ನೋಡಲಾಗುತ್ತಿತ್ತು. ಆದರೆ, ಇತ್ತೀಚಿನ ವಿಜ್ಞಾನದ ಪ್ರಕಾರ, ಸಮತೋಲಿತ ಆಹಾರ ಕ್ರಮದಲ್ಲಿ ಮೊಟ್ಟೆ ಅತ್ಯಂತ ಸುರಕ್ಷಿತ ಮತ್ತು ಪೌಷ್ಟಿಕಾಂಶಯುಕ್ತ ಆಹಾರವಾಗಿದೆ. ಪ್ರತಿದಿನ ಮೊಟ್ಟೆ ಸೇವಿಸುವುದರಿಂದ ದೇಹದ ಮೇಲಾಗುವ ಪರಿಣಾಮಗಳ ವಿವರ ಇಲ್ಲಿದೆ:

ಮೊಟ್ಟೆಯಲ್ಲಿರುವ ಪೋಷಕಾಂಶಗಳ ಭಂಡಾರ:

ಒಂದು ಮೊಟ್ಟೆ ಕೇವಲ ಉಪಹಾರದ ಪ್ರೊಟೀನ್ ಮಾತ್ರವಲ್ಲ, ಅದು ಇಡೀ ಜೀವಕೋಶಕ್ಕೆ ಬೇಕಾದ ಪೋಷಕಾಂಶಗಳನ್ನು ಒಳಗೊಂಡಿದೆ. ಇದರಲ್ಲಿ ವಿಟಮಿನ್ ಎ, ಡಿ, ಇ, ಬಿ12, ಫೋಲೇಟ್, ರಿಬೋಫ್ಲಾವಿನ್ ಮತ್ತು ಖನಿಜಾಂಶಗಳಾದ ಸೆಲೆನಿಯಮ್ ಹಾಗೂ ಜಿಂಕ್ ಸಮೃದ್ಧವಾಗಿವೆ. ಹಾರ್ವರ್ಡ್ ಹೆಲ್ತ್ ತಜ್ಞರ ಪ್ರಕಾರ, ಆರೋಗ್ಯವಂತ ವ್ಯಕ್ತಿ ದಿನಕ್ಕೆ 1 ಮೊಟ್ಟೆ ಸೇವಿಸುವುದರಿಂದ ಹೃದಯಾಘಾತ, ಪಾರ್ಶ್ವವಾಯು (Stroke) ಅಥವಾ ಯಾವುದೇ ಹೃದಯ ಸಂಬಂಧಿ ಕಾಯಿಲೆಗಳ ಅಪಾಯ ಕಡಿಮೆ ಇರುತ್ತದೆ.

ಪ್ರತಿದಿನ ಮೊಟ್ಟೆ ತಿನ್ನುವುದರಿಂದ ಆಗುವ 5 ಪ್ರಮುಖ ಪ್ರಯೋಜನಗಳು:

1. ಸ್ನಾಯುಗಳ ಬಲವರ್ಧನೆ ಮತ್ತು ದೀರ್ಘಕಾಲದ ತೃಪ್ತಿ:

ಮೊಟ್ಟೆಯಲ್ಲಿರುವ ಉನ್ನತ ಪ್ರಮಾಣದ ಪ್ರೊಟೀನ್ ಅಂಶ ಸ್ನಾಯುಗಳ ಮರುನಿರ್ಮಾಣಕ್ಕೆ ಸಹಾಯ ಮಾಡುತ್ತದೆ. ಇದು ಹೊಟ್ಟೆಯನ್ನು ದೀರ್ಘಕಾಲದವರೆಗೆ ತುಂಬಿರುವಂತೆ ನೋಡಿಕೊಳ್ಳುವುದರಿಂದ, ರಕ್ತದಲ್ಲಿನ ಸಕ್ಕರೆ ಮಟ್ಟ ನಿಯಂತ್ರಣದಲ್ಲಿಡುತ್ತದೆ ಮತ್ತು ದಿನವಿಡೀ ದೇಹಕ್ಕೆ ಸ್ಥಿರವಾದ ಶಕ್ತಿಯನ್ನು ನೀಡುತ್ತದೆ.

2. ಮೆದುಳಿನ ಕಾರ್ಯಕ್ಷಮತೆ ಹೆಚ್ಚಳ (Brain Health):

ನಮ್ಮ ದೇಹಕ್ಕೆ ಅತ್ಯಗತ್ಯವಾಗಿ ಬೇಕಾದ 'ಕೋಲಿನ್' (Choline) ಎಂಬ ಪೋಷಕಾಂಶ ಮೊಟ್ಟೆಯಲ್ಲಿ ಹೇರಳವಾಗಿದೆ. ಇದು ನೆನಪಿನ ಶಕ್ತಿ, ಮಾನಸಿಕ ನೆಮ್ಮದಿ ಮತ್ತು ದೇಹದಲ್ಲಿನ ಕೊಬ್ಬನ್ನು ಕರಗಿಸುವ ಕ್ರಿಯೆಗೆ ಸಹಾಯ ಮಾಡುತ್ತದೆ. ಒಂದು ಮೊಟ್ಟೆ ನಮ್ಮ ದಿನದ ಅಗತ್ಯದ ಕಾಲು ಭಾಗದಷ್ಟು ಕೋಲಿನ್ ಒದಗಿಸುತ್ತದೆ.

3. ಕಣ್ಣಿನ ದೃಷ್ಟಿ ರಕ್ಷಣೆ (Vision Health):

ಮೊಟ್ಟೆಯ ಹಳದಿ ಲೋಳೆಯಲ್ಲಿ 'ಲ್ಯೂಟಿನ್' (Lutein) ಮತ್ತು 'ಝೀಸಾಂಥಿನ್' (Zeaxanthin) ಎಂಬ ಶಕ್ತಿಯುತ ಆಂಟಿಆಕ್ಸಿಡೆಂಟ್‌ಗಳಿವೆ. ಇವು ಇಂದಿನ ಆಧುನಿಕ ಡಿಜಿಟಲ್ ಪರದೆಗಳಿಂದ ಬರುವ ಹಾನಿಕಾರಕ ಬೆಳಕಿನಿಂದ ಕಣ್ಣಿನ ರೆಟಿನಾವನ್ನು ರಕ್ಷಿಸುತ್ತವೆ.

4. ಮೂಳೆಗಳ ಆರೋಗ್ಯ ಮತ್ತು ವಯಸ್ಸಾದವರಿಗೆ ಪೋಷಣೆ:

ಮೊಟ್ಟೆಯಲ್ಲಿ ಸ್ವಾಭಾವಿಕವಾಗಿಯೇ ವಿಟಮಿನ್ ಡಿ ಇರುತ್ತದೆ. ಇದು ದೇಹ ಕ್ಯಾಲ್ಸಿಯಂ ಅನ್ನು ಸುಲಭವಾಗಿ ಹೀರಿಕೊಳ್ಳಲು ನೆರವಾಗುತ್ತದೆ. ವಯಸ್ಸಾದವರಲ್ಲಿ ಮೂಳೆಗಳ ಬಲವನ್ನು ಕಾಯ್ದುಕೊಳ್ಳಲು ಮತ್ತು ಸ್ನಾಯುಗಳ ದ್ರವ್ಯರಾಶಿಯನ್ನು (Muscle mass) ಕಾಪಾಡಲು ಇದು ಸಹಕಾರಿಯಾಗಿದೆ.

ಅಡ್ಡಪರಿಣಾಮಗಳು:

ಮೊಟ್ಟೆಗಳು ಆರೋಗ್ಯಕರವಾಗಿದ್ದರೂ, ಎಲ್ಲರಿಗೂ ಒಂದೇ ರೀತಿ ಇರುವುದಿಲ್ಲ. ಕೆಲವರ ದೇಹ ಆಹಾರದಲ್ಲಿನ ಕೊಲೆಸ್ಟ್ರಾಲ್ ಅನ್ನು ಬೇಗನೆ ಹೀರಿಕೊಳ್ಳುತ್ತದೆ. ಅಂತಹವರಲ್ಲಿ ಅತಿಯಾದ ಮೊಟ್ಟೆ ಸೇವನೆ ಎಲ್‌ಡಿಎಲ್ (LDL) ಅಥವಾ 'ಕೆಟ್ಟ ಕೊಲೆಸ್ಟ್ರಾಲ್' ಮಟ್ಟವನ್ನು ಸ್ವಲ್ಪ ಹೆಚ್ಚಿಸಬಹುದು.

ಮಧುಮೇಹ (Diabetes) ಅಥವಾ ಪ್ರೀ-ಡಯಾಬಿಟಿಸ್ (Prediabetes) ಇರುವವರು ಮೊಟ್ಟೆಯ ಪ್ರಮಾಣದ ಮೇಲೆ ನಿಗಾ ಇಡುವುದು ಒಳ್ಳೆಯದು. ಸಾಮಾನ್ಯವಾಗಿ ಮೊಟ್ಟೆಯಿಂದ ತೊಂದರೆಯಾಗುವುದಿಲ್ಲ, ಬದಲಿಗೆ ಅದನ್ನು ಬೇಯಿಸಲು ಬಳಸುವ ಬೆಣ್ಣೆ, ಚೀಸ್ ಅಥವಾ ಅದರ ಜೊತೆ ತಿನ್ನುವ ಸಂಸ್ಕರಿಸಿದ ಮಾಂಸದಿಂದ (Processed meats) ಹೃದಯದ ಆರೋಗ್ಯ ಏರುಪೇರಾಗುತ್ತದೆ.

ಮೊಟ್ಟೆಯನ್ನು ಸರಿಯಾದ ಕ್ರಮದಲ್ಲಿ ಸೇವಿಸುವುದು ಹೇಗೆ?:

ಮಿತವಾಗಿ ಬಳಸಿ: ಆರೋಗ್ಯವಂತ ವ್ಯಕ್ತಿಗಳಿಗೆ ದಿನಕ್ಕೆ 1 ಇಡೀ ಮೊಟ್ಟೆ ಸಂಪೂರ್ಣ ಸುರಕ್ಷಿತ. ನಿಮಗೆ ಹೆಚ್ಚಿನ ಪ್ರೊಟೀನ್ ಬೇಕಿದ್ದರೆ, ಒಂದು ಇಡೀ ಮೊಟ್ಟೆಯೊಂದಿಗೆ ಉಳಿದಂತೆ ಕೇವಲ ಮೊಟ್ಟೆಯ ಬಿಳಿ ಭಾಗವನ್ನು (Egg whites) ಸೇವಿಸಬಹುದು.

ಸಮತೋಲನವಿರಲಿ: ಬಿಳಿ ಬ್ರೆಡ್ ಅಥವಾ ಬೆಣ್ಣೆ ಟೋಸ್ಟ್ ಬದಲಿಗೆ ಮೊಟ್ಟೆಯೊಂದಿಗೆ ಪಾಲಕ್ ಸೊಪ್ಪು, ಟೊಮೆಟೊ ಅಥವಾ ಸಿರಿಧಾನ್ಯಗಳನ್ನು (Millets) ಬಳಸಿ. ಇದರಲ್ಲಿನ ನಾರಿನಂಶ (Fibre) ಕೊಬ್ಬನ್ನು ಸುಲಭವಾಗಿ ಜೀರ್ಣಿಸಲು ಸಹಾಯ ಮಾಡುತ್ತದೆ.

ವೈವಿಧ್ಯತೆ ಇರಲಿ: ವಾರದಲ್ಲಿ ಕೇವಲ ಮೊಟ್ಟೆಯನ್ನೇ ಬಳಸದೆ ಬೇಳೆಕಾಳುಗಳು, ಪನೀರ್ ಅಥವಾ ಟೋಫುಗಳನ್ನು ದಿನ ಬಿಟ್ಟು ದಿನ ಬಳಸಿ.

ಬೇಯಿಸುವ ವಿಧಾನ: ಮೊಟ್ಟೆಯನ್ನು ಎಣ್ಣೆಯಲ್ಲಿ ಹೆಚ್ಚು ಫ್ರೈ ಮಾಡುವ ಬದಲು ಆವಿಯಲ್ಲಿ ಬೇಯಿಸುವುದು (Steamed), ನೀರಿನಲ್ಲಿ ಕುದಿಸುವುದು (Boiled) ಅಥವಾ ಕಡಿಮೆ ಎಣ್ಣೆಯಲ್ಲಿ ಸ್ಕ್ರಾಂಬಲ್ಡ್ ಮಾಡುವುದು ಉತ್ತಮ. ಇದು ಪೋಷಕಾಂಶಗಳನ್ನು ಹಾಗೆಯೇ ಉಳಿಸುತ್ತದೆ.

ನಿಮ್ಮ ಕುಟುಂಬದಲ್ಲಿ ಹೆಚ್ಚಿನ ಕೊಲೆಸ್ಟ್ರಾಲ್, ಮಧುಮೇಹ ಅಥವಾ ಹೃದಯ ಕಾಯಿಲೆಯ ಇತಿಹಾಸವಿದ್ದರೆ (family history or Hereditary) ಮಿತವಾಗಿ ಸೇವಿಸಿ. ಇಲ್ಲದಿದ್ದರೆ, ಮಿತವಾಗಿ ಮತ್ತು ಸರಿಯಾದ ಕ್ರಮದಲ್ಲಿ ಬೇಯಿಸಿ ತಿನ್ನುವ 1 ಮೊಟ್ಟೆ ಪ್ರಕೃತಿ ನಮಗೆ ನೀಡಿರುವ ಅತ್ಯಂತ ಸರಳ ಹಾಗೂ ಪರಿಪೂರ್ಣ ಪೌಷ್ಟಿಕ ಆಹಾರವಾಗಿದೆ.

ಗಮನಿಸಿ: ಈ ಲೇಖನ ಸಾಮಾನ್ಯ ಆರೋಗ್ಯ ಜಾಗೃತಿಗಾಗಿ ಸಿದ್ಧಪಡಿಸಲಾದ ಮಾಹಿತಿಯಾಗಿದೆ. ನಿಮ್ಮ ವೈಯಕ್ತಿಕ ಆರೋಗ್ಯ ಸ್ಥಿತಿ ಅಥವಾ ಕೊಲೆಸ್ಟ್ರಾಲ್ ಮಟ್ಟಕ್ಕೆ ಅನುಗುಣವಾಗಿ ಆಹಾರ ಕ್ರಮವನ್ನು ಬದಲಾಯಿಸುವ ಮುನ್ನ ಅರ್ಹ ವೈದ್ಯರ ಸಲಹೆ ಪಡೆಯಿರಿ.