Saturday, 23 Jan, 11.43 pm ಉದಯವಾಣಿ

ಟಾಪ್ 10 ಸುದ್ದಿ
ಥಾಯ್ಲೆಂಡ್‌ ಬ್ಯಾಡ್ಮಿಂಟನ್‌: ಸಾತ್ವಿಕ್‌-ಚಿರಾಗ್‌ಗೆ ಸೋಲು

ಬ್ಯಾಂಕಾಕ್‌: ಟೋಕ್ಯೊ ಒಲಿಂಪಿಕ್ಸ್‌ ಪದಕದ ಭರವಸೆಯಾಗಿರುವ ಸಾತ್ವಿಕ್‌ ಸಾಯಿರಾಜ್‌ ರಾಂಕಿರೆಡ್ಡಿ-ಚಿರಾಗ್‌ ಶೆಟ್ಟಿ ಜೋಡಿಯ ಥಾಯ್ಲೆಂಡ್‌ ಓಪನ್‌ ಸೂಪರ್‌-1000 ಬ್ಯಾಡ್ಮಿಂಟನ್‌’ ಪಂದ್ಯಾವಳಿಯ ಓಟ ಸೆಮಿಫೈನಲ್‌ನಲ್ಲಿ ಅಂತ್ಯಗೊಂಡಿದೆ. ಶನಿವಾರ ನಡೆದ ಪಂದ್ಯದಲ್ಲಿ, 10ನೇ ಶ್ರೇಯಾಂಕಿತ ಭಾರತೀಯ ಜೋಡಿ ಮಲೇಷ್ಯಾದ ಆರನ್‌ ಚಿಯ-ಸೋಹ್‌ ವೂಯಿ ಯಿಕ್‌ ವಿರುದ್ಧ ಅಮೋಘ ಹೋರಾಟ ಪ್ರದರ್ಶಿಸಿತು. ಆದರೂ 18-21, 18-21ರ ನೇರ ಗೇಮ್‌ಗಳಿಂದ ಪರಾಭವಗೊಂಡಿತು.

ಮೊದಲ ಗೇಮ್‌ನಲ್ಲಿ 4-2ರಿಂದ ಮುಂದಿದ್ದ ಸಾತ್ವಿಕ್‌-ಚಿರಾಗ್‌, ಬ್ರೇಕ್‌ ವೇಳೆ ಬಹುತೇಕ ಸಮಬಲ ಸ್ಥಿತಿಗೆ ಬಂದಿದ್ದರು (10-11). ಬಳಿಕ 15-16ರ ತನಕವೂ ಸ್ಪರ್ಧೆ ಇದೇ ಲಯದಲ್ಲಿ ಸಾಗಿತು. ಈ ಹಂತದಲ್ಲಿ ಮಲೇಷ್ಯಾ ಜೋಡಿ ಸತತ 4 ಅಂಕ ಗಳಿಸಿ ಮೇಲುಗೈ ಸಾಧಿಸಿತು. ದ್ವಿತೀಯ ಗೇಮ್‌ನಲ್ಲೂ ಭಾರತೀಯ ಜೋಡಿ 3-1ರ ಆರಂಭಿಕ ಮೇಲುಗೈ ಪಡೆದಿತ್ತು. ಆಗ ಮಲೇಷ್ಯಾ ಶಟ್ಲರ್ ಸತತ 4 ಅಂಕ ಬುಟ್ಟಿಗೆ ಹಾಕಿಕೊಂಡರು. ಪಟ್ಟು ಸಡಿಲಿಸದ ಸಾತ್ವಿಕ್‌-ಚಿರಾಗ್‌ 8-8 ಸಮಬಲಕ್ಕೆ ಬಂದರು. ವಿರಾಮದ ವೇಳೆ ಎದುರಾಳಿ ಜೋಡಿ 3 ಅಂಕಗಳ ಮುನ್ನಡೆ ಹೊಂದಿತು. ಬಳಿಕ ಇದೇ ಲಯದಲ್ಲಿ ಸಾಗಿ ಪಂದ್ಯವನ್ನು ವಶಪಡಿಸಿಕೊಂಡಿತು.

Dailyhunt
Disclaimer: This story is auto-aggregated by a computer program and has not been created or edited by Dailyhunt. Publisher: Udayavani
Top