ಬ್ಯಾಂಕಾಕ್‌: ಟೋಕ್ಯೊ ಒಲಿಂಪಿಕ್ಸ್‌ ಪದಕದ ಭರವಸೆಯಾಗಿರುವ ಸಾತ್ವಿಕ್‌ ಸಾಯಿರಾಜ್‌ ರಾಂಕಿರೆಡ್ಡಿ-ಚಿರಾಗ್‌ ಶೆಟ್ಟಿ ಜೋಡಿಯ ಥಾಯ್ಲೆಂಡ್‌ ಓಪನ್‌ ಸೂಪರ್‌-1000 ಬ್ಯಾಡ್ಮಿಂಟನ್‌’ ಪಂದ್ಯಾವಳಿಯ ಓಟ ಸೆಮಿಫೈನಲ್‌ನಲ್ಲಿ ಅಂತ್ಯಗೊಂಡಿದೆ. ಶನಿವಾರ ನಡೆದ ಪಂದ್ಯದಲ್ಲಿ, 10ನೇ ಶ್ರೇಯಾಂಕಿತ ಭಾರತೀಯ ಜೋಡಿ ಮಲೇಷ್ಯಾದ ಆರನ್‌ ಚಿಯ-ಸೋಹ್‌ ವೂಯಿ ಯಿಕ್‌ ವಿರುದ್ಧ ಅಮೋಘ ಹೋರಾಟ ಪ್ರದರ್ಶಿಸಿತು. ಆದರೂ 18-21, 18-21ರ ನೇರ ಗೇಮ್‌ಗಳಿಂದ ಪರಾಭವಗೊಂಡಿತು.

ಮೊದಲ ಗೇಮ್‌ನಲ್ಲಿ 4-2ರಿಂದ ಮುಂದಿದ್ದ ಸಾತ್ವಿಕ್‌-ಚಿರಾಗ್‌, ಬ್ರೇಕ್‌ ವೇಳೆ ಬಹುತೇಕ ಸಮಬಲ ಸ್ಥಿತಿಗೆ ಬಂದಿದ್ದರು (10-11). ಬಳಿಕ 15-16ರ ತನಕವೂ ಸ್ಪರ್ಧೆ ಇದೇ ಲಯದಲ್ಲಿ ಸಾಗಿತು. ಈ ಹಂತದಲ್ಲಿ ಮಲೇಷ್ಯಾ ಜೋಡಿ ಸತತ 4 ಅಂಕ ಗಳಿಸಿ ಮೇಲುಗೈ ಸಾಧಿಸಿತು. ದ್ವಿತೀಯ ಗೇಮ್‌ನಲ್ಲೂ ಭಾರತೀಯ ಜೋಡಿ 3-1ರ ಆರಂಭಿಕ ಮೇಲುಗೈ ಪಡೆದಿತ್ತು.