ಹೊಸದಿಲ್ಲಿ, ಮೇ 22: ದೇಶದಲ್ಲಿ 9,000ದಷ್ಟು ಜನರು ಮ್ಯುಕೋರ್ಮೈಕೋಸಿಸ್ ಅಥವಾ ಬ್ಲ್ಯಾಕ್ಫಂಗಸ್ ಸೋಂಕಿಗೆ ಒಳಗಾಗಿದ್ದಾರೆ ಎಂದು ಕೇಂದ್ರ ಸಚಿವ ಡಿವಿ ಸದಾನಂದ ಗೌಡ ಶನಿವಾರ ಹೇಳಿದ್ದಾರೆ.
ಪರಿಸ್ಥಿತಿಯನ್ನು ಪರಿಶೀಲಿಸಿದ ಬಳಿಕ ಈ ಸೋಂಕಿಗೆ ಬಳಸುವ ಆಯಂಫೊಟೆರಿಸಿನ್-ಬಿ ಲಸಿಕೆಯ 23,680 ಹೆಚ್ಚುವರಿ ಸೀಸೆಗಳನ್ನು ಸೋಂಕಿನ ಪ್ರಮಾಣ ಹೆಚ್ಚಿರುವ ರಾಜ್ಯಗಳಿಗೆ ರವಾನಿಸಲಾಗಿದೆ. ದೇಶದಲ್ಲಿ ಈಗ ಸುಮಾರು 8,848 ಬ್ಲ್ಯಾಕ್ಫಂಗಸ್(ಕರಿಶಿಲೀಂಧ್ರ) ಸೋಂಕು ಪ್ರಕರಣ ವರದಿಯಾಗಿದೆ ಎಂದು ರಾಸಾಯನಿಕ ಮತ್ತು ರಸಗೊಬ್ಬರ ಇಲಾಖೆಯ ಸಚಿವ ಸದಾನಂದ ಗೌಡ ಟ್ವೀಟ್ ಮಾಡಿದ್ದಾರೆ. ಅತ್ಯಧಿಕ ಸೋಂಕು ಪ್ರಕರಣ ದಾಖಲಾಗಿರುವ ಗುಜರಾತ್ಗೆ 5,800 ಸೀಸೆ, ಎರಡನೇ ಸ್ಥಾನದಲ್ಲಿರುವ ಮಹಾರಾಷ್ಟ್ರಕ್ಕೆ 5,090 ಸೀಸೆ, ಆಂಧ್ರಪ್ರದೇಶಕ್ಕೆ 2,300 ಸೀಸೆ, ತೆಲಂಗಾಣಕ್ಕೆ 890 ಸೀಸೆ ಲಸಿಕೆ ರವಾನಿಸಲಾಗಿದೆ.