ನ್ಯೂಯಾರ್ಕ್: ಯುಎಸ್ ಓಪನ್ ಟೆನಿಸ್ ಪಂದ್ಯಾವಳಿಯ ಪುರುಷರ ಸಿಂಗಲ್ಸ್ ಫೈನಲ್ನಲ್ಲಿ ಅಗ್ರ ಶ್ರೇಯಾಂಕದ ಜರ್ಮನಿ ಆಟಗಾರ ಅಲೆಕ್ಸಾಂಡರ್ ಝ್ವೆರೆವ್ ಮತ್ತು ಅಮೆರಿಕದ ಬೆನ್ ಶೆಲ್ಟನ್ ಮುಖಾಮುಖಿಯಾಗಲಿದ್ದಾರೆ. ಫೈನಲ್ ಪಂದ್ಯವು ಅಮೆರಿಕದ ಸಮಯ ರವಿವಾರ ಸಂಜೆ ನಡೆಯಲಿದೆ.
ಶುಕ್ರವಾರ ನಡೆದ ಮೊದಲ ಸೆಮಿಫೈನಲ್ ಪಂದ್ಯದಲ್ಲಿ ಝ್ವೆರೆವ್ ರಶ್ಯದ ಕರೆನ್ ಖಚನೊವ್ರನ್ನು 6-3, 7-6 (9/7), 7-6 (8/6) ಸೆಟ್ಗಳಿಂದ ಮಣಿಸಿದರು.
ಇದರೊಂದಿಗೆ ಅವರು ಸತತ ಮೂರನೇ ಗ್ರ್ಯಾನ್ ಸ್ಲಾಮ್ ಫೈನಲ್ ಪ್ರವೇಶಿಸಿದ್ದಾರೆ. ಇದಕ್ಕೂ ಮೊದಲು, ಅವರು ಫ್ರೆಂಚ್ ಓಪನ್ನಲ್ಲಿ ಚಾಂಪಿಯನ್ ಆಗಿ ಹೊರಹೊಮ್ಮಿದರೆ, ವಿಂಬಲ್ಡನ್ನಲ್ಲಿ ರನ್ನರ್-ಅಪ್ ಆಗಿದ್ದರು.
ಅಂತಿಮ ನಿರ್ಣಾಯಕ ಟೈ-ಬ್ರೇಕರ್ನಲ್ಲಿ ಎರಡು ಸೆಟ್ ಪಾಯಿಂಟ್ಗಳನ್ನು ಉಳಿಸಿಕೊಳ್ಳುವಲ್ಲಿ ಅವರು ಯಶಸ್ವಿಯಾದರು.
2020ರ ಯುಎಸ್ ಓಪನ್ ಫೈನಲ್ನಲ್ಲಿ, ಝ್ವೆರೆವ್ ಆಸ್ಟ್ರಿಯದ ಡಾಮಿನಿಕ್ ತಿಯಮ್ ವಿರುದ್ಧ ಐದು ಸೆಟ್ಗಳ ಹೋರಾಟದಲ್ಲಿ ಕೂದಲೆಳೆಯ ಅಂತರದಿಂದ ಸೋತು ಪ್ರಶಸ್ತಿಯಿಂದ ವಂಚಿತರಾಗಿದ್ದರು.
ಪಂದ್ಯಾವಳಿಯ ಆರಂಭದಲ್ಲಿ, ಮೊದಲ ಮತ್ತು ಎರಡನೇ ಸುತ್ತುಗಳಲ್ಲಿ ಐದು ಸೆಟ್ಗಳ ಸುದೀರ್ಘ ಆಟವನ್ನು ಝ್ವೆರೆವ್ ಆಡಿದ್ದರು. ಆ ಎರಡು ಪಂದ್ಯಗಳಿಗಾಗಿ ಅವರು ಮೈದಾನದಲ್ಲಿ ಒಟ್ಟು ಒಂಭತ್ತು ಗಂಟೆ ಇಪ್ಪತ್ತಾರು ನಿಮಿಷಗಳನ್ನು ಕಳೆದಿದ್ದರು. ಝ್ವೆರೆವ್, ಕ್ರಮೇಣ ತನ್ನ ಆಟದ ಮಟ್ಟವನ್ನು ಸುಧಾರಿಸಿಕೊಂಡರು. ಶುಕ್ರವಾರ ಅವರು ತನ್ನ ಎದುರಾಳಿಯನ್ನು ಎರಡು ಗಂಟೆ 57 ನಿಮಿಷಗಳಲ್ಲಿ ಸೋಲಿಸಿದರು.
2021ರ ಟೋಕಿಯೊ ಒಲಿಂಪಿಕ್ಸ್ ಚಿನ್ನದ ಪದಕದ ಪಂದ್ಯದಲ್ಲಿ ಝ್ವೆರೆವ್ ವಿರುದ್ಧ ಸೋತಿರುವ ಖಚನೊವ್, ಎರಡು ಮತ್ತು ಮೂರನೇ ಸೆಟ್ಗಳಲ್ಲಿ ತೀವ್ರ ಪೈಪೋಟಿ ನೀಡಿದರು.
ಟಿಯಾಫೊ ವಿರುದ್ಧ ಬೆನ್ ಶೆಲ್ಟನ್ ಜಯಭೇರಿ
ಯುಎಸ್ ಓಪನ್ ಟೆನಿಸ್ ಪಂದ್ಯಾವಳಿಯ ಎರಡನೇ ಸೆಮಿಫೈನಲ್ನಲ್ಲಿ ಶುಕ್ರವಾರ ಅಮೆರಿಕದ ಬೆನ್ ಶೆಲ್ಟನ್ ತನ್ನದೇ ದೇಶದ ಫ್ರಾನ್ಸಿಸ್ ಟಿಯಾಫೊ ಅವರನ್ನು ಸೋಲಿಸಿ ಫೈನಲ್ ತಲುಪಿದ್ದಾರೆ.
ಆರ್ತರ್ ಆಯಶ್ ಸ್ಟೇಡಿಯಂ ಕೋರ್ಟ್ನಲ್ಲಿ ನಡೆದ ನಾಲ್ಕು ಸೆಟ್ಗಳ ಸುದೀರ್ಘ ಪಂದ್ಯದಲ್ಲಿ, ಬೆನ್ ಶೆಲ್ಟನ್ ತನ್ನ ಎದುರಾಳಿಯನ್ನು 4-6, 6-3, 6-3, 7-5 ಅಂತರದಿಂದ ಸೋಲಿಸಿದರು. ಇದರೊಂದಿಗೆ, ಅವರು ತನ್ನ ಕ್ರೀಡಾಜೀವನದ ಚೊಚ್ಚಲ ಗ್ರ್ಯಾನ್ ಸ್ಲ್ಯಾಮ್ ಫೈನಲ್ ತಲುಪಿದ್ದಾರೆ.
23 ವರ್ಷದ ಎಂಟನೇ ಶ್ರೇಯಾಂಕದ ಶೆಲ್ಟನ್ 20 ಭರ್ಜರಿ ಏಸ್ಗಳನ್ನು ಸಿಡಿಸಿದರು.
ಕ್ವಾರ್ಟರ್ಫೈನಲ್ನಲ್ಲಿ ಹಾಲಿ ಚಾಂಪಿಯನ್ ಕಾರ್ಲೋಸ್ ಅಲ್ಕರಾಝ್ ಅವರನ್ನು ಮಣಿಸಿರುವ ಶೆಲ್ಟನ್ಗೆ, 2003ರ ಬಳಿಕ ಗ್ರ್ಯಾನ್ ಸ್ಲ್ಯಾಮ್ ಪ್ರಶಸ್ತಿಯೊಂದನ್ನು ಗೆದ್ದ ಮೊದಲ ಅಮೆರಿಕನ್ ಪುರುಷ ಆಟಗಾರನಾಗುವ ಸುವರ್ಣಾವಕಾಶ ಈಗ ಲಭಿಸಿದೆ. 2003ರಲ್ಲಿ ಆಯಂಡಿ ರಾಡಿಕ್ ಯುಎಸ್ ಓಪನ್ ಗೆದ್ದಿದ್ದರು.
ಟಿಯಾಫೊ ಉತ್ತಮ ಆರಂಭ ಪಡೆದರು. ಶೆಲ್ಟನ್ ಅನಿರೀಕ್ಷಿತ ಡಬಲ್-ಫಾಲ್ಟ್ನಿಂದಾಗಿ 5-4ರ ಹಿನ್ನಡೆ ಅನುಭವಿಸಿದಾಗ, ಟಿಯಾಫೊ ಬ್ರೇಕ್ ಪಾಯಿಂಟ್ ಗಳಿಸಿ ಮೊದಲ ಸೆಟ್ ಅನ್ನು ತನ್ನದಾಗಿಸಿಕೊಂಡರು.
ಟಿಯಾಫೊ ಯಾವುದೇ ಅಂಕ ಬಿಟ್ಟುಕೊಡದೆ ಸರ್ವ್ ಉಳಿಸಿಕೊಂಡು ಮೊದಲ ಸೆಟ್ ಗೆದ್ದರಾದರೂ, ಶೆಲ್ಟನ್ ಎರಡನೇ ಸೆಟ್ನಲ್ಲಿ ತೀವ್ರ ಪ್ರತಿಹೋರಾಟ ನೀಡಿದರು. ಎರಡನೇ ಗೇಮನ್ನು ಗೆದ್ದ ಅವರು ಅಂಕವನ್ನು ಸಮಬಲಗೊಳಿಸಿದರು.
ಪಂದ್ಯದ ಪೂರ್ಣ ನಿಯಂತ್ರಣ ಶೆಲ್ಟನ್ ಕೈಗೆ ಬಂದಿತ್ತು. ಮೂರನೇ ಸೆಟ್ನ ಆರಂಭದಲ್ಲಿ ಟಿಯಾಫೊ ಎರಡು ಬ್ರೇಕ್ ಪಾಯಿಂಟ್ಗಳನ್ನು ನಿಭಾಯಿಸಿ ಸರ್ವ್ ಉಳಿಸಿಕೊಳ್ಳಲು ಕಠಿಣ ಹೋರಾಟ ನಡೆಸಬೇಕಾಯಿತು. ಅಂತಿಮವಾಗಿ ಆ ಸೆಟ್ಟನ್ನು ಶೆಲ್ಟನ್ ಗೆದ್ದರು.
ನಾಲ್ಕನೇ ಸೆಟ್ನಲ್ಲಿ ಇಬ್ಬರೂ 12ನೇ ಗೇಮ್ವರೆಗೂ ತಮ್ಮ ಸರ್ವ್ಗಳನ್ನು ಉಳಿಸಿಕೊಂಡು ಸಾಗಿದರು. ಅಂತಿಮವಾಗಿ 12ನೇ ಗೇಮ್ನಲ್ಲಿ ನಿರ್ಣಾಯಕ ಬ್ರೇಕ್ ಪಡೆದ ಶೆಲ್ಟನ್ ಸ್ಮರಣೀಯ ವಿಜಯವೊಂದನ್ನು ದಾಖಲಿಸಿದರು.