ಈ ಕುರಿತು ತಮ್ಮ ಅಧಿಕೃತ ಎಕ್ಸ್‌ ಅಕೌಂಟ್‌ನಲ್ಲಿ ಪೋಸ್ಟ್‌ ಮಾಡಿರುವ ಪೆಂಟಗನ್ ವಕ್ತಾರ ಸೀನ್ ಪಾರ್ನೆಲ್, "ಜನರಲ್ ರ್‍ಯಾಂಡಿ ಎ. ಜಾರ್ಜ್ ಅವರು ಸೇನೆಯ 41ನೇ ಮುಖ್ಯಸ್ಥರ ಹುದ್ದೆಯಿಂದ ತಕ್ಷಣದಿಂದ ಜಾರಿಗೆ ಬರುವಂತೆ ನಿವೃತ್ತರಾಗಲಿದ್ದಾರೆ. ಅಮೆರಿಕ ಸೇನೆಗೆ ಮತ್ತು ನಮ್ಮ ರಾಷ್ಟ್ರಕ್ಕೆ ಜನರಲ್ ಜಾರ್ಜ್‌ ಅವರು ದಶಕಗಳ ಕಾಲ ನೀಡಿದ ಸೇವೆಗೆ ಯುದ್ಧ ಇಲಾಖೆ ಕೃತಜ್ಞವಾಗಿದೆ. ಅವರ ನಿವೃತ್ತ ಜೀವನ ಸುಖಮಯವಾಗಿರಲಿ ಎಂದು ನಾವು ಹಾರೈಸುತ್ತೇವೆ" ಎಂದು ಹೇಳಿದ್ದಾರೆ.

ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಅವರು ಇರಾನ್‌ನನ್ನು ಶಿಲಾಯುಗಕ್ಕೆ ತಳ್ಳುವುದಾಗಿ ಬೆದರಿಕೆ ಹಾಕಿದ್ದಾರೆ. ಇದಕ್ಕೆ ಅಷ್ಟೇ ತೀಕ್ಷ್ಣವಾಗಿ ಪ್ರತಿಕ್ರಿಯೆ ನೀಡಿರುವ ಇರಾನ್‌, ಅಮೆರಿಕದ ಸೈನಿಕರನ್ನೇ ಶಿಲಾಯುಗಕ್ಕೆ ಕಳುಹಿಸುವುದಾಗಿ ಎಚ್ಚರಿಕೆ ನೀಡಿದೆ. ಇಂತಹ ಸಂದಿಗ್ಧ ಪರಿಸ್ಥಿತಿಯಲ್ಲಿ, ಟ್ರಂಪ್‌ ಆಡಳಿತ ತನ್ನ ಸೇನಾ ಮುಖ್ಯಸ್ಥರನ್ನೇ ಸೇವೆಯಿಂದ ನಿವೃತ್ತಿಯಾಗುವಂತೆ ಮಾಡಿರುವುದು ಹಲವು ಊಹಾಪೋಹಗಳಿಗೆ ಕಾರಣವಾಗಿದೆ.

ಒಂದು ಕಡೆ ಇರಾನ್ ವಿರುದ್ಧ ಅಮೆರಿಕ ಸೇನೆ ಕಾದಾಡುತ್ತಿದೆ. ಇನ್ನೊಂದು ಕಡೆ ಪೆಂಟಗನ್‌ನಲ್ಲಿ ಅಮೆರಿಕ ಸೇನೆಯ ಉನ್ನತ ನಾಯಕರ ತಲೆದಂಡವಾಗುತ್ತಿದೆ. ಇದು ಸಹಜವಾಗಿಯೇ ಅಮೆರಿಕ ಸೇನೆಯ ನೈತಿಕ ಸ್ಥೈರ್ಯವನ್ನು ಕುಗ್ಗಿಸುವ ಅಪಾಯವಿದೆ ಎಂದು ಅನೇಕ ಮಿಲಿಟರಿ ಪರಿಣಿತರು ಮತ್ತು ರಕ್ಷಣಾ ತಜ್ಞರು ತೀವ್ರ ಆತಂಕ ವ್ಯಕ್ತಪಡಿಸಿದ್ದಾರೆ.


ಯುದ್ಧದ ಸಮಯದಲ್ಲಿ ಮಿಲಿಟರಿ ನಾಯಕತ್ವದ ಸ್ಥಿರತೆ ಕಾಪಾಡಿಕೊಳ್ಳುವುದು ಅತ್ಯಂತ ಮುಖ್ಯ. ನಾಯಕತ್ವದಲ್ಲಿ ಪದೇ ಪದೇ ಬದಲಾವಣೆಗಳಾದರೆ ಅದು ರಣರಂಗದಲ್ಲಿ ಹೋರಾಡುವ ಸೈನಿಕರ ಮೇಲೂ ನಕಾರಾತ್ಮಕ ಪ್ರಭಾವ ಬೀರುತ್ತದೆ. ಪೀಟ್ ಹೆಗ್ಸೆತ್ ಅವರ ಈ ಸರಣಿ ವಜಾ ಪ್ರಕ್ರಿಯೆಗಳು, ಸೇನೆಯಲ್ಲಿ ಗೊಂದಲವನ್ನು ಸೃಷ್ಟಿಸುತ್ತಿವೆ ಎಂಬ ಟೀಕೆಗಳು ವ್ಯಕ್ತವಾಗುತ್ತಿವೆ.