ವಾಷಿಂಗ್ಟನ್ ಡಿಸಿ/ಹೊಸದಿಲ್ಲಿ: ಅತಿಶೀಘ್ರದಲ್ಲೇ ಭಾರತ ಮತ್ತು ಅಮೆರಿಕ ನಡುವೆ ಜಾವೆಲಿನ್ ಶಸ್ತ್ರಾಸ್ತ್ರ ಒಪ್ಪಂದ ಏರ್ಪಡಲಿದ್ದು, ಈ ಟ್ಯಾಂಕ್ ವಿರೋಧಿ ಶಸ್ತ್ರಾಸ್ತ್ರ ವ್ಯವಸ್ಥೆಯು, ವಾಸ್ತವ ನಿಯಂತ್ರಣ ರೇಖೆ (ಎಲ್ಓಸಿ) ಗಡಿ ಬಳಿ ಪಾಕಿಸ್ತಾನ ನಿಯೋಜಸಿರುವ ಟ್ಯಾಂಕ್ ರೆಜಿಮೆಂಟ್ಗೆ ಆಘಾತ ತಂದಿದೆ.
"ಯುದ್ಧದಲ್ಲಿ ತನ್ನ ಸಾಮರ್ಥ್ಯವನ್ನು ಸಾಬೀತುಪಡಿಸಿರುವ, ಒಬ್ಬರೇ ಸಾಗಿಸಬಹುದಾದ, 'ಫೈರ್-ಅಂಡ್-ಫಾರ್ಗೆಟ್' (ಹೊಡೆದು ಮರೆತುಬಿಡುವ) ತಂತ್ರಜ್ಞಾನದ ಹಾಗೂ ಮಧ್ಯಮ-ವ್ಯಾಪ್ತಿಯ 'ಜಾವೆಲಿನ್' ಟ್ಯಾಂಕ್-ವಿರೋಧಿ ಶಸ್ತ್ರಾಸ್ತ್ರ ವ್ಯವಸ್ಥೆಯನ್ನು ಖರೀದಿಸಲು ಭಾರತವು ಯೋಜಿಸುತ್ತಿದೆ" ಎಂದು ಭಾರತದಲ್ಲಿನ ಅಮೆರಿಕದ ರಾಯಭಾರಿ ಸೆರ್ಗಿಯೋ ಗೋರ್ ತಿಳಿಸಿದ್ದಾರೆ.
ನವದೆಹಲಿ ಮತ್ತು ವಾಷಿಂಗ್ಟನ್ ನಡುವಿನ ರಕ್ಷಣಾ ಸಹಕಾರವನ್ನು ಬಲಪಡಿಸುವ ನಿಟ್ಟಿನಲ್ಲಿ, ಕಳೆದ ವರ್ಷದ ನವೆಂಬರ್ನಲ್ಲಿ ಅಮೆರಿಕದ ವಿದೇಶಾಂಗ ಇಲಾಖೆಯು ಭಾರತಕ್ಕೆ FGM-148 ಜಾವೆಲಿನ್ ಶಸ್ತ್ರಾಸ್ತ್ರ ವ್ಯವಸ್ಥೆಯ ಮಾರಾಟಕ್ಕೆ ಅನುಮೋದನೆ ನೀಡಿತ್ತು.
"ದೊಡ್ಡ ಸುದ್ದಿ! ಯುದ್ಧದಲ್ಲಿ ಸಾಬೀತಾಗಿರುವ ಜಾವೆಲಿನ್ ಟ್ಯಾಂಕ್-ವಿರೋಧಿ ವ್ಯವಸ್ಥೆಯನ್ನು ಖರೀದಿಸಲು ಭಾರತ ಯೋಜಿಸುತ್ತಿದೆ. ಮೇ 2026ರ 'ಶಂಗ್ರಿ-ಲಾ ಡೈಲಾಗ್'ನಲ್ಲಿ ಅಮೆರಿಕದ ವಿದೇಶಾಂಗ ಕಾರ್ಯದರ್ಶಿ ಪೀಟ್ ಹೆಗ್ಸೆತ್ ಅವರು ಒತ್ತಿಹೇಳಿದಂತೆ, ಇದು ಅಮೆರಿಕ-ಭಾರತ ರಕ್ಷಣಾ ಸಂಬಂಧದಲ್ಲಿನ ಒಂದು ಮಹತ್ವದ ಮುನ್ನಡೆಯಾಗಿದೆ ಮತ್ತು ಜಂಟಿ ಉತ್ಪಾದನೆಯ ಸಾಧ್ಯತೆಗಳಿಗೆ ದಾರಿ ಮಾಡಿಕೊಡುತ್ತದೆ. ನಮ್ಮ ಎರಡೂ ರಾಷ್ಟ್ರಗಳ ನಡುವಿನ ಸಹಭಾಗಿತ್ವವು ಸಾರ್ವಕಾಲಿಕ ಗರಿಷ್ಠ ಮಟ್ಟದಲ್ಲಿದೆ" ಎಂದು ಸೆರ್ಗಿಯೊ ಗೋರ್ ತಮ್ಮ ಅಧಿಕೃತ ಎಕ್ಸ್ ಅಕೌಂಟ್ನಲ್ಲಿ ಪೋಸ್ಟ್ ಮಾಡಿದ್ದಾರೆ.
ಭಾರತವು ಎಷ್ಟು ಜಾವೆಲಿನ್ ಟ್ಯಾಂಕ್-ವಿರೋಧಿ ನಿರ್ದೇಶಿತ ಕ್ಷಿಪಣಿ ವ್ಯವಸ್ಥೆಗಳನ್ನು ಖರೀದಿಸುತ್ತಿದೆ ಅಥವಾ ಈ ಖರೀದಿಯ ಒಟ್ಟು ವೆಚ್ಚವೆಷ್ಟು ಎಂಬುದು ತಕ್ಷಣಕ್ಕೆ ತಿಳಿದುಬಂದಿಲ್ಲ. ಈ ಒಪ್ಪಂದದ ಕುರಿತು ನವದೆಹಲಿಯೂ ಸಹ ತಕ್ಷಣಕ್ಕೆ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.
ಏನಿದು ಜಾವೆಲಿನ್?
ಲಾಕ್ಹೀಡ್ ಮಾರ್ಟಿನ್ ಮತ್ತು ಆರ್ಟಿಎಕ್ಸ್ ಜಂಟಿಯಾಗಿ ಶಸ್ತ್ರಸಜ್ಜಿತ ಗುರಿಗಳ ವಿರುದ್ಧ ಬಳಸಲು ಅಭಿವೃದ್ಧಿಪಡಿಸಿದ ಪೋರ್ಟಬಲ್ ಟ್ಯಾಂಕ್ ವಿರೋಧಿ ಕ್ಷಿಪಣಿ ವ್ಯವಸ್ಥೆಯಾದ ಜಾವೆಲಿನ್, ಅಮೆರಿಕ ಮತ್ತು ಮಿತ್ರಪಕ್ಷಗಳ ಅತ್ಯಂತ ನಂಬಿಗಸ್ತ ಶಸ್ತ್ರಾಸ್ತ್ರ ವ್ಯವಸ್ಥೆಯಾಗಿದೆ. ಭುಜದ ಮೇಲೆ ಹೊತ್ತು ಉಡಾವಣೆ ಮಾಡಬಹುದಾದ ಈ ವ್ಯವಸ್ಥೆಯು, ಸ್ವಯಂಚಾಲಿತ ಮಾರ್ಗದರ್ಶನ ಕಾರ್ಯವಿಧಾನವನ್ನು ಹೊಂದಿದೆ.ಜಾವೆಲಿನ್ ಟ್ಯಾಂಕ್ನ ಮೇಲಿನ ಭಾಗವನ್ನು ತನ್ನ ಗುರಿಯಾಗಿಸಿಕೊಳ್ಳುತ್ತದೆ. ತಲೆಕೆಳಗಾದ ಯು-ಆಕಾರದ ಪಥದಲ್ಲಿ ಹಾರಿ, ತನ್ನ ಗುರಿಯನ್ನು ನಿಖರವಾಗಿ ಹೊಡೆಯುವಲ್ಲಿ ಇದು ತನ್ನ ಸಾಮರ್ಥ್ಯವನ್ನು ಸಾಬೀತುಪಡಿಸಿದೆ. ಇದರ ಮೃದು-ಉಡಾವಣಾ ವಿನ್ಯಾಸವು ಕಟ್ಟಡಗಳು ಮತ್ತು ಬಂಕರ್ಗಳು ಸೇರಿದಂತೆ ಸುತ್ತುವರಿದ ರಚನೆಗಳಿಂದ ವ್ಯವಸ್ಥೆಯನ್ನು ಸುರಕ್ಷಿತವಾಗಿ ಹಾರಿಸಲು ಸಹ ಅನುಮತಿಸುತ್ತದೆ.