ಬೆಂಗಳೂರು: ಬಿಡಿಎಯಿಂದ ಬೆಂಗಳೂರು ವಿಮಾನ ನಿಲ್ದಾಣ ರಸ್ತೆಯ ಮೇಖ್ರಿ ಸರ್ಕಲ್ ಬಳಿ ಹೊಸ ಎಲಿವೇಟೆಡ್ ಕಾರಿಡಾರ್ ಮೇಲ್ಸೇತುವೆ ನಿರ್ಮಿಸಲಾಗುತ್ತಿದ್ದು, ಟೆಂಡರ್ ಆಹ್ವಾನಿಸಲಾಗಿದೆ. ಸುಮಾರು 420 ಕೋಟಿ ರೂಪಾಯಿ ವೆಚ್ಚದಲ್ಲಿ ನಾಲ್ಕು ಪಥಗಳ ಮೇಲ್ಸೇತುವೆ ಇದಾಗಿದೆ.
ಎಲಿವೇಟೆಡ್ ಕಾರಿಡಾರ್ ಯೋಜನೆಯ ಕಾಮಗಾರಿಗಾಗಿ ಬಿಡಿಎ ಮಾರ್ಚ್ 26ರಂದು ಎರಡನೇ ಬಾರಿಗೆ ಟೆಂಡರ್ ಆಹ್ವಾನಿಸಿದೆ. ಕಳೆದ ಡಿಸೆಂಬರ್ನಲ್ಲಿ ಸುರಂಗ ಮಾರ್ಗ ಯೋಜನೆಯೊಂದಿಗೆ ಮೊದಲ ಬಾರಿ ಟೆಂಡರ್ ಕರೆಯಲಾಗಿತ್ತು. ಈಗ ಪ್ರತ್ಯೇಕವಾಗಿ ಟೆಂಡರ್ ಪ್ರಕ್ರಿಯೆ ಆರಂಭಿಸಲಾಗಿದೆ. (ಮೈಸೂರು ರಸ್ತೆಯಲ್ಲಿ ಹೊಸ ಎಲಿವೇಟೆಡ್ ಕಾರಿಡಾರ್)
ಎಲ್ಲಿಂದ ಎಲ್ಲಿಗೆ ಮೇಲ್ಸೇತುವೆ?
1.6 ಕಿ.ಮೀ ಉದ್ದದ ಈ ಮೇಲ್ಸೇತುವೆಯು ಪಶು ವೈದ್ಯಕೀಯ ಕಾಲೇಜು ಎದುರಿನ ಯುಎಎಸ್ ಸಿಬ್ಬಂದಿ ವಸತಿಗೃಹದ ಬಳಿ ಆರಂಭವಾಗಿ ಮೇಖ್ರಿ ಸರ್ಕಲ್ವರೆಗೆ ಸಾಗಲಿದೆ. ಮೇಖ್ರಿ ಸರ್ಕಲ್ ಬಳಿ 'ಎಲಿವೇಟೆಡ್ ರೋಟರಿ ಜಂಕ್ಷನ್' ನಿರ್ಮಿಸಲು ಯೋಜಿಸಲಾಗಿದೆ. ಇಳಿಕೆಗೆ ಎರಡು ರ್ಯಾಂಪ್ಗಳು: ಮೇಖ್ರಿ ಸರ್ಕಲ್ನಿಂದ ಎರಡು ಕಡೆಗಳಿಗೆ ಇಳಿಯಲು ರ್ಯಾಂಪ್ ವ್ಯವಸ್ಥೆ ಇರಲಿದೆ. ಒಂದು ಸಿ.ವಿ. ರಾಮನ್ ರಸ್ತೆಯ ಮೂಲಕ ಯಶವಂತಪುರ ಕಡೆಗೆ, ಮತ್ತೊಂದು ಜಯಮಹಲ್ ಕಡೆಗೆ ಸಂಪರ್ಕ ಕಲ್ಪಿಸಲಿದೆ.18 ತಿಂಗಳಲ್ಲಿ ಕಾಮಗಾರಿ ಪೂರ್ಣ
ಯೋಜನೆಯ ಬಗ್ಗೆ ಮಾಹಿತಿ ನೀಡಿದ ಬಿಡಿಎ ಸಹಾಯಕ ಇಂಜಿನಿಯರ್ ರಂಜನ್ ಎಂ, "ಈ ಯೋಜನೆಯನ್ನು 18 ತಿಂಗಳ ಅವಧಿಯಲ್ಲಿ ಪೂರ್ಣಗೊಳಿಸುವ ಗುರಿ ಹೊಂದಲಾಗಿದೆ. ರಾಮನ್ ರಿಸರ್ಚ್ ಇನ್ಸ್ಟಿಟ್ಯೂಟ್ ಬಳಿ ಸಂಚಾರ ದಟ್ಟಣೆ ಉಂಟಾಗಬಾರದು ಎಂಬ ಉದ್ದೇಶದಿಂದ ಯಶವಂತಪುರ ಕಡೆಗೆ ಇಳಿಯುವ ರ್ಯಾಂಪ್ನ ಉದ್ದವನ್ನು ಹೆಚ್ಚಿಸುವಂತೆ ವಿನ್ಯಾಸದಲ್ಲಿ ಬದಲಾವಣೆ ಮಾಡಲಾಗಿದೆ," ಎಂದು ತಿಳಿಸಿದ್ದಾರೆ.ಭೂಸ್ವಾಧೀನದ ಅವಶ್ಯಕತೆಯಿಲ್ಲ
ಸವಾಲುಗಳು ಮತ್ತು ವಿಶೇಷತೆ
ಈ ಮಾರ್ಗದಲ್ಲಿ ಈಗಾಗಲೇ ಎರಡು ಗ್ರೇಡ್ ಸಪರೇಟರ್ಗಳಿವೆ. ಇದರ ಜೊತೆಗೆ ಹೆಬ್ಬಾಳದಿಂದ ಬರುವ ಸುರಂಗ ಮಾರ್ಗವೂ ಇಲ್ಲಿಗೆ ಸೇರಲಿದೆ. ಅಲ್ಲದೆ, ಕೇಂದ್ರ ಸರ್ಕಾರದ ಅನುಮೋದನೆಗೆ ಕಾಯುತ್ತಿರುವ ನಮ್ಮ ಮೆಟ್ರೋದ ಕೆಂಪು ಲೈನ್ (ಹೆಬ್ಬಾಳ-ಸರ್ಜಾಪುರ) ಕೂಡ ಇದೇ ಮಾರ್ಗದಲ್ಲಿ ಹಾದುಹೋಗುವ ಸಾಧ್ಯತೆಯಿದೆ. ಇವೆಲ್ಲವನ್ನೂ ಗಮನದಲ್ಲಿಟ್ಟುಕೊಂಡು ಯೋಜನೆಯನ್ನು ರೂಪಿಸಲಾಗಿದೆ.ಯೋಜನೆಯ ಪ್ರಮುಖ ಅಂಶಗಳು
- ಒಟ್ಟು ವೆಚ್ಚ: ಅಂದಾಜು 419.7 ಕೋಟಿ ರೂ. (ಜಿಎಸ್ಟಿ ಹೊರತುಪಡಿಸಿ).
- ಪಥಗಳು: ನಾಲ್ಕು ಪಥದ ರಸ್ತೆ.
- ರಸ್ತೆ ಸಂಪರ್ಕ: ಹೆಬ್ಬಾಳ ಮತ್ತು ಮೇಖ್ರಿ ಸರ್ಕಲ್ ನಡುವೆ ಸುಗಮ ಸಂಚಾರಕ್ಕೆ ಅನುವು.
- ಪ್ರಮುಖ ಬದಲಾವಣೆ: ಉದ್ದೇಶಿತ ಸುರಂಗ ಮಾರ್ಗದ ಅಂತ್ಯದಿಂದ ಈ ಫ್ಲೈಓವರ್ ಆರಂಭವಾಗಲಿದೆ.
- ಪರಿಣಾಮ: ಮೇಖ್ರಿ ಸರ್ಕಲ್ನಲ್ಲಿ ವಾಹನ ಸವಾರರು ಎದುರಿಸುತ್ತಿರುವ ಟ್ರಾಫಿಕ್ ಕಷ್ಟಕ್ಕೆ ದೊಡ್ಡ ಮಟ್ಟದ ಪರಿಹಾರ ಸಿಗಲಿದೆ.