ಬೆಂಗಳೂರು: ವಾಹನ ಸಂಚಾರ ದಟ್ಟಣೆ ತಗ್ಗಿಸುವ ನಿಟ್ಟಿನಲ್ಲಿ ಬಿಡಿಎ ಕೈಗೊಂಡಿರುವ ಬೆಂಗಳೂರು ಬಿಸಿನೆಸ್ ಕಾರಿಡಾರ್ ಯೋಜನೆಯಲ್ಲಿ ಹೊಸ ಸೇರ್ಪಡೆಯನ್ನು ಮಾಡಲಾಗಿದೆ. ಮೊದಲ ಪ್ಯಾಕೇಜ್ನಲ್ಲಿ ನಿರ್ಮಾಣವಾಗುತ್ತಿರುವ 19.8 ಕಿ.ಮೀ ರಸ್ತೆಯಲ್ಲಿ ಮೂರು ಹೆಚ್ಚುವರಿ ಇಂಟರ್ಚೇಂಜ್ಗಳು, ಹೊಸ ಮೇಲ್ಸೇತುವೆಗಳನ್ನು ನಿರ್ಮಾಣ ಮಾಡಲು ನಿರ್ಧರಿಸಲಾಗಿದೆ.
ಈ ಕಾರಿಡಾರ್ನ ಮೊದಲ ಮೊದಲ ಹಂತದ ಪ್ಯಾಕೇಜ್ಗಾಗಿ ಬಿಬಿಸಿಎಲ್ ಸುಮಾರು ₹3,100 ಕೋಟಿ ಹಾಗೂ 10 ವರ್ಷಗಳ ನಿರ್ವಹಣೆಗಾಗಿ ₹248 ಕೋಟಿ ಮೊತ್ತದ ಟೆಂಡರ್ ಆಹ್ವಾನಿಸಿದೆ. 2023 - 24 ರ ಅಂದಾಜು ವೆಚ್ಚಕ್ಕೆ ಹೋಲಿಸಿದರೆ ಇದು ದುಬಾರಿ ಎನಿಸಿದರೂ, ಈ ಏರಿಕೆಯು ಕೇವಲ ಹಣದುಬ್ಬರದಿಂದ ಆಗಿದ್ದಲ್ಲ. ಬದಲಾಗಿ, ಬಿಬಿಸಿ ಯೋಜನೆಯ ಹೊಸ ವಿನ್ಯಾಸವು ಹೆಚ್ಚು ವಿಸ್ತಾರವಾಗಿದ್ದು, ಭವಿಷ್ಯದ ಅಗತ್ಯಗಳನ್ನು ಗಮನದಲ್ಲಿಟ್ಟುಕೊಂಡು ರೂಪಿಸಲಾಗಿದೆ ಎಂದು ಬೆಂಗಳೂರು ಬಿಸಿನೆಸ್ ಕಾರಿಡಾರ್ ಯೋಜನೆ ಅಧಿಕಾರಿಗಳು ತಿಳಿಸಿದ್ದಾರೆ.
ರಸ್ತೆ ವಿನ್ಯಾಸದಲ್ಲಿನ ಸುಧಾರಣೆ, ವಿಸ್ತರಣೆ
3 ಹೆಚ್ಚುವರಿ ಇಂಟರ್ಚೇಂಜ್ಗಳು ಎಲ್ಲೆಲ್ಲಿ?
ಮೊದಲು ಮಾದಾವರ, ಬಳ್ಳಾರಿ ರಸ್ತೆ, ಹಳೆ ಮದ್ರಾಸ್ ರಸ್ತೆ ಮತ್ತು ಹೊಸೂರು ರಸ್ತೆಗಳಲ್ಲಿ ಮಾತ್ರ ಇಂಟರ್ಚೇಂಜ್ಗಳನ್ನು ಯೋಜಿಸಲಾಗಿತ್ತು. ಈಗ ಪರಿಷ್ಕೃತ ವಿನ್ಯಾಸದಂತೆ ದೊಡ್ಡಬಳ್ಳಾಪುರ ರಸ್ತೆ, ಹೆಣ್ಣೂರು ರಸ್ತೆ, ವೈಟ್ಫೀಲ್ಡ್ ಮತ್ತು ಸರ್ಜಾಪುರ ರಸ್ತೆಗಳಲ್ಲೂ ಪ್ರಮುಖ ಇಂಟರ್ಚೇಂಜ್ಗಳನ್ನು ಸೇರಿಸಲಾಗಿದೆ.ಇತರೆ ಇಂಟರ್ಚೇಂಜ್ಗಳು ಎಲ್ಲೆಲ್ಲಿ?
- ಹೊಸೂರು ರಸ್ತೆ ಜಂಕ್ಷನ್ (ಎಲೆಕ್ಟ್ರಾನಿಕ್ ಸಿಟಿ ಪಾಯಿಂಟ್)
- ಸರ್ಜಾಪುರ
- ಗುಂಜೂರು
- ವೈಟ್ಫೈಲ್ಡ್
- ಹಳೆ ಮದ್ರಾಸ್ ರಸ್ತೆ
- ಹೆಣ್ಣೂರು ರಸ್ತೆ
- ಬಳ್ಳಾರಿ ರಸ್ತೆ
- ದೊಡ್ಡಬಳ್ಳಾಪುರ ರಸ್ತೆ
- ಹೆಸರಘಟ್ಟ
- ಮಾದಾವರ
- ಮಾದನಾಯಕನ ಹಳ್ಳಿ
ಏನಿದು ಇಂಟರ್ಚೇಂಜ್?
ಎರಡು ಅಥವಾ ಹೆಚ್ಚು ರಸ್ತೆಗಳು ಛೇದಿಸುವ ಸ್ಥಳವನ್ನು ಇಂಟರ್ಚೇಂಜ್ಗಳು ಎಂದು ಕರೆಯಲಾಗುತ್ತದೆ. ಅಲ್ಲಿ ಸಂಚಾರವನ್ನು ಸುಗಮಗೊಳಿಸಲು ಮತ್ತು ಸುರಕ್ಷತೆಯನ್ನು ಸುಧಾರಿಸಲು ರಸ್ತೆಗಳನ್ನು ವಿಭಿನ್ನ ಹಂತಗಳಲ್ಲಿ ನಿರ್ಮಿಸಲಾಗುತ್ತದೆ.ಇಂಟರ್ಚೇಂಜ್ಗಳು ಸಾಮಾನ್ಯವಾಗಿ ಫ್ಲೈಓವರ್ಗಳು, ಅಂಡರ್ಪಾಸ್ಗಳು ಮತ್ತು ರಾಂಪ್ಗಳನ್ನು ಬಳಸುತ್ತವೆ, ವಾಹನಗಳು ಒಂದು ರಸ್ತೆಯಿಂದ ಇನ್ನೊಂದಕ್ಕೆ ನೇರವಾಗಿ ತಿರುವುಗಳಿಲ್ಲದೆ ಅಥವಾ ಸಂಚಾರ ದೀಪಗಳಿಲ್ಲದೆ ಚಲಿಸಲು ಅನುವು ಮಾಡಿಕೊಡುತ್ತದೆ.
3 ಕಿ ಮೀ ಉದ್ದದ ಹೊಸ ಫ್ಲೈಓವರ್
ಹೆಸರಘಟ್ಟ ರಸ್ತೆ ಮತ್ತು ಚನ್ನಸಂದ್ರದಲ್ಲಿ ಹೊಸ ಗ್ರೇಡ್ ಸೆಪರೇಟರ್ಗಳನ್ನು ಅಳವಡಿಸಲಾಗಿದೆ. ಅವಲಹಳ್ಳಿ ಅರಣ್ಯ ಮತ್ತು ಐವಿಆರ್ಐ ಕ್ಯಾಂಪಸ್ ವ್ಯಾಪ್ತಿಯಲ್ಲಿ ಫ್ಲೈಓವರ್ಗಳನ್ನು ವಿಸ್ತರಿಸಲಾಗಿದ್ದು, ಹುಸ್ಕೂರಿನಿಂದ ಎಲೆಕ್ಟ್ರಾನಿಕ್ ಸಿಟಿವರೆಗೆ 3 ಕಿ.ಮೀ ಉದ್ದದ ಹೊಸ ಫ್ಲೈಓವರ್ ನಿರ್ಮಿಸಲಾಗುತ್ತಿದೆ. ಮಾದಾವರ ಇಂಟರ್ಚೇಂಜ್ ಅನ್ನು ನೈಸ್ ರಸ್ತೆಯೊಂದಿಗೆ ಸುಗಮವಾಗಿ ಬೆಸೆಯಲು ಅದರ ವಿನ್ಯಾಸವನ್ನು ಮತ್ತಷ್ಟು ಮೇಲ್ದರ್ಜೆಗೇರಿಸಲಾಗಿದೆ. ಬೆಂಗಳೂರಿಗೆ ಸಮಗ್ರ, ಸುಸಜ್ಜಿತ ಮತ್ತು ದೂರದೃಷ್ಟಿಯುಳ್ಳ ರಿಂಗ್ ರೋಡ್ ಒದಗಿಸುವುದೇ ನಮ್ಮ ಗುರಿಯಾಗಿದೆ ಎಂದು ಬಿಬಿಸಿ ಟ್ವೀಟ್ ಮೂಲಕ ಮಾಹಿತಿ ನೀಡಿದೆ.ಏನಿದು ಬಿಸಿನೆಸ್ ಕಾರಿಡಾರ್? ಎಲ್ಲಿಂದ ಎಲ್ಲಿಗೆ ಸಂಪರ್ಕ?
ಬೆಂಗಳೂರು ಬಿಸಿನೆಸ್ ಕಾರಿಡಾರ್ ಈ ಹಿಂದೆ ಇದನ್ನು ಪೆರಿಫೆರಲ್ ರಿಂಗ್ ರೋಡ್ ಎಂದು ಕರೆಯಲಾಗುತ್ತಿತ್ತು. ಇದು ಬೆಂಗಳೂರಿನ ಸಂಚಾರ ದಟ್ಟಣೆಯನ್ನು ಕಡಿಮೆ ಮಾಡಲು ಮತ್ತು ನಗರದ ಹೊರವಲಯದಲ್ಲಿ ಉತ್ತಮ ಸಂಪರ್ಕ ಕಲ್ಪಿಸಲು ರೂಪಿಸಲಾದ ಒಂದು ಬೃಹತ್ ಮೂಲಸೌಕರ್ಯ ಯೋಜನೆಯಾಗಿದೆ. ಬೆಂಗಳೂರಿನ ಹೊರವಲಯದಲ್ಲಿ ಅರ್ಧವೃತ್ತಾಕಾರದ ರಸ್ತೆಯನ್ನು ನಿರ್ಮಿಸಿ, ನಗರದ ಪ್ರಮುಖ ರಾಷ್ಟ್ರೀಯ ಹೆದ್ದಾರಿಗಳನ್ನು ಪರಸ್ಪರ ಸಂಪರ್ಕಿಸುವುದು ಇದರ ಮುಖ್ಯ ಉದ್ದೇಶ. ಇದು ತುಮಕೂರು ರಸ್ತೆಯಿಂದ (ಬಿಐಇಸಿ ಬಳಿ) ಪ್ರಾರಂಭವಾಗಿ ಹೊಸೂರು ರಸ್ತೆಯವರೆಗೆ ಸಾಗುತ್ತದೆ.- ಪ್ಯಾಕೇಜ್-1 ನೆಲಮಂಗಲದ ಬಳಿಯ ತುಮಕೂರು ರಸ್ತೆಯನ್ನು ಏರ್ಪೋರ್ಟ್ ರಸ್ತೆಗೆ ನೇರವಾಗಿ ಸಂಪರ್ಕಿಸುತ್ತದೆ. ಇದು ಪೂರ್ಣಗೊಂಡ ಕೂಡಲೇ ಸ್ವತಂತ್ರವಾಗಿ ಸಂಚಾರ ದಟ್ಟಣೆಯನ್ನು ಕಡಿಮೆ ಮಾಡಲು ನೆರವಾಗುತ್ತದೆ.
- ಪ್ಯಾಕೇಜ್-2 ಇದು ಪೂರ್ಣಗೊಂಡಾಗ ಏರ್ಪೋರ್ಟ್ ರಸ್ತೆಯಿಂದ ವೈಟ್ಫೀಲ್ಡ್ ಜಂಕ್ಷನ್ವರೆಗೆ ಸಂಪರ್ಕ ದೊರೆಯುತ್ತದೆ. ಇದರಿಂದ ತುಮಕೂರು ರಸ್ತೆಯಿಂದ ಹಳೆ ಮದ್ರಾಸ್ ರಸ್ತೆ ಮತ್ತು ವೈಟ್ಫೀಲ್ಡ್ ಭಾಗಕ್ಕೆ ಸುಗಮ ಹಾದಿ ನಿರ್ಮಾಣವಾಗುತ್ತದೆ.
ಯೋಜನೆ ಪ್ರಮುಖ ಅಂಶಗಳು
- ಒಟ್ಟು ಉದ್ದ: ಸುಮಾರು 73 ಕಿಲೋಮೀಟರ್
- ರಸ್ತೆಯ ಅಗಲ: ಇದು 100 ಮೀಟರ್ ಅಗಲದ ರಸ್ತೆಯಾಗಿದ್ದು, 8 ಪಥದ ಮುಖ್ಯ ರಸ್ತೆ ಮತ್ತು ಎರಡೂ ಬದಿಗಳಲ್ಲಿ ಸರ್ವಿಸ್ ರಸ್ತೆಗಳನ್ನು ಒಳಗೊಂಡಿರುತ್ತದೆ.
- ಅಂದಾಜು ವೆಚ್ಚ: ಸುಮಾರು 27 ಸಾವಿರ ಕೋಟಿ ರೂಪಾಯಿಗಳು (ಇದರಲ್ಲಿ ಭೂಸ್ವಾಧೀನ ಪ್ರಕ್ರಿಯೆಗೆ ಹೆಚ್ಚಿನ ಮೊತ್ತ ವ್ಯಯವಾಗಲಿದೆ).
- ಸಂಪರ್ಕಿಸುವ ಪ್ರಮುಖ ಪ್ರದೇಶಗಳು: ಈ ಕಾರಿಡಾರ್ ಬೆಂಗಳೂರಿನ ಉತ್ತರ ಮತ್ತು ಪೂರ್ವ ಭಾಗಗಳನ್ನು ಹಾದುಹೋಗುತ್ತದೆ, ತುಮಕೂರು ರಸ್ತೆ (ಎನ್ಎಚ್-48), ಬಳ್ಳಾರಿ ರಸ್ತೆ (ಎನ್ಎಚ್-44 - ವಿಮಾನ ನಿಲ್ದಾಣ ರಸ್ತೆ), ಹಳೇ ಮದ್ರಾಸ್ ರಸ್ತೆ (ಎನ್ಎಚ್-75), ಹೊಸೂರು ರಸ್ತೆ (ಎನ್ಎಚ್-44)