ತಮಿಳು ನಟ ದಳಪತಿ ವಿಜಯ್ ಇದೀಗ ತಮಿಳುನಾಡಿನ ರಾಜಕೀಯ ಇತಿಹಾಸದಲ್ಲೇ ಹೊಸ ಅಧ್ಯಾಯ ಬರೆದಿದ್ದಾರೆ. ತಮ್ಮ ಅಪಾರ ಅಭಿಮಾನಿ ಬಳಗ ಮತ್ತು ಅಸಾಮಾನ್ಯ ಸ್ಟಾರ್‌ಡಮ್‌ ಅನ್ನು ರಾಜಕೀಯ ಶಕ್ತಿಯಾಗಿ ವಿಜಯ್ ಪರಿವರ್ತಿಸಿಕೊಂಡಿದ್ದಾರೆ. ತಮಿಳುನಾಡು ವಿಧಾನಸಭೆ ಚುನಾವಣೆಯಲ್ಲಿ ಭರ್ಜರಿ ಗೆಲುವು ಸಾಧಿಸಿರುವ ಟಿವಿಕೆ ಪಕ್ಷದ ನೇತಾರ ವಿಜಯ್ ಮುಖ್ಯಮಂತ್ರಿ ಪಟ್ಟಕ್ಕೇರಲು ಸಜ್ಜಾಗಿದ್ದಾರೆ.

ಆದರೆ ಇದೇ ಸಂಭ್ರಮದ ಕ್ಷಣದಲ್ಲಿ, ಅವರ ಸಿನಿ ಬದುಕಿನ ಪ್ರಮುಖ ಮಾರ್ಗದರ್ಶಕರಲ್ಲಿ ಒಬ್ಬರಾದ ಖ್ಯಾತ ನಿರ್ಮಾಪಕ ಆರ್ ಬಿ ಚೌಧರಿ ಅಗಲಿರುವುದು ವಿಜಯ್ ಅವರಿಗೆ ದೊಡ್ಡ ಆಘಾತ ತಂದಿದೆ.

ರಾಜಸ್ಥಾನದಲ್ಲಿ ಸಂಭವಿಸಿದ ಭೀಕರ ರಸ್ತೆ ಅಪಘಾತದಲ್ಲಿ ಖ್ಯಾತ ನಿರ್ಮಾಪಕ ಆರ್ ಬಿ ಚೌಧರಿ ಮೃತಪಟ್ಟಿದ್ದಾರೆ. ಸುದ್ದಿ ತಿಳಿಯುತ್ತಿದ್ದಂತೆಯೇ ರಾಜಕೀಯ ಕಾರ್ಯಕ್ರಮಗಳ ಬಿಜಿ ಶೆಡ್ಯೂಲ್ ಮಧ್ಯೆಯೂ ಸಮಯ ಮಾಡಿಕೊಂಡ ವಿಜಯ್, ಆರ್‌ ಬಿ ಚೌಧರಿ ಅವರ ಅಂತಿಮ ದರ್ಶನ ಪಡೆದರು. ತಮಗೆ ಹಲವು ಸೂಪರ್ ಹಿಟ್ ಸಿನಿಮಾಗಳನ್ನ ನಿರ್ಮಿಸಿದ ಆರ್‌ ಬಿ ಚೌಧರಿ ಅವರಿಗೆ ವಿಜಯ್ ಅಂತಿಮ ನಮನ ಸಲ್ಲಿಸಿದರು. ಇದೇ ವೇಳೆ ತಮ್ಮ ಆತ್ಮೀಯ ಗೆಳೆಯ ನಟ ಜೀವಾ (ಆರ್‌ ಬಿ ಚೌಧರಿ ಪುತ್ರ) ಅವರನ್ನು ಅಪ್ಪಿಕೊಂಡು ಸಾಂತ್ವನ ಹೇಳಿದರು. 'ನನ್ಬನ್‌' ಸಿನಿಮಾದಲ್ಲಿ ನಟ ವಿಜಯ್ ಹಾಗೂ ಜೀವಾ ಒಟ್ಟಿಗೆ ನಟಿಸಿದ್ದರು. ಅಂದಿನಿಂದ ಇಬ್ಬರ ಮಧ್ಯೆ ಸ್ನೇಹ ಬಾಂಧವ್ಯ ಗಟ್ಟಿಯಾಗಿದೆ.