ಗದಗ: ಮುಖ್ಯಮಂತ್ರಿಯಾಗಿ ಅಧಿಕಾರದಲ್ಲಿ ಮುಂದುವರಿಯಲು ಡಿಕೆ ಶಿವಕುಮಾರ್ ಅವರಿಗೆ ಸಾಕಷ್ಟು ಅಡೆತಡೆಗಳು ಎದುರಾಗಲಿದೆ. ಸಿಎಂ ಪಟ್ಟದಲ್ಲಿ ಇರಬೇಕಾದರೆ, ಇಂತಹ ಸಮಸ್ಯೆಗಳನ್ನು ಎದುರಿಸಬೇಕಾಗುತ್ತದೆ ಎಂದು ನೊಣವಿನಕೆರೆ ಮಠದ ಶ್ರೀಗಳುಭವಿಷ್ಯವನ್ನು ನುಡಿದಿದ್ದಾರೆ.
ಶ್ರೀಗಳ ಭವಿಷ್ಯ, ರಾಜ್ಯ ರಾಜಕೀಯದಲ್ಲಿ ಚರ್ಚೆಯ ವಿಷಯವಾಗಿದೆ.
ಲಕ್ಷ್ಮೇಶ್ವರದ ಮುಕ್ತಿಮಂದಿರದಲ್ಲಿ ಮಾತನಾಡುತ್ತಿದ್ದ ಶ್ರೀಗಳು, ಮುಂದಿನ 8-10ವರ್ಷಕ್ಕೆ ಡಿಕೆ ಶಿವಕುಮಾರ್ ಅವರೇ ಮುಖ್ಯಮಂತ್ರಿಯಾಗಿ ಮುಂದುವರಿಯಲಿದ್ದಾರೆ ಎಂದು ಹೇಳಿದ್ದಾರೆ. ಡಿಕೆಶಿ, ಬಹಳ ನಂಬುವ ಧಾರ್ಮಿಕ ಪೀಠಗಳಲ್ಲಿ ನೊಣವಿನಕೆರೆ ಮಠಕೂಡಾ ಒಂದು. ಸಿಎಂ ಆಗಿ ಅಧಿಕಾರ ಸ್ವೀಕರಿಸುವ ಮುನ್ನ, ಇವರು ಇಲ್ಲಿಗೆ ಭೇಟಿ ನೀಡಿ, ಗದ್ದುಗೆ ದರ್ಶನವನ್ನು ಪಡೆದಿದ್ದರು.
ಧರ್ಮದಂಡವನ್ನು ಡಿಕೆ ಶಿವಕುಮಾರ್ ಅವರಿಗೆ ನೀಡಿದ್ದೇವೆ
ಡಿಕೆ ಶಿವಕುಮಾರ್ ಅವರು ಮುಂದಿನ ಹತ್ತು ವರ್ಷ ಸಿಎಂ ಆಗಿ ಮುಂದುವರಿಯಬೇಕು ಎಂದು ನೊಣವಿನಕೆರೆ ಮಠದ ಶ್ರೀಗಳು ವಿಶೇಷ ಪೂಜೆಯನ್ನು ಸಲ್ಲಿಸಿದ್ದರು. "ರಾಜಾ ಪ್ರತ್ಯಕ್ಷ ದೇವತಃ, 2028ರ ನಂತರವೂ, ಎಂಟು ವರ್ಷ ಅವರೇ ಮುಖ್ಯಮಂತ್ರಿ ಆಗಿರಬೇಕು ಎಂದು ನಾವು ಸಂಕಲ್ಪವನ್ನು ಮಾಡಿದ್ದೇವೆ. ನಮ್ಮ ಗುರುಗಳು ಮಾನವ ಧರ್ಮಕ್ಕೆ ಜಯವಾಗಲಿ ಎಂದು ಹೇಳಿದ್ದಾರೆ. ಧರ್ಮದಂಡವನ್ನು ನಾವು ಡಿಕೆ ಶಿವಕುಮಾರ್ ಅವರ ಕೈಗೆ ಕೊಟ್ಟು ಆಶೀರ್ವಾದ ಮಾಡಿದ್ದೇವೆ. ಅವರು ಜಯಶೀಲರಾಗುತ್ತಾರೆ" ಎಂದು ಶ್ರೀಗಳು ಹೇಳಿದ್ದಾರೆ.ಡಿಕೆ ಶಿವಕುಮಾರ್ ಅವರು ಅಡೆತಡೆಗಳನ್ನು ಎದುರಿಸಬೇಕಾಗುತ್ತದೆ, ಆದರೆ ಅವರ ಎಲ್ಲಾ ಸಂಕಷ್ಟಕ್ಕೆ ನಾವಿದ್ದೇವೆ, ನಾವು ಅವರಿಗಾಗಿ ಸ್ಮರಣೆಯನ್ನು ಮಾಡುತ್ತೇವೆ. ನಮ್ಮ ರಕ್ಷಾ ಕವಚ ಅವರನ್ನು ಕಾಪಾಡುತ್ತದೆ. ಮುಂದಿನ ಎಂಟು ಹತ್ತು ವರ್ಷ, ರಾಜ್ಯವನ್ನು ಮುನ್ನಡೆಸಿಕೊಂಡು ಹೋಗುತ್ತಾರೆ. ಇದರಲ್ಲಿ ಯಾವುದೇ ಅನುಮಾನವಿಲ್ಲ ಎಂದು ನೊಣವಿನಕೆರೆ ಮಠದ ಶ್ರೀಗಳು ಭವಿಷ್ಯವನ್ನು ನುಡಿದಿದ್ದಾರೆ.
ಧರ್ಮದಿಂದಲೇ ವಿಶ್ವಶಾಂತಿ, ಎಲ್ಲವೂ ಒಳಿತಾಗಲಿದೆ - ನೊಣವಿನಕೆರೆ ಶ್ರೀಗಳು
ಡಿಕೆಶಿವಕುಮಾರ್ ಅವರಿಗೆ ಏನೇ ಸಮಸ್ಯೆ ಎದುರಾದರೂ, ಅದನ್ನು ಮೆಟ್ಟಿ ನಿಂತು ಕೆಲಸ ಮಾಡುವ ಶಕ್ತಿ ಅಜ್ಜಯ್ಯ ನೀಡುತ್ತಾನೆ. ಈಗಿನ ಪ್ರಕೃತಿ ಧರ್ಮದಲ್ಲಿ ಮಳೆಬೆಳೆ ಬರುವುದು ನಿಧಾನವಿದೆ. ಸಮಯಕ್ಕೆ ತಕ್ಕಂತೆ ಮಳೆ ಆಗುತ್ತದೆ. ಅದೇ ರೀತಿ ಡಿಕೆ ಶಿವಕುಮಾರ್ ಅವರಿಗೂ ಅಡೆತಡೆಗಳಿವೆ. ಉತ್ತಮವಾದ ಆಳ್ವಿಕೆ ಎಂದ ಮೇಲೆ ಇದನ್ನೆಲ್ಲಾ ಎದುರಿಸಬೇಕಾಗುತ್ತದೆ. ಧರ್ಮದಿಂದಲೇ ವಿಶ್ವಶಾಂತಿ. ಎಲ್ಲವೂ ಮಂಗಳವಾಗಲಿದೆ ಎಂದು ನೊಣವಿನಕೆರೆ ಶ್ರೀಗಳು ಭವಿಷ್ಯವನ್ನು ನುಡಿದಿದ್ದಾರೆ.ನೊಣವಿನಕೆರೆ ಕಾಡುಸಿದ್ದೇಶ್ವರ ಮಠದ ಪೀಠಾಧಿಪತಿ ಡಾ.ಕರಿವೃಷಭ ದೇಶಿಕೇಂದ್ರ ಶಿವಯೋಗೀಶ್ವರ ಸ್ವಾಮೀಜಿಯವರ ಆಶೀರ್ವಾದ ಪಡೆಯಲು ಡಿಕೆ ಶಿವಕುಮಾರ್ ಆಗಮಿಸಿದ್ದರು. ಮಠದ ಭಕ್ತರಾಗಿರುವ ಸಿಎಂ ಡಿಕೆ ಶಿವಕುಮಾರ್, ಏನೇ ಪ್ರಮುಖ ಕೆಲಸಕ್ಕೆ ಮುನ್ನ ಗದ್ದುಗೆಯ ದರ್ಶನವನ್ನು ಪಡೆಯುತ್ತಾರೆ.
ಇತ್ತೀಚೆಗೆ ವಿಧಾನ ಮಂಡಲದ ಅಧಿವೇಶನದಲ್ಲೂ, 2028ರ ಚುನಾವಣೆಯನ್ನು ನಾವೇ ಗೆಲ್ಲುವುದು ಎಂದು ಡಿಕೆಶಿ ವಿಶ್ವಾಸದಿಂದ ಹೇಳಿದ್ದರು. ಆದರೆ, ಮುಖ್ಯಮಂತ್ರಿಯಾಗಿ ಅವರೇ ಮುಂದುವರಿಯಲಿದ್ದಾರಾ ಎನ್ನುವುದರ ಬಗ್ಗೆ ಪ್ರಸ್ತಾವಿಸಿರಲಿಲ್ಲ. ಈಗ, ನೊಣವಿನಕೆರೆ ಕಾಡುಸಿದ್ದೇಶ್ವರ ಮಠದ ಹಾಲೀ ಪೀಠಾಧಿಪತಿಗಳು, ಡಿಕೆಶಿಯವರೇ ಮುಂದಿನ ಹತ್ತು ವರ್ಷ ಸಿಎಂ ಆಗಿರುತ್ತಾರೆ ಎಂದು ಭವಿಷ್ಯವನ್ನು ನುಡಿದಿದ್ದಾರೆ.