ಬೆಂಗಳೂರು: ಎಲೆಕ್ಟ್ರಾನಿಕ್ ಸಿಟಿ ಸಂಪರ್ಕಿಸುವ ಆರ್.ವಿ. ರಸ್ತೆ- ಬೊಮ್ಮಸಂದ್ರ ನಡುವಿನ ನಮ್ಮ ಮೆಟ್ರೊ ಹಳದಿ ಮಾರ್ಗದಲ್ಲಿ ಮೇ ತಿಂಗಳಿಂದ 5 ನಿಮಿಷಕ್ಕೊಂದು ರೈಲನ್ನು ಕಾರ್ಯಾಚರಣೆಗೊಳಿಸಲು ಬೆಂಗಳೂರು ಮೆಟ್ರೊ ರೈಲು ನಿಗಮ (BMRCL) ವು ಯೋಜನೆ ರೂಪಿಸಿದೆ. 2025ರ ಆಗಸ್ಟ್ 10ರಂದು ಪ್ರಧಾನಿ ನರೇಂದ್ರ ಮೋದಿ ಅವರು ಹಳದಿ ಮಾರ್ಗವನ್ನು ಉದ್ಘಾಟಿಸಿದರು.
ಸದ್ಯ 8 ರೈಲುಗಳು 9 ನಿಮಿಷಗಳ ಆವರ್ತನದಲ್ಲಿ (ನಾನ್ಪೀಕ್ ಅವರ್- 14 ನಿಮಿಷ) ಸಂಚರಿಸುತ್ತಿವೆ. ಪಶ್ಚಿಮ ಬಂಗಾಳ ಮೂಲದ ಟಿಟಾಗರ್ ರೈಲ್ ಸಿಸ್ಟಂ ಲಿಮಿಟೆಡ್ (TRSL) ಈ ತಿಂಗಳಲ್ಲೇ ಎರಡು ರೈಲುಗಳನ್ನು ಪೂರೈಸಲಿದೆ.
ಮೇ ವೇಳೆ ಸೇವೆಗೆ ಲಭ್ಯ
''ಇದೀಗ ಟಿಆರ್ಎಸ್ಎಲ್ ಶೀಘ್ರವೇ ಎರಡು ರೈಲುಗಳನ್ನು ಪೂರೈಸಲಿದೆ. ಆದರೆ, ಇವು ವಾಣಿಜ್ಯ ಕಾರ್ಯಾಚರಣೆಗೆ ಮುನ್ನ 750 ಕಿಲೋ ಮೀಟರ್ ಪ್ರಾಯೋಗಿಕ ಸಂಚಾರಕ್ಕೆ ಒಳಪಡಬೇಕಿದೆ. ರಾತ್ರಿ ವೇಳೆ ಈ ಸಂಚಾರ ನಡೆಸಬೇಕಾಗಿದೆ. ಹೀಗಾಗಿ ಬಹುತೇಕ ಮೇ ತಿಂಗಳಿಗೆ ಇವು ಸೇವೆಗೆ ಲಭ್ಯವಾಗಲಿವೆ,'' ಎಂದು ಬಿಎಂಆರ್ಸಿಎಲ್ ಅಧಿಕಾರಿಗಳು ತಿಳಿಸಿದರು. ''ಬಳಿಕ 1 ರೈಲನ್ನು ತುರ್ತು ಸಂದರ್ಭಕ್ಕೆ ಮೀಸಲಿಟ್ಟುಕೊಂಡು ಉಳಿದ 9 ರೈಲುಗಳನ್ನು ವಾಣಿಜ್ಯ ಕಾರ್ಯಾಚರಣೆಗೆ ಬಳಸಲಾಗುವುದು. ಬಳಿಕ 5 ನಿಮಿಷಕ್ಕೊಂದರಂತೆ ರೈಲುಗಳ ಸಂಚಾರ ಲಭ್ಯವಾಗಲಿದೆ,'' ಎಂದು ಹೇಳಿದರು.ಈ ಮೊದಲು ಚೀನಾದ ಸಿಆರ್ಆರ್ಸಿ ಜತೆಗೆ ರೈಲುಗಳ ಪೂರೈಕೆಗೆ ಬಿಎಂಆರ್ಸಿಎಲ್ ಒಪ್ಪಂದ ಮಾಡಿಕೊಂಡಿತ್ತು. ಬಳಿಕ ಮೇಕ್ ಇನ್ ಇಂಡಿಯಾ ನೀತಿಯಡಿ ಪಶ್ಚಿಮ ಬಂಗಾಳದ ಟಿಆರ್ಎಸ್ಎಲ್ನಿಂದ ತರಿಸಿಕೊಳ್ಳಬೇಕಾಯಿತು. ಆದರೆ, ಚೀನಾದಿಂದ ಪ್ರೊಟೋಟೈಪ್ ರೈಲು ಬರುವುದು, ಟಿಟಾಗರ್ನಿಂದ ರೈಲು ನಿರ್ಮಾಣ ಸೇರಿ ಒಟ್ಟಾರೆ 4 ವರ್ಷ ವಿಳಂಬವಾಗಿದೆ.
ಇನ್ನೂ 13 ರೈಲು ಬೇಕು
ಹಳದಿ ಮಾರ್ಗಕ್ಕೆ ಇನ್ನೂ 13 ರೈಲುಗಳು ಸೇರ್ಪಡೆ ಆಗಬೇಕಿದೆ. ಆ ಪೈಕಿ ಟಿಆರ್ಎಸ್ಎಲ್ 7 ಹಾಗೂ ಬಿಇಎಂಎಲ್ 6 ರೈಲುಗಳನ್ನು ಪೂರೈಸಬೇಕಿದೆ. ನೀಲಿ ಮಾರ್ಗದ ಹೊರವರ್ತುಲ ರಸ್ತೆಗೆ 16, ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಸಂಪರ್ಕಿಸಲು 21 ರೈಲನ್ನು ಪೂರೈಸಬೇಕಿರುವ ಬಿಇಎಂಎಲ್ ಜತೆಗೆ ಹೆಚ್ಚುವರಿಯಾಗಿ 6 ರೈಲು ಪೂರೈಸಲು ಬಿಎಂಆರ್ಸಿಎಲ್ ಕಳೆದ ವರ್ಷ 414 ಕೋಟಿ ರೂಪಾಯಿ ಮೊತ್ತದ ಒಪ್ಪಂದ ಮಾಡಿಕೊಂಡಿದೆ. ಈ ರೈಲುಗಳು ವರ್ಷಾಂತ್ಯದಿಂದ ಪೂರೈಕೆ ಆಗುವ ಸಾಧ್ಯತೆಯಿದೆ ಎಂದು ಮೂಲಗಳು ತಿಳಿಸಿವೆ.