ಹೊಸದಿಲ್ಲಿ: ಅಯೋಧ್ಯೆ ರಾಮಮಂದಿರ ದೇಣಿಗೆ ಅಕ್ರಮ ಬಗೆದಷ್ಟೂ ಹೊರಬರುತ್ತಿರುವ ಮಧ್ಯೆಯೇ, ಸಮಾಜವಾದಿ ಪಕ್ಷವು ಇದರಲ್ಲಿ ಸುಮಾರು 20 ಸಾವಿರ ಕೋಟಿ ರೂ. ಮೌಲ್ಯದ ಹಗರಣದ ನಡೆದಿದೆ ಎಂದು ಆರೋಪಿಸಿದೆ.
ಇಟಾವಾದಲ್ಲಿ ಸುದ್ದಿಗಾರರ ಜತೆ ಮಾತನಾಡಿದ ಸಮಾಜವಾದಿ ಪಕ್ಷದ ನಾಯಕ ರಾಮಗೋಪಾಲ್‌ ಯಾದವ್‌, ''ರಾಮಮಂದಿರಕ್ಕೆ ಭಕ್ತರು ಭಾರಿ ಪ್ರಮಾಣದಲ್ಲಿಚಿನ್ನ, ಬೆಳ್ಳಿ, ವಜ್ರ ಮತ್ತು ಇತರ ಅಮೂಲ್ಯ ಬೆಲೆಬಾಳುವ ವಸ್ತುಗಳನ್ನು ಕಾಣಿಕೆ ನೀಡಿದ್ದಾರೆ.
ಆದರೆ ಅವುಗಳು ಏನಾದವು ಎಂದು ಯಾರಿಗೂ ತಿಳಿದಿಲ್ಲ. ಇಲ್ಲಿಸುಮಾರು 20 ಸಾವಿರ ಕೋಟಿ ರೂ. ಮೌಲ್ಯದ ಹಗರಣ ನಡೆದಿದ್ದು, ಇದರಲ್ಲಿ ಪ್ರಭಾವಿಗಳು ಭಾಗಿಯಾಗಿದ್ದಾರೆ'' ಎಂದು ಆರೋಪಿಸಿದರು.
''ಭಕ್ತರು ದೇಣಿಗೆ ರೂಪದಲ್ಲಿನೀಡಿದ ಕೋಟ್ಯಂತರ ರೂಪಾಯಿ ಮೌಲ್ಯದ ಅಮೂಲ್ಯ ವಸ್ತುಗಳಿಗೆ ಯಾವುದೇ ಲೆಕ್ಕವಿಲ್ಲದಂತಾಗಿದೆ. ಈ ಅಕ್ರಮದಲ್ಲಿದೊಡ್ಡ ದೊಡ್ಡ ಕುಳಗಳು ಭಾಗಿಯಾಗಿದ್ದು, ಅವರೆಲ್ಲರ ವಿರುದ್ಧವೂ ವಿಶೇಷ ತನಿಖಾ ತಂಡ (ಎಸ್‌ಐಟಿ) ತನಿಖೆ ನಡೆಸಬೇಕು,'' ಎಂದು ರಾಮಗೋಪಾಲ್‌ ಯಾದವ್‌ ಒತ್ತಾಯಿಸಿದರು.
ದೇಣಿಗೆ ಲೂಟಿ ಪ್ರಕರಣ ಸಂಬಂಧ ಎಸ್‌ಐಟಿ ಈಗಾಗಲೇ ಅವಿನಾಶ್‌ ಶುಕ್ಲಾ, ಅನುಕಲ್ಪ್‌ ಮಿಶ್ರಾ ಸೇರಿದಂತೆ ಎಂಟು ಆರೋಪಿಗಳನ್ನು ಬಂಧಿಸಿದ್ದು, ಅವರ ಬ್ಯಾಂಕ್‌ ಖಾತೆಗಳ ವಹಿವಾಟುಗಳನ್ನು ಜಾಲಾಡುತ್ತಿದೆ.
ನೋಟಿಸ್‌ಗೆ ಸಿದ್ಧತೆ
ದೇಣಿಗೆ ಲೂಟಿ ಪ್ರಕರಣ ಸಂಬಂಧ ಶ್ರೀರಾಮ ಜನ್ಮಭೂಮಿ ತೀರ್ಥಕ್ಷೇತ್ರ ಟ್ರಸ್ಟ್‌ನ ಮಾಜಿ ಪ್ರಧಾನ ಕಾರ‍್ಯದರ್ಶಿ ಚಂಪತ್‌ ರಾಯ್‌, ಮಾಜಿ ಸದಸ್ಯ ಅನಿಲ್‌ ಮಿಶ್ರಾ ಅವರಿಗೆ ಟ್ರಸ್ಟ್‌ ಶೋಕಾಸ್‌ ನೋಟಿಸ್‌ ನೀಡಲು ಸಜ್ಜಾಗಿದೆ. ಜುಲೈ 6ರಂದು ಟ್ರಸ್ಟ್‌ ಮಹತ್ವದ ಸಭೆ ನಡೆಸಲಿರುವ ಹಿನ್ನೆಲೆಯಲ್ಲಿಇವರಿಬ್ಬರಿಗೂ ನೋಟಿಸ್‌ ನೀಡಲಿದೆ.ಕೇಳಿಬಂದಿರುವ ಆರೋಪಗಳ ಕುರಿತು ಲಿಖಿತ ವಿವರಣೆ ಕೋರಲಿದೆ ಎಂದು ಮೂಲಗಳು ಹೇಳಿವೆ. ಎಸ್‌ಐಟಿ ಗುರುವಾರ ಅಯೋಧ್ಯೆಗೆ ಭೇಟಿ ನೀಡಿ ಚಂಪತ್‌ ರಾಯ್‌, ಅನಿಲ್‌ ಮಿಶ್ರಾ ಹಾಗೂ ಮಂದಿರ ನಿರ್ಮಾಣ ಉಸ್ತುವಾರಿ ಗೋಪಾಲ್‌ ರಾವ್‌ ಅವರನ್ನು ಸುಮಾರು 4 ಗಂಟೆ ವಿಚಾರಣೆಗೊಳಪಡಿಸಿದ ನಂತರ ಟ್ರಸ್ಟ್‌ ನೋಟಿಸ್‌ ನೀಡಲು ನಿರ್ಧರಿಸಿದೆ.
ದೇಣಿಗೆ ಲೂಟಿ ಪ್ರಕರಣದ ಬಂಧಿತ 8 ಆರೋಪಿಗಳಲ್ಲಿಒಬ್ಬನಾದ ರಾಮಶಂಕರ್‌ ಅಲಿಯಾಸ್‌ ಟಿನ್ನು ಯಾದವ್‌ ರಾಮಮಂದಿರದ ಸೇವಕರು ಮತ್ತು ಉದ್ಯೋಗಿಗಳಿಂದ ಬಲವಂತದಿಂದ ಕಾಲು ಒತ್ತಿಸಿಕೊಳ್ಳುತ್ತಿದ್ದ. ಶ್ರೀರಾಮ ಜನ್ಮಭೂಮಿ ತೀರ್ಥಕ್ಷೇತ್ರ ಟ್ರಸ್ಟ್‌ ಮಾಜಿ ಪ್ರಧಾನ ಕಾರ‍್ಯದರ್ಶಿ ಚಂಪತ್‌ ರಾಯ್‌ ಆಪ್ತನಾದ ಟಿನ್ನು ಯಾದವ್‌ ಅಧಿಕಾರದ ಪ್ರಭಾವ ಬಳಸಿಕೊಂಡು ಸೇವಕರ ಮೇಲೆ ದರ್ಪ ತೋರುತ್ತಿದ್ದ ಎಂದು ಮಾಜಿ ಉದ್ಯೋಗಿಯೊಬ್ಬರು ಆರೋಪಿಸಿದ್ದಾರೆ.
ಮಂದಿರದಲ್ಲಿ18 ತಿಂಗಳು ಕೆಲಸ ಮಾಡಿದ್ದಾಗಿ ಹೇಳಿಕೊಂಡಿರುವ ಮಾಜಿ ಉದ್ಯೋಗಿಯು, ಟ್ರಸ್ಟ್‌ನ ಮಾಜಿ ಸದಸ್ಯ ಅನಿಲ್‌ ಮಿಶ್ರಾ ಮತ್ತು ನಿರ್ಮಾಣದ ಉಸ್ತುವಾರಿ ಗೋಪಾಲ್‌ ರಾವ್‌ ಅವರೇ ಮಂದಿರದ ಆವರಣದೊಳಗಿನ ವ್ಯವಹಾರಗಳನ್ನು ನಡೆಸುತ್ತಿದ್ದರು ಮತ್ತು ಉದ್ಯೋಗಿಗಳಿಗೆ ಕಿರುಕುಳ ನೀಡುತ್ತಿದ್ದರು ಎಂದು ದೂರಿದ್ದಾರೆ. ಈ ಕುರಿತು ಖಾಸಗಿ ಸುದ್ದಿಸಂಸ್ಥೆ ವರದಿ ಮಾಡಿದೆ. ಆದರೆ ಆರೋಪ ಮಾಡಿದ ಉದ್ಯೋಗಿಯ ಹೆಸರನ್ನು ವರದಿ ಬಹಿರಂಗಪಡಿಸಿಲ್ಲ.