Dailyhunt Logo
  • Light mode
    Follow system
    Dark mode
    • Play Story
    • App Story
Shivanna @ 40 Series: 'ವರದಣ್ಣನ ವ್ಯಕ್ತಿತ್ವದ ಪ್ರಭಾವ ಶಿವಣ್ಣನ ಮೇಲೆ ಬಹಳಷ್ಟಿದೆ' - ಟಿ ಎಸ್ ನಾಗಾಭರಣ ಸಂದರ್ಶನ

Shivanna @ 40 Series: 'ವರದಣ್ಣನ ವ್ಯಕ್ತಿತ್ವದ ಪ್ರಭಾವ ಶಿವಣ್ಣನ ಮೇಲೆ ಬಹಳಷ್ಟಿದೆ' - ಟಿ ಎಸ್ ನಾಗಾಭರಣ ಸಂದರ್ಶನ

Vijay Karnataka 4 months ago

ಹ್ಯಾಟ್ರಿಕ್ ಹೀರೋ ಶಿವರಾಜ್ ಕುಮಾರ್ ನಟನೆ ಆರಂಭಿಸಿ ಬರೋಬ್ಬರಿ 40 ವರ್ಷಗಳು ಕಳೆದಿವೆ. ಈ 40 ವರ್ಷಗಳಲ್ಲಿ 125ಕ್ಕೂ ಅಧಿಕ ಸಿನಿಮಾಗಳಲ್ಲಿ ಮಿಂಚಿರುವ ಖ್ಯಾತಿ ಕರುನಾಡ ಚಕ್ರವರ್ತಿ ಶಿವರಾಜ್ ಕುಮಾರ್ ಅವರದ್ದು.! ಶಿವಣ್ಣನ 40 ವರ್ಷಗಳ ಸಿನಿಯಾನವನ್ನ ಸಂಭ್ರಮಿಸಲು ನಿಮ್ಮ ವಿಜಯ ಕರ್ನಾಟಕ ವೆಬ್ 'ಶಿವಣ್ಣ @ 40' ಎಂಬ ಸಂದರ್ಶನಗಳ ವಿಡಿಯೋ ಸರಣಿ ಆರಂಭಿಸಿದೆ.

ಈ ಸರಣಿಯಲ್ಲಿ ಪ್ರತಿ ವಾರ ಶಿವಣ್ಣ ಜೊತೆ ಕೆಲಸ ಮಾಡಿರುವವರನ್ನ ಸಂದರ್ಶಿಸುತ್ತೇವೆ.

'ಶಿವಣ್ಣ @ 40' ವಿಡಿಯೋ ಸರಣಿಯಲ್ಲಿ ನಮಗೆ ಕನ್ನಡದ ಖ್ಯಾತ ನಿರ್ದೇಶಕ ಟಿ ಎಸ್‌ ನಾಗಾಭರಣ ಸಂದರ್ಶನ ನೀಡಿದ್ದಾರೆ. ಸೆಂಚುರಿ ಸ್ಟಾರ್ ಶಿವರಾಜ್‌ ಕುಮಾರ್‌ಗೆ 'ಜನುಮದ ಜೋಡಿ' ಅಂತಹ ಸೂಪರ್ ಡ್ಯೂಪರ್ ಹಿಟ್ ನೀಡಿದವರು ಟಿ ಎಸ್ ನಾಗಾಭರಣ. ಶಿವಣ್ಣನಿಗೆ 'ಜನುಮದಾತ' ಹಾಗೂ 'ಚಿಗುರಿದ ಕನಸು' ಅಂತಹ ಸದಭಿರುಚಿಯ ಸಿನಿಮಾಗಳನ್ನ ನೀಡಿದವರು ಟಿ ಎಸ್ ನಾಗಾಭರಣ. ಶಿವಣ್ಣನ ಬಗ್ಗೆ ಹಲವು ವಿಚಾರಗಳನ್ನ ಟಿ ಎಸ್ ನಾಗಾಭರಣ ವಿಜಯ ಕರ್ನಾಟಕ ವೆಬ್‌ ಜೊತೆ ಹಂಚಿಕೊಂಡಿದ್ದಾರೆ.
(ಸಂದರ್ಶನ: ಹರ್ಷಿತಾ ರಾಕೇಶ್)

*ನೀವು ಅಣ್ಣಾವ್ರಿಗೂ ನಿರ್ದೇಶನ ಮಾಡಿದ್ದೀರಾ.. ಅವರ ಮಗ ಶಿವಣ್ಣನಿಗೂ ಆಕ್ಷನ್ ಕಟ್ ಹೇಳಿದ್ದೀರಾ. ಇಂತಹ ಅಪರೂಪದ ಸಾಧನೆ ನಿಮ್ಮದು. ನೀವು ಕಂಡಂತೆ ಶಿವರಾಜ್ ಕುಮಾರ್ ಹೇಗೆ?
- ನಾನು ಅವರನ್ನು ಮೊದಲು ಕಂಡಾಗ, ಅವನು ಅಣ್ಣಾವ್ರ ಮಗ ಅನ್ನೋದಕ್ಕಿಂತ ಹೆಚ್ಚಾಗಿ ಒಬ್ಬ ಲವಲವಿಕೆಯ ವ್ಯಕ್ತಿತ್ವವುಳ್ಳ ಒಬ್ಬ ವ್ಯಕ್ತಿ ಅಂತ ನನಗೆ ಪರಿಚಯ ಆಗಿತ್ತು. ಆಗ ಇನ್ನೂ ಮದ್ರಾಸ್‌ನಲ್ಲಿ ಇದ್ದ. ನಾನು 'ಕಾಡು', 'ಚೋಮನ ದುಡಿ' ಎಡಿಟಿಂಗ್‌ನಲ್ಲಿದ್ದೆ. ಆ ಸಮಯದಲ್ಲಿ ನಾವು ಅಣ್ಣಾವ್ರನ್ನ ನೋಡಲು ಮನೆಗೆ ಹೋದರೆ, ಇವನ ಸ್ನೇಹಿತರ ದಂಡು ಅಲ್ಲಿರುತ್ತಿತ್ತು. ಅವನು (ಶಿವಣ್ಣ) ಒಂದು ಕ್ಷಣ ಇಲ್ಲಿದ್ದರೆ ಅಲ್ಲಿ ಇರಲ್ಲ, ಅಲ್ಲಿದ್ದರೆ ಇಲ್ಲಿ ಇರಲ್ಲ. ಆ ರೀತಿಯ ಒಂದು ಲವಲವಿಕೆಯ ವ್ಯಕ್ತಿತ್ವವನ್ನು ನಾನು ನೋಡಿದ್ದೇನೆ.

ಒಬ್ಬ ವರನಟನ ಮಗನಾಗಿ.. ತಾನು ಏನು ಅನ್ನೋದನ್ನು ಅರ್ಥ ಮಾಡಿಕೊಂಡು, ತನ್ನ ನಟನೆಯ ಶೈಲಿಯನ್ನು ಗುರುತಿಸಿಕೊಳ್ಳುವುದು ಬಹಳ ಕಷ್ಟ. ರಾಜ್‌ಕುಮಾರ್ ತರಹ ಮಾಡ್ತಾರೆ ಎಂದು ಹೇಳಿದ ಕೂಡಲೇ ರಾಜ್‌ಕುಮಾರ್ ತರಹ ಎಲ್ಲರೂ ಮಾಡ್ತಾರೆ ಅಂತ ಬರುತ್ತೆ. ಅದು ಅಲ್ಲ.! ಇದು ಶಿವರಾಜ್‌ಕುಮಾರ್ ತರಹ ಆಗಬೇಕು. ಅವನ ಮೊದಲ ಸಿನಿಮಾಗಳನ್ನೆಲ್ಲ ಗಮನಿಸಿದಾಗ, ತಾನು ತನ್ನದೇ ಆದಂತಹ ಒಂದು ವ್ಯಕ್ತಿತ್ವವನ್ನು ರೂಪಿಸಿಕೊಳ್ಳುತ್ತೇನೆ ಅನ್ನೋ ಧೈರ್ಯದ ಮೇಲೆ ತನ್ನ ಎಂಟ್ರಿಗಳನ್ನು ಕೊಟ್ಟುಕೊಳ್ಳುತ್ತಾನೆ.

ಈ 40 ವರ್ಷಗಳಲ್ಲಿ, ಶಿವರಾಜ್‌ಕುಮಾರ್ ಅದ್ಭುತವಾದ ನಟನ ಕೌಶಲ್ಯವನ್ನು ತೋರಿಸಿದ್ದಾರೆ. ಇದರ ಬಗ್ಗೆ ಎರಡನೇ ಮಾತೇ ಇಲ್ಲ. ಹಾಗಾಗಿ, ಈ 40 ವರ್ಷಗಳ ಅವನ ಪಯಣವನ್ನು ನಾವು ಒಂದು ಅರ್ಥದಲ್ಲಿ ನೆನಪಿಸಿಕೊಳ್ಳಬೇಕು. ಮತ್ತು ಅದನ್ನು ಮಾದರಿಯಾಗಿ ಇಟ್ಟುಕೊಂಡು, ಬೇರೆಯವರಿಗೆ ಹೇಳಬೇಕು. ಹೇಗೆ ಒಬ್ಬ ನಟ ತನ್ನ ಸಿನಿಮಾಗಳಲ್ಲಿ ತನ್ನನ್ನು ತಾನು ತೊಡಗಿಸಿಕೊಂಡು, ಇನ್ನೂ ಒಂದು ಒಳ್ಳೆಯ ಪಾತ್ರ ಮಾಡಬೇಕು ಅಂತ ಹಪಹಪಿಸುತ್ತಾ ಇದೆಯಲ್ಲ, ಅದು ಒಬ್ಬ ಆಕ್ಟರ್‌ಗೆ ಇರಬೇಕಾದ ಗುಣ. ಯಾವಾಗ ಶೂಟಿಂಗ್ ಶುರು, ಯಾವಾಗ ನಾನು ಸೆಟ್‌ನಲ್ಲಿ ಇರ್ತೀನಿ ಎಂಬ ತುಡಿತ ಶಿವಣ್ಣನಲ್ಲಿ ಇದೆ. ಶಿವಣ್ಣ ಒಬ್ಬ ಕಾಯಕ ದಾಸೋಹಿ. ಯಾವಾಗಲೂ ಅವನಿಗೆ ಕಾಯಕ ಬೇಕು. ಕೆಲಸ ಬೇಕು. ಆ ಕೆಲಸ ಇಲ್ಲದಿದ್ದರೆ, ಅವನ ಕೈ ತಡೆಯೋಕೆ ಆಗಲ್ಲ. ಪ್ರತಿಕ್ಷಣವೂ ಏನೋ ಒಂದು ಮಾಡ್ತಾ ಇರ್ತಾನೆ. ಅಂತಹ ಒಂದು ಚಲನಶೀಲ ವ್ಯಕ್ತಿತ್ವ, ಶಿವಣ್ಣ.!

*ಡಾ ರಾಜ್‌ಕುಮಾರ್ ಅವರ ಯಾವ ಗುಣಗಳು ಶಿವಣ್ಣ ಅವರಲ್ಲಿ ಸ್ಪಷ್ಟವಾಗಿ ಕಾಣುತ್ತೆ?
- ಅಣ್ಣಾವ್ರ ರೀತಿಯಲ್ಲೇ ಶಿವರಾಜ್‌ಕುಮಾರ್‌ ಬೆಳೆದ ಅನ್ನೋದನ್ನ ನಾನು ನಂಬಲ್ಲ. ಕಾರಣ ಅಂದ್ರೆ, ಅವರ ಶೈಲಿನೇ ಬೇರೆ. ಇವರ ಶೈಲಿನೇ ಬೇರೆ. ಅಣ್ಣಾವ್ರ ಸ್ಫುಟವಾದ ಕನ್ನಡ ಭಾಷೆಯ ಬಗ್ಗೆ ಯಾರೊಬ್ಬರೂ ಚಕಾರ ಎತ್ತಲ್ಲ. ಅವರ ನಟನೆ ಬಗ್ಗೆ ಚಕಾರ ಎತ್ತಲ್ಲ. ಅವರ ಹಾಡಿನ ಬಗ್ಗೆ ಚಕಾರ ಎತ್ತಲ್ಲ. ಆದರೆ ಶಿವರಾಜ್‌ಕುಮಾರ್‌ ತನ್ನದೇ ಆದ ಗುಣಗಳನ್ನು ಪ್ರತಿನಿಧಿಸುತ್ತಾ ಇದ್ದ. ತನ್ನದೇ ಆದಂತಹ ಶೈಲಿಯನ್ನು, ತನ್ನದೇ ಆದಂತಹ ನಟನ ಕೌಶಲ್ಯವನ್ನು, ತನ್ನದೇ ಐಡೆಂಟಿಟಿ ಸೃಷ್ಟಿಸಿಕೊಂಡ.

ಶಿವಣ್ಣನ ಆ ಸರಳ ವ್ಯಕ್ತಿತ್ವ ಇದೆಯಲ್ಲ.. ಆ ವಿನಮ್ರತೆ ಇದೆಯಲ್ಲ.. ಬದ್ಧತೆ ಮತ್ತು ಶಿಸ್ತು ಇದೆಯಲ್ಲ.. ಇವೆಲ್ಲವೂ ಅಪ್ಪನಿಂದ ಬಂದದ್ದು. ಅಥವಾ ಆ ದೊಡ್ಮನೆಯಿಂದ ಬಂದದ್ದು. ಇವನಿಗೆ ಆ ಮನೆಯಲ್ಲೇ ಎಲ್ಲವೂ ಇತ್ತು. ಮಾದರಿಗಳೆಲ್ಲ ಮನೆಯಲ್ಲೇ ಇತ್ತು. ವರದಣ್ಣ... ಡಾಕ್ಟರ್ ರಾಜ್‌ಕುಮಾರ್‌ ಅವರ ತಮ್ಮ. ವರದಣ್ಣನ ವ್ಯಕ್ತಿತ್ವದ ಪ್ರಭಾವ ಶಿವಣ್ಣನ ಮೇಲೆ ಬಹಳಷ್ಟು ಇದೆ. ಅದನ್ನು ನಾವು ಅಲ್ಲಗೆಳೆಯುವ ಹಾಗಿಲ್ಲ. ತಾಯಿಯ ಪ್ರಭಾವ ಇದೆ. ಒಟ್ಟಾರೆಯಾಗಿ, ಇಡೀ ಕುಟುಂಬದ ಆ ಪರಿಸರದ ಪ್ರಭಾವದಲ್ಲೇ ತನ್ನನ್ನು ತಾನು ರೂಪಿಸಿಕೊಂಡಿದ್ದಾನಲ್ಲ, ಅದು ಶ್ರೇಷ್ಠ ಅಂತ ಹೇಳಬೇಕು.

ಬಹಳಷ್ಟು ಸಲ ಅಂದುಕೊಳ್ಳುತ್ತೇವೆ, ಏನು ಆಕ್ಟಿಂಗ್ ಈಸ್ ವೆರಿ ಈಸಿ ಅಂತ, ಖಂಡಿತ ಅಲ್ಲ.! ಅದಕ್ಕೊಂದು ಪ್ರಿಪರೇಷನ್ ಇರಬೇಕು. ಆ ಪ್ರಿಪರೇಷನ್ ಜೊತೆಗೆ, ಒಂದು ರಿಹರ್ಸಲ್ ಇರಬೇಕು. ಆ ಸಿದ್ಧತೆ ಮತ್ತು ಆ ಕಲಿಕೆ, ಅವೆರಡೂ ಇಲ್ಲದಿದ್ದರೆ, ಸಾಧ್ಯನೇ ಇಲ್ಲ. ಶಿವರಾಜ್‌ಕುಮಾರ್ ಆ ಅರ್ಥದಲ್ಲಿ ಸದಾ ಕಲಿಕೆಯಲ್ಲಿರುವ ಸದಾ ಸಿದ್ಧತೆಯಲ್ಲಿರುವಂತಹ ಒಬ್ಬ ನಟ.! (ಸಂದರ್ಶನ ಮುಂದುವರೆಯುತ್ತದೆ)

Dailyhunt
Disclaimer: This content has not been generated, created or edited by Dailyhunt. Publisher: Vijay Karnataka