ನಾನಾಛಂದಃ ಸುಸರ್ವಾರ್ಥದಾಯಕಂ ಪಾಪನಾಶಕಂ || 2 ||

ಧ್ಯಾಯಾಮಿ ಶ್ರೀರಾಘವೇಂದ್ರಾರ್ಯರೂಪಂ

ಭೂಲೋಕೇಸ್ಮಿನ್ ಸರ್ವಸೌಭಾಗ್ಯಹೇತುಂ |

ಭಕ್ತತ್ರಾಣಾಯೈವ ಬದ್ಧಾದರಂ ಮೇ

ಚಿತ್ತೇ ನಿತ್ಯಂ ಸಂವಸತ್ವಿಷ್ಟದೈವಂ || 3 ||

ಪುರಾ ಪ್ರಹ್ಲಾದನಾಮಾಭೂತ್ ಹಿರಣ್ಯಕಶಿಪೋಃ ಸುತಃ |

ಯದರ್ಥಂ ಶ್ರೀಮಹಾವಿಷ್ಣುರ್ನೃಕಂಠೀರವತಾಂ ಗತಃ || 4 ||

ಸಂಹತಃ ಪ್ರಹತಶ್ಚೇತಿ ತಸ್ಯಾಸ್ತಾಂ ಪರಿಚಾರಿಣೌ |

ತ್ರೇತಾಯಾಂ ರಾಮಸೇವಾರ್ಥಂ ವಿಭೀಷಣತಯಾಜನಿ || 5 ||

ತತ್ರಾಪಿ ಚಾರೌ ತೌ ಜಾತೌ ಸಂಧಿಕಶ್ಚ ಪ್ರಸಂಧಿಕಃ |

ದ್ವಾಪರೇಪಿ ಸಮಂ ತಾಭ್ಯಾಂ ಸಮಾವಿಷ್ಟಶ್ಚ ವಾಯುನಾ || 6 ||

ಭೂಭಾರಕ್ಷಪಣೇ ವಿಷ್ಣೋರಂಗತಾಮಾಪ್ತುಮೇವ ಸಃ |

ಪ್ರತೀಪಪುತ್ರತಾಮಾಪ್ಯ ಬಾಹ್ಲೀಕೇಷ್ವಭವತ್ಪತಿಃ || 7 ||

ಕಲೌ ಗೋಪಾಲಕೃಷ್ಣಾರ್ಚಾ ಪೂಜಾಯೈ ವ್ಯಾಸಮಸ್ಕರೀ |

ಭೂತ್ವಾ ನಿರ್ಜಿತ್ಯ ದುರ್ವಾದಾನ್ ಮಧ್ವಶಾಸ್ತ್ರಂ ಪ್ರಕಾಶಯತ್ || 8 ||

ಬ್ರಹ್ಮಮಾನಸಪೂಜಾಯಾಮಾವಿರ್ಭೂತಾಂ ಹೃದಂಬುಜಾತ್ |

ಶ್ರೀರಾಮಾರ್ಯಂ ಚ ಸೀತಾರ್ಚಾಂ ಪ್ರಪೂಜಯಿಷುರೇಷಕಃ || 9 ||

ಶ್ರೀರಾಘವೇಂದ್ರತೀರ್ಥಾಖ್ಯೋವತೀರ್ಯ ಯತಿರೂಪತಃ |

ವಿವೃತ್ಯಾ ಮಧ್ವಶಾಸ್ತ್ರಸ್ಯ ಲೋಕೋಪಕೃತಿಮಾತನೋತ್ || 10||

ಅಪ್ಪಣ್ಣಾಚಾರ್ಯ ಕೃಷ್ಣಾಖ್ಯೌ ತತ್ರಾಪಿ ದ್ವಿಜರೂಪತಃ |

ಸಂಹತಪ್ರಹತೌ ಜಾತೌ ಶಿಷ್ಯೌ ತಸ್ಯ ಪ್ರಿಯೌ ಸದಾ || 11 ||

ಪುನಶ್ಚ ಸತ್ಯಸಂಧಾಖ್ಯೋ ಮಠಾಂತರನಿವಾಸಿನೀಮ್ |

ಅನರ್ಚಿತಾಂ ಚ ಸೀತಾಯಾಃ ಪ್ರತಿಮಾಮಾರ್ಚಯದ್ಯತಿಃ || 12 ||

ವಿಷ್ವಕ್ಸೇನಾಹೀಶಪುತ್ರಾವತಾರಾಃ ಷಡಿಮೇ ಮತಾಃ |

ತಸ್ಯ ಶ್ರೀರಾಘವೇಂದ್ರಗುರೋಃ ಕಾಮ್ಯಾರ್ಥದಾಯಿನಃ || 13 ||

ಅಪ್ಪಣ್ಣಾಚಾರ್ಯರಚಿತಂ ಸ್ತೋತ್ರಂ ಸರ್ವೇಷ್ಟಸಾಧಕಮ್ |

ಏತದ್ವಿನಾ ಗುರೋಃ ಪೂಜಾ ಸ್ತೋತ್ರಂ ಚಾಷ್ಟಾಕ್ಷರೀ ಜಪಃ || 14 ||

ಸೇವಾ ಚ ವ್ಯರ್ಥತಾಮೇತಿ ನ ಪ್ರಸಾದೋ ಗುರೋರ್ಭವೇತ್ |

ಆದೌ ಸಕೃದ್ವಾ ತತ್ಪಾಠಾದನ್ಯತ್ಸಿದ್ಧ್ಯತಿ ಶೀಘ್ರತಃ || 15||

ಸರ್ವೇಷ್ವಪಿ ಚ ಶಿಷ್ಯೇಷು ಅಪ್ಪಣ್ಣಾಚಾರ್ಯ ಏವ ಸಃ |

ಗುರೋರತಿಪ್ರಿಯೋ ಯಸ್ಮಾತ್ ಸ್ತುತಿಸ್ತೇನ ಸಮಾದೃತಾಃ || 16 ||

ಅಪ್ಪಣ್ಣಾಚಾರ್ಯ ಸಂಪ್ರೋಕ್ತಂ ಮೂಲಂ ಮಾಲಾ ಚ ವರ್ಮ ಚ |

ಯಥಾಯೋಗಂ ಯಥಾಕಾಲಂ ತತ್ತದುಕ್ತಾರ್ಥಸಿದ್ಧಿದಂ || 17 ||

ಶ್ರೀರಾಘವೇಂದ್ರಯತಿನಂ ಈಪ್ಸಿತಾರ್ಥಪ್ರದಾಯಿನಂ |

ಉಪಾಸತೇ ಯಥಾ ಭಕ್ತ್ಯಾ ತಥಾ ಫಲಮವಾಪ್ನುಯಾತ್ || 18 ||

ಸೇವಯಾ ಪರಮಹಂಸಾನಾಮೈಹಿಕಾಮುಷ್ಮಿಕಂ ಭವೇತ್ |

ಜ್ಞಾನಂ ಭಕ್ತಿಂ ಚ ವೈರಾಗ್ಯಂ ಭುಕ್ತಿಂ ಮುಕ್ತಿಂ ಚ ವಿಂದತಿ || 19 ||

ಇತ್ಯಾದಿ ವಾಕ್ಯಾತ್ ಪರಮಹಂಸಾಧೀಶಮಿಮಂ ಗುರುಂ |

ಸೇವೇತ ಸರ್ವಥಾ ಮರ್ತ್ಯಃ ಸ್ವರೂಪೋದ್ಧಾರಕಾರಣಂ |

ಸ್ತುವೀತ ಬಹುಭಿಃ ಸ್ತೋತ್ರೈಃ ಪ್ರಾರ್ಥಯೀತ ಯಥೇಪ್ಸಿತಂ || 20 ||

ಶ್ರೀರಾಘವೇಂದ್ರಂ ಶ್ರಿತಪಾರಿಜಾತಂ

ಸೀತಾರಘೂತ್ತಂಸಪದಾಬ್ಜಚಿತ್ತಂ |

ಕಾಷಾಯವಸ್ತ್ರಂ ಕಮನೀಯವೇಷಂ

ಕಾಮ್ಯಾರ್ಥದಾತಾರಮತೀತದೋಷಂ || 21 ||

ಜಯತು ಜಯತು ರಾಜಾ ರಾಜರಾಜಾದಿಪೂಜ್ಯೋ

ಜಯತು ಜಯತು ರಮ್ಯೇ ರಂಜಿತಾನೇಕಲೋಕಃ |

ಜಯತು ಜಯತು ಭೋಗೀ ಭಕ್ತಭಾಗ್ಯಪ್ರದಾತಾ

ಜಯತು ಜಯತು ಭೂಮಾ ಭೂರಿ ಭೂರಿ ಪ್ರದಾತಾ || 22 ||

ಜಯತು ಜಯತು ಬಂಧುರ್ಬಂಧನಚ್ಛೇದಕಾರೀ

ಜಯತು ಜಯತು ಮಿತ್ರಂ ಮೀಲಿತಾನೇಕವೈರೀ |

ಜಯತು ಜಯತು ಮಾತಾ ಮಾನ್ಯಮಾನ್ಯೋ ಮಹಾತ್ಮಾ

ಜಯತು ಜಯತು ತಾತಸ್ತಾಪಹರ್ತಾ ನಿತಾಂತಂ || 23 ||

ಗುರೋ ತವ ಪದಾಂಬುಜಂ ಭವಪಯೋಧಿನೌಕಾಯಿತಂ

ಮಹಾಜನಪರಂಪರಾಭಜನಗೋಚರಂ ಭೂತಿದಂ |

ಭಜಾಮಿ ಭಜತಾಂ ನೃಣಾಂ ಬಹುಗದೌಘವಿಧ್ವಂಸಕಂ

ಸುಖಪ್ರದಮಹರ್ನಿಶಂ ಸುಖಸುಖೇನ ಸಂಸಿದ್ಧಿದಂ || 24 ||

ಮನೋ ವಸತು ಪಾದಯೋರ್ಭವತು ಮೇ ವಚಸ್ತೇ ಸ್ತುತೌ

ತ್ವದೀಕ್ಷಣವಿಧೌ ದೃಶಾ ಭವತು ತೇರ್ಚನಾಯಾಂ ಕರೌ |

ಶ್ರುತೀ ತವ ಗುಣಶ್ರುತೌ ಭವತು ಮಸ್ತಕಂ ತೇ ನತೌ

ಪ್ರದಕ್ಷಿಣವಿಧೌ ಪದೇ ಗುರುವರಾಶ್ರಯೇ ತೇ ಪದೇ || 25||

ವಿತ್ತಾಶಯಾ ಜಗತಿ ವಿತ್ತಾದಿ ಸಂಪದತಿಮತ್ತಾನಿಮಾನುಪಚರನ್

ಆತ್ತಾಧಿರಸ್ಮ್ಯಹಮನುತ್ತಾನಲುಂಠದಪಚಿತ್ತಾವಿವೇಕಮತಿಮಾನ್ |

ಮತ್ತಾಂಗನಾ ಕಠಿನವೃತ್ತಾನುಬಂಧಿಕುಚದತ್ತಾದರಶ್ಚ ತಮಿಮಂ

ಶ್ರೀರಾಘವೇಂದ್ರ ದಯಯಾರಾದುಪೈಹಿ ಮಮ ಧೀರಾಶು ಯಚ್ಛ ಸುಮತಿಂ || 26||

ತವ ಸೇವಾರತಾನ್ ಕಾಂಶ್ಚಿತ್ ಭಕ್ತಾನ್ ಪ್ರೇಷಯ ಮಾಂ ಪ್ರತಿ |

ತೇಷಾಂ ಮನೋರಥಂ ತಾತ ಮಯಾ ಪುತ್ರೇಣ ಪೂರಯ || 27 ||

ಅಥವಾ ಕರುಣಾಸಿಂಧೋ ಮಯಿ ಸನ್ನಿಹಿತಃ ಸದಾ |

ಪುತ್ರಸ್ಯ ಮಮ ವಾಕ್ಯೇನ ಸರ್ವಸರ್ವೇಷ್ಟದೋ ಭವ || 28 ||

ಯೇನ ಕೇನಾಪ್ಯುಪಾಯೇನ ದೂನೇ ದುರ್ಯಶಸಾ ಭುವಿ |

ಮಾಹಾತ್ಮ್ಯಂ ಮಯಿ ವಿನ್ಯಸ್ಯ ಕುರು ಮಾಂ ಲೋಕಪೂಜಿತಂ || 29 ||

ಯುಕ್ತಾಯುಕ್ತಮಜಾನಾನೋ ಯಾಚೇ ತ್ವಾಂ ಬಾಲವದ್ಗುರೋ |

ದಾತಾ ತ್ರಾತಾ ದಯಾಲುಸ್ತ್ವಂ ಯಥೇಚ್ಛಸಿ ತಥಾ ಕುರು || 30 ||

ಸರ್ವಜ್ಞಾಯ ಸ್ವತಂತ್ರಾಯ ಭಕ್ತಕ್ಲೇಶವಿನಾಶಿನೇ |

ಉದಾರಚೇತಸೇ ಕಿಂ ತೇ ವದೇ ಮದ್ಭಾರವಾಹಿನೇ || 31 ||

ಆಪಾದಮೌಳಿಪರ್ಯಂತಂ ಗುರೂಣಾಮಾಕೃತಿಂ ಸ್ಮರೇತ್ |

ತೇನ ವಿಘ್ನಾಃ ಪ್ರಣಶ್ಯಂತಿ ಸಿದ್ಧ್ಯಂತಿ ಚ ಮನೋರಥಾಃ || 32 ||

ಇತಿ ಶ್ರೀಗುರುರಾಜಸ್ಯ ಹೃದಯಂ ತದನುಜ್ಞಯಾ |

ಕೃಷ್ಣಾವಧೂತ ಕಥಿತಂ ಗುರುವಾಕ್ಯಾನುಸಾರತಃ |

ಸಂಪಾದ್ಯ ಸಿದ್ಧಸಂಕಲ್ಪೇ ಭಕ್ತಿಂ ಮುಕ್ತಿಂ ಚ ವಿಂದತಿ || 33 ||

ಪಠನಾಚ್ಛ್ರವಣಾದ್ವಾಪಿ ಗುರುಸಾನ್ನಿಧ್ಯಕಾರಣಂ |

ಕಿಮತ್ರಬಹುನಾ ಸರ್ವಂ ಗುರುರಾಜಪ್ರಸಾದತಃ || 34 ||

ಮೋದಂ ಮೇ ದಿಶತು ಗುರುಃ ಸ ರಾಘವೇಂದ್ರೋ

ದೀನಾನಾಂ ಶರಣಮುದಾರಚಿತ್ತವೃತ್ತಿಃ |

ಭಕ್ತಾನಾಂ ಹರಿಗುರುರೂಪದರ್ಶಕಸ್ತ್ವಂ

ಸುಪ್ರೇಮ್ಣಾ ಮಯಿ ಮಮ ತಾತ ಸನ್ನಿಧೇಹಿ || 35 ||

ಇತಿ ಶ್ರೀಕೃಷ್ಣಾವಧೂತಪಂಡಿತ ಕೃತೌ ಶ್ರೀರಾಘವೇಂದ್ರತಂತ್ರೇ

ಶ್ರೀ ರಾಘವೇಂದ್ರ ಹೃದಯಂ ನಾಮ ತೃತೀಯಃ ಪಟಲಃ ||

ಇವುಗಳನ್ನೂ ಓದಿ: ರಾಯರಿಗೆ ಪ್ರಿಯ ರಾಘವೇಂದ್ರ ಅಷ್ಟಾಕ್ಷರ ಸ್ತೋತ್ರ|

ರಾಯರ ಸಂಪರ್ಕ ಬಯಸುವವರಿಗೆ ರಾಘವೇಂದ್ರ ಸ್ತೋತ್ರ|