ವಾಷಿಂಗ್ಟನ್, ಜು.9: ಅಮೆರಿಕದಲ್ಲಿ (America) ತನ್ನ ಪತ್ನಿಯನ್ನು ಕೊಂದ ಆರೋಪದ ಮೇಲೆ 30 ವರ್ಷದ ಭಾರತೀಯ ಟೆಕ್ಕಿಯನ್ನು ಬಂಧಿಸಲಾಗಿದೆ. ಅವರ (Crime News). ಅಪಾರ್ಟ್ಮೆಂಟ್ನಲ್ಲಿ ಪತ್ನಿ ಮೃತದೇಹವಾಗಿ ಪತ್ತೆಯಾದ ಸುಮಾರು ಒಂಬತ್ತು ತಿಂಗಳ ಬಳಿಕ ಈ ಬಂಧನ ನಡೆದಿದೆ.
ಅವಿನಾಶ್ ನಾರ್ನೆ ಎಂಬಾತ ತನ್ನ ಪತ್ನಿ ರಾಜಿತಾ ಸಬ್ಬಿನೇನಿ (27) ಎಂಬಾಕೆಯನ್ನು ಕಳೆದ ವರ್ಷ (2025) ಅಕ್ಟೋಬರ್ನಲ್ಲಿ ಕತ್ತು ಹಿಸುಕಿ ಕೊಂದು, ಆಕಸ್ಮಿಕ ಸಾವು ಎಂಬಂತೆ ಬಿಂಬಿಸಿದ್ದ.
ಅಕ್ಟೋಬರ್ 27, 025 ರಂದು, ಸಾಫ್ಟ್ವೇರ್ ಡೆವಲಪ್ಮೆಂಟ್ ಎಂಜಿನಿಯರ್ ಆಗಿದ್ದ ನಾರ್ನೆ ಪೊಲೀಸರಿಗೆ ಕರೆ ಮಾಡಿದ್ದಾನೆ. ತನ್ನ ಪತ್ನಿ ಸ್ನಾನಗೃಹದಲ್ಲಿ ಲಾಕ್ ಆಗಿದ್ದು, ಹೊರಗೆ ಬರುತ್ತಿಲ್ಲ ಎಂದು ವರದಿ ಮಾಡಿದ್ದ. ಪೊಲೀಸರು ಸ್ನಾನಗೃಹದೊಳಗೆ ನುಗ್ಗಿದಾಗ, ಸಬ್ಬಿನೇನಿ ನೆಲದ ಮೇಲೆ ಬಿದ್ದಿರುವುದನ್ನು ಗಮನಿಸಿದರು. ಅಧಿಕಾರಿಗಳು, ಮಹಿಳೆಯು ಸ್ಥಳದಲ್ಲೇ ಮೃತಪಟ್ಟಿದ್ದಾರೆ ಎಂದು ಘೋಷಿಸಿದ್ದರು.
ವಿಚಾರಣೆಯ ಸಮಯದಲ್ಲಿ, ನಾರ್ನೆ ಆರಂಭದಲ್ಲಿ ಪೊಲೀಸರಿಗೆ ಅಕ್ಟೋಬರ್ 27 ರಂದು ಕೆಲಸ ಮಾಡಲು ಅಪಾರ್ಟ್ಮೆಂಟ್ನಿಂದ ಹೊರಟಿದ್ದಾಗಿ ತಿಳಿಸಿದ್ದ. ಸುಮಾರು 40 ನಿಮಿಷಗಳ ನಂತರ ಮನೆಗೆ ಹಿಂದಿರುಗಿದಾಗ, ಸಬ್ಬಿನೇನಿ ಸ್ನಾನಗೃಹದಲ್ಲಿ ಲಾಕ್ ಆಗಿರುವುದನ್ನು ಗಮನಿಸಿರುವುದಾಗಿ ಹೇಳಿದ್ದಾನೆ. ಆದರೆ, ನಾರ್ನೆ ಮನೆಯಲ್ಲಿ ಇಲ್ಲದಿದ್ದಾಗ ಬೇರೆ ಯಾರೂ ಅವರ ಮನೆಗೆ ಪ್ರವೇಶಿಸುತ್ತಿರುವುದು ಅಧಿಕಾರಿಗಳಿಗೆ ಕಂಡುಬಂದಿಲ್ಲ.
Bengaluru Murder: ಬಾರ್ನಲ್ಲಿ ಜಸ್ಟ್ ಗುರಾಯಿಸಿದ್ದಕ್ಕೆ ಚಾಕು ಇರಿದು ಯುವಕನ ಬರ್ಬರ ಹತ್ಯೆ!
ಮರುದಿನ, ಕಿಂಗ್ ಕೌಂಟಿ ವೈದ್ಯಕೀಯ ಪರೀಕ್ಷಕರ ಕಚೇರಿಯು ಸಬ್ಬಿನೇನಿಯ ಸಾವನ್ನು ಕೊಲೆ ಎಂದು ತೀರ್ಪು ನೀಡಿತು. ಅವರು ಕತ್ತು ಹಿಸುಕುವಿಕೆಯಿಂದ ಉಸಿರುಗಟ್ಟಿ ಮೃತಪಟ್ಟಿದ್ದಾರೆ ಎಂದು ಹೇಳಿತು. ತನಿಖೆಯ ವೇಳೆ, ನಾರ್ನೆ ಹಲವು ವರ್ಷಗಳಿಂದ ಭಾರತದಲ್ಲಿ ಒಬ್ಬ ಮಹಿಳೆಯೊಂದಿಗೆ ರಹಸ್ಯ ಸಂಬಂಧ ಹೊಂದಿದ್ದ. ಆದರೂ, ನಾರ್ನೆ ಜೂನ್ 5, 2025 ರಂದು ಸಬ್ಬಿನೇನಿಯನ್ನು ವಿವಾಹವಾದ. ಅವನ ಗೆಳತಿ ಕೂಡ ಅವರಿಬ್ಬರ ಮದುವೆಗೆ ಹಾಜರಾಗಿದ್ದರು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ನಾರ್ನೆ ಸಬ್ಬಿನೇನಿಯನ್ನು ಮದುವೆಯಾದ ನಂತರವೂ ಇಬ್ಬರು ಪ್ರೇಮಿಗಳು ತಮ್ಮ ಸಂಬಂಧವನ್ನು ಮುಂದುವರೆಸಿದ್ದಾರೆ. ಅಪರಾಧ ನಡೆದ ದಿನದಂದು, ನಾರ್ನೆ ತನ್ನ ಗೆಳತಿಗೆ ಕನಿಷ್ಠ ನಾಲ್ಕು ಬಾರಿ ಕರೆ ಮಾಡಿದ್ದನು. ಅದರಲ್ಲಿ ತಾನು ಲಾಕ್ ಆಗಿರುವ ಸ್ನಾನಗೃಹಕ್ಕೆ ಪ್ರವೇಶಿಸಲು ಪ್ರಯತ್ನಿಸುತ್ತಿದ್ದೇನೆ ಎಂದು ಪೊಲೀಸರಿಗೆ ತಿಳಿಸಿದ ಸಮಯವೂ ಸೇರಿದೆ. ತನ್ನ ಹೆಂಡತಿಯ ಮೃತದೇಹದ ಫೋಟೋವನ್ನು ಸಹ ತನ್ನ ಗೆಳತಿಗೆ ಕಳುಹಿಸಿದ್ದಾನೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಅಧಿಕಾರಿಗಳಿಗೆ ಕೊಲೆಯಾದ ರಾಜಿತಾ ಸಬ್ಬಿನೇನಿ ಅವರು ಪತಿ ಅವಿನಾಶ್ ನಾರ್ನೆಗೆ ಕಳುಹಿಸಿದ್ದ ಸಂದೇಶಗಳೂ ದೊರೆತಿವೆ. ಆ ಸಂದೇಶಗಳಲ್ಲಿ, ಪತಿ ತಯಾರಿಸುತ್ತಿದ್ದ ಪಾನೀಯಗಳು ಹಲವು ಬಾರಿ ಕಹಿಯಾಗಿ ರುಚಿಸುತ್ತಿವೆ ಎಂದು ಹೇಳಿದ್ದರು. ಆಕೆ ಮೃತಪಟ್ಟ ದಿನವೂ, ಪತಿ ತಯಾರಿಸಿದ್ದ ಸ್ಮೂಥಿ ಔಷಧಿಯಂತಿದೆ ಅಂದರೆ ಕೆಮ್ಮಿನ ಸಿರಪ್ನಂತಹ ರುಚಿ ಹೊಂದಿದೆ ಎಂದು ರಾಜಿತಾ ಪತಿಗೆ ಸಂದೇಶ ಕಳುಹಿಸಿದ್ದರು.
ಇದೀಗ ಪತ್ನಿಯ ಕೊಲೆ ಪ್ರಕರಣ ಸಂಬಂಧ ಜುಲೈ 5 ರಂದು ನಾರ್ನೆ ವಿರುದ್ಧ ಹತ್ಯೆ ಆರೋಪ ಹೊರಿಸಲಾಗಿದೆ. ಆತನಿಗೆ ಜೀವಾವಧಿ ಶಿಕ್ಷೆ ವಿಧಿಸಬಹುದು ಎಂದು ಅಧಿಕಾರಿಗಳು ಹೇಳಿದ್ದಾರೆ.