ಆದರೆ, ಉರಗ ತಜ್ಞ ಪ್ರಶಾಂತ್ ಅವರು ಹಾವನ್ನು ಸೆರೆ ಹಿಡಿದು, ಮಕ್ಕಳನ್ನು ರಕ್ಷಣೆ ಮಾಡಿದ್ದಾರೆ. ಸದ್ಯ ಈ ವಿಡಿಯೊ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ (Bengaluru Viral Video) ಆಗಿದೆ.

ತೋಟಗೆರೆ ಗ್ರಾಮದಲ್ಲಿ ಜುಲೈ 2 ರಾತ್ರಿ 10:50ರ ಸಮಯದಲ್ಲಿ ಮನೆಯೊಂದರಲ್ಲಿ ನಾಗರಹಾವು ಸೇರಿಕೊಂಡಿತ್ತು. ಹಾವು ಮಂಚದ ಕೆಳಗೋ, ಪಾತ್ರೆಗಳ ನಡುವೆಯೋ, ಚೀಲಗಳ ನಡುವೆ ಸೇರಿಕೊಂಡಿದ್ದರೆ ಪೋಷಕರು ಧೈರ್ಯವಾಗಿರುತ್ತಿದ್ದರು. ಆದರೆ ಮಲಗಿದ್ದ ಮಕ್ಕಳಿಬ್ಬರ ನಡುವೆ ನಾಗರ ಹಾವು ಸೇರಿಕೊಂಡಿತ್ತು. ಇದರಿಂದ ಪೋಷಕರು ಆತಂಕಗೊಂಡಿದ್ದರು.

ರಗ್ಗಿನೊಳಗೆ ಅಡಗಿದ ನಾಗರ ಹಾವನ್ನು ನೋಡಿ ಪೋಷಕರು ಹೆದರಿ ಹೋಗಿದ್ದರು. ಅಪಾಯಕಾರಿ ಹಾವು ಇದಾಗಿದ್ದರಿಂದ ಮಕ್ಕಳ ರಕ್ಷಣೆ ಮಾಡುವ ವೇಳೆ ಎಲ್ಲಿ ಕಚ್ಚಿ ಬಿಡುತ್ತದೋ ಎಂಬ ಭಯದಲ್ಲಿ ಪೋಷಕರಿದ್ದರು. ಆದರೆ, ಉರಗ ತಜ್ಞ ಪ್ರಶಾಂತ್ ಅವರು ಮಕ್ಕಳ ಪ್ರಾಣ ರಕ್ಷಣೆ ಮಾಡುವ ಜೊತೆಗೆ ಹಾವನ್ನೂ ಸೆರೆ ಹಿಡಿದು ಸುರಕ್ಷಿತವಾಗಿ ಕಾಡಿಗೆ ಬಿಟ್ಟಿದ್ದಾರೆ.