ಟೈಪ್-1 ಮಧುಮೇಹ ಹೊಂದಿರುವ ಇಲಿಗಳ ಮೇಲೆ ನಡೆಸಿದ ಸಂಶೋಧನೆಯಲ್ಲಿ, ಕರ್ಕ್ಯುಮಿನ್ ನೀಡಿದ ಬಳಿಕ ರಕ್ತನಾಳಗಳ ಕಾರ್ಯನಿರ್ವಹಣೆಯಲ್ಲಿ ಸುಧಾರಣೆ ಕಂಡುಬಂದಿದೆ. ಉರಿಯೂತ ಕಡಿಮೆಯಾಗುವುದು, ರಕ್ತನಾಳಗಳಲ್ಲಿನ ಕ್ಯಾಲ್ಸಿಯಂ ನಿಯಂತ್ರಣ ಸುಧಾರಿಸುವುದು ಹಾಗೂ ಏಓರ್ಟಾದ ರಚನೆ ಮತ್ತು ಕಾರ್ಯದಲ್ಲಿ ಧನಾತ್ಮಕ ಬದಲಾವಣೆಗಳು ಕಂಡುಬಂದಿವೆ.

28 ದಿನಗಳ ಕಾಲ ಕರ್ಕ್ಯುಮಿನ್ ಚಿಕಿತ್ಸೆ

ಸಂಶೋಧಕರು ಟೈಪ್-1 ಮಧುಮೇಹ ಉಂಟುಮಾಡಲಾದ ಗಂಡು ಇಲಿಗಳಿಗೆ 28 ದಿನಗಳ ಕಾಲ ಕರ್ಕ್ಯುಮಿನ್ ನೀಡಿದರು. ನಂತರ ಅವುಗಳ ದೇಹದ ಅತಿದೊಡ್ಡ ಧಮನಿಯಾದ ಏಓರ್ಟಾದ ರಕ್ತನಾಳಗಳ ಕಾರ್ಯ ಮತ್ತು ರಚನೆಯನ್ನು ಪರಿಶೀಲಿಸಲಾಯಿತು. ಕರ್ಕ್ಯುಮಿನ್ ಪಡೆದ ಮಧುಮೇಹಿ ಇಲಿಗಳಲ್ಲಿ ರಕ್ತನಾಳಗಳ ಅತಿಯಾದ ಸಂಕೋಚನ ಕಡಿಮೆಯಾಗಿದ್ದು, ಕ್ಯಾಲ್ಸಿಯಂ ಚಟುವಟಿಕೆಯಲ್ಲಿ ಸುಧಾರಣೆ ಕಂಡುಬಂದಿದೆ. ಅಲ್ಲದೆ, ಮಧುಮೇಹದಿಂದ ಬದಲಾಗಿದ್ದ HSP70 ಎಂಬ ರಕ್ಷಣಾತ್ಮಕ ಪ್ರೋಟೀನ್‌ನ ಸಮತೋಲನದಲ್ಲೂ ಸುಧಾರಣೆ ಕಂಡುಬಂದಿದೆ.

Health Tips: ಆಯಾಸವೇ? ದೈಹಿಕ, ಮಾನಸಿಕ ಚೈತನ್ಯಕ್ಕೆ ಕಪ್ಪು ಎಳ್ಳು ಸೇವಿಸಿ

ಉರಿಯೂತ ಕಡಿಮೆ, ರಕ್ತನಾಳಗಳ ಆರೋಗ್ಯದಲ್ಲಿ ಸುಧಾರಣೆ

ಅಧ್ಯಯನದ ಪ್ರಕಾರ, ಕರ್ಕ್ಯುಮಿನ್ ಮಧುಮೇಹಿ ಇಲಿಗಳಲ್ಲಿ ಉರಿಯೂತಕ್ಕೆ ಸಂಬಂಧಿಸಿದ ಬದಲಾವಣೆಗಳನ್ನು ಕಡಿಮೆ ಮಾಡಿದೆ. ರಕ್ತನಾಳಗಳ ಗೋಡೆಗಳಲ್ಲಿ ಹೆಚ್ಚಾಗಿದ್ದ ಕೊಲಾಜನ್ ಸಂಗ್ರಹ ಕಡಿಮೆಯಾಗಿದ್ದು, ಎಲಾಸ್ಟಿನ್ ಮಟ್ಟದಲ್ಲೂ ಸುಧಾರಣೆ ಕಂಡುಬಂದಿದೆ. ಇದರಿಂದ ರಕ್ತನಾಳಗಳ ರಚನೆ ಮತ್ತು ಅವುಗಳ ಸ್ಥಿತಿಸ್ಥಾಪಕತೆ ಕಾಪಾಡಲು ಕರ್ಕ್ಯುಮಿನ್ ನೆರವಾಗುವ ಸಾಧ್ಯತೆಯಿದೆ ಎಂದು ಸಂಶೋಧಕರು ತಿಳಿಸಿದ್ದಾರೆ.

ಈ ಸಂಶೋಧನೆಯ ಫಲಿತಾಂಶಗಳು ಭರವಸೆ ಮೂಡಿಸಿದರೂ, ಅರಿಶಿನ ಅಥವಾ ಕರ್ಕ್ಯುಮಿನ್ ಮಧುಮೇಹಕ್ಕೆ ಚಿಕಿತ್ಸೆ ಎಂದು ಹೇಳಲು ಸಾಧ್ಯವಿಲ್ಲ. ಪ್ರಸ್ತುತ ಅಧ್ಯಯನವು ಇಲಿಗಳ ಮೇಲೆ ಮಾತ್ರ ನಡೆದಿದ್ದು, ಮನುಷ್ಯರಲ್ಲಿ ಇದೇ ರೀತಿಯ ಪರಿಣಾಮ ಉಂಟಾಗುತ್ತದೆಯೇ ಎಂಬುದನ್ನು ತಿಳಿಯಲು ಇನ್ನಷ್ಟು ಸಂಶೋಧನೆ ಮತ್ತು ಕ್ಲಿನಿಕಲ್ ಅಧ್ಯಯನಗಳ ಅಗತ್ಯವಿದೆ. ಅಧ್ಯಯನದಲ್ಲಿ ಬಳಸಿದ ಕರ್ಕ್ಯುಮಿನ್ ಪ್ರಮಾಣವನ್ನು ಸಾಮಾನ್ಯ ಅಡುಗೆಯಲ್ಲಿ ಬಳಸುವ ಅರಿಶಿನದ ಪ್ರಮಾಣಕ್ಕೆ ನೇರವಾಗಿ ಹೋಲಿಸಲು ಸಾಧ್ಯವಿಲ್ಲ.

ಹೀಗಾಗಿ ಮಧುಮೇಹ ಇರುವವರು ವೈದ್ಯರು ಸೂಚಿಸಿರುವ ಔಷಧಿ ಅಥವಾ ಇನ್ಸುಲಿನ್ ಅನ್ನು ನಿಲ್ಲಿಸಿ ಅರಿಶಿನ ಅಥವಾ ಕರ್ಕ್ಯುಮಿನ್ ಅನ್ನು ಪರ್ಯಾಯ ಚಿಕಿತ್ಸೆಯಾಗಿ ಬಳಸಬಾರದು.