ಬೆಲೆ ಕಟ್ಟಲಾಗದ ಶುದ್ಧ ಕುಡಿಯುವ ನೀರನ್ನು ಶೌಚಾಲಯಗಳಲ್ಲಿ ವ್ಯರ್ಥ ಮಾಡುವ ಬದಲು, ಸಮುದ್ರದ ಉಪ್ಪುನೀರನ್ನು ಬಳಸುವ ವಿನೂತನ ಮಾದರಿಯನ್ನು ಜಾರಿಗೆ ತಂದಿತು. 1950ರ ದಶಕದ ಉತ್ತರಾರ್ಧದಲ್ಲಿ ಪ್ರಾಯೋಗಿಕವಾಗಿ ಆರಂಭವಾದ ಈ ವ್ಯವಸ್ಥೆ, ಇಂದು ವಿಶ್ವದ ಅತ್ಯಂತ ದೊಡ್ಡ ಮತ್ತು ಯಶಸ್ವಿ ಸಮುದ್ರದ ನೀರು ಸರಬರಾಜು ಜಾಲವಾಗಿ ಹೊರಹೊಮ್ಮಿದೆ.

ಭೌಗೋಳಿಕವಾಗಿ ಸೀಮಿತ ನೈಸರ್ಗಿಕ ಜಲಮೂಲಗಳನ್ನು ಹೊಂದಿರುವ ಹಾಂಗ್ ಕಾಂಗ್, ಜನಸಂಖ್ಯಾ ಸ್ಫೋಟ ಮತ್ತು ನಗರೀಕರಣದ ಪರಿಣಾಮವಾಗಿ ತೀವ್ರ ನೀರಿನ ಕ್ಷಾಮವನ್ನು ಅನುಭವಿಸಿತು. 1950ರ ದಶಕದಲ್ಲಿ ಶುದ್ಧ ಕುಡಿಯುವ ನೀರನ್ನು ಉಳಿಸಲು ಪರ್ಯಾಯ ಮಾರ್ಗಗಳನ್ನು ಹುಡುಕುವುದು ಅನಿವಾರ್ಯವಾಯಿತು.

Vishweshwar Bhat Column: ಪದಗಳು: ಕಾಲದ ನದಿಯಲ್ಲಿ ತೇಲಿಬಂದ ಅನುಭವದ ದಿಮ್ಮಿಗಳು, ಮುತ್ತುಗಳು!

ನೈಸರ್ಗಿಕವಾಗಿ ನಗರದ ಸುತ್ತಲೂ ಇದ್ದ ಸಮುದ್ರದ ನೀರನ್ನೇ ಶೌಚಾಲಯಗಳಿಗಾಗಿ ಪ್ರತ್ಯೇಕವಾಗಿ ಬಳಸಲು ಆಡಳಿತ ತೀರ್ಮಾನಿಸಿತು. ಪ್ರಾರಂಭದಲ್ಲಿ ಸರಕಾರಿ ವಸತಿ ಸಮುಚ್ಚಯಗಳಲ್ಲಿ ಜಾರಿಗೆ ಬಂದ ಈ ವ್ಯವಸ್ಥೆ, ನಂತರ ಇಡೀ ನಗರದ ಮೂಲಸೌಕರ್ಯದ ಅವಿಭಾಜ್ಯ ಅಂಗವಾಗಿ ವಿಸ್ತರಣೆಗೊಂಡಿತು.

ಹಾಂಗ್ ಕಾಂಗ್‌ನ ಈ ನೀರು ಸರಬರಾಜು ವ್ಯವಸ್ಥೆಯು ಸಂಪೂರ್ಣವಾಗಿ ದ್ವಿಮುಖ (Dual-supply network) ಮಾದರಿಯಲ್ಲಿದೆ. ಅಂದರೆ, ಕುಡಿಯುವ ನೀರು ಮತ್ತು ಶೌಚಾಲಯಕ್ಕೆ ಬಳಸುವ ಸಮುದ್ರದ ನೀರು ಯಾವುದೇ ಕಾರಣಕ್ಕೂ ಪರಸ್ಪರ ಬೆರೆಯುವುದಿಲ್ಲ. ಇದಕ್ಕಾಗಿ ಪ್ರತ್ಯೇಕ ಪೈಪ್‌ಲೈನ್‌ಗಳು, ಜಲಾಶಯಗಳು ಮತ್ತು ಪಂಪಿಂಗ್ ಕೇಂದ್ರಗಳನ್ನು ನಿರ್ಮಿಸಲಾಗಿದೆ. ಕರಾವಳಿ ಪ್ರದೇಶಗಳಿಂದ ಸಮುದ್ರದ ನೀರನ್ನು ಸಂಗ್ರಹಿಸಿ, ಪ್ರಾಥಮಿಕವಾಗಿ ಕಸ-ಕಡ್ಡಿಗಳನ್ನು ಸೋಸಿ, ನಂತರ ಸೋಡಿಯಂ ಹೈಪೋಕ್ಲೋರೈಟ್‌ನಿಂದ ಸೋಂಕುರಹಿತಗೊಳಿಸಿ ಪಂಪ್ ಮಾಡಲಾಗುತ್ತದೆ.

ಸಂಪೂರ್ಣ ಶುದ್ಧೀಕರಣದ ಅಗತ್ಯವಿಲ್ಲದ ಕಾರಣ ಈ ಪ್ರಕ್ರಿಯೆಯು ಕಡಿಮೆ ವೆಚ್ಚದ್ದಾಗಿದೆ. ಇಂದು ಈ ಸಮುದ್ರದ ನೀರಿನ ಫ್ಲಶಿಂಗ್ ಜಾಲವು ಹಾಂಗ್ ಕಾಂಗ್‌ನ ಸುಮಾರು ಶೇ.85 ಕ್ಕೂ ಹೆಚ್ಚು ಜನ ಸಂಖ್ಯೆಯನ್ನು ತಲುಪಿದೆ. ಇಡೀ ನಗರದಲ್ಲಿ 1,600 ಕಿಮೀ‌ಗೂ ಹೆಚ್ಚು ಉದ್ದದ ಪ್ರತ್ಯೇಕ ಸಮುದ್ರದ ನೀರಿನ ಪೈಪ್‌ಲೈನ್‌ಗಳಿವೆ. ಜತೆಗೆ ಹತ್ತಾರು ಬೃಹತ್ ಪಂಪಿಂಗ್ ಸ್ಟೇಷನ್‌ಗಳು ಹಾಗೂ ಮೀಸಲು ಜಲಾಶಯಗಳು ನಿರಂತರವಾಗಿ ಕಾರ್ಯಾಚರಿಸುತ್ತಿವೆ.

ಹಾಂಗ್ ಕಾಂಗ್‌ನ ಜಲ ಸರಬರಾಜು ಇಲಾಖೆಯ ಪ್ರಕಾರ, ಇಷ್ಟು ಬೃಹತ್ ಪ್ರಮಾಣದಲ್ಲಿ ಹಾಗೂ ಇಡೀ ನಗರವನ್ನೇ ವ್ಯಾಪಿಸಿರುವ ಉಪ್ಪುನೀರಿನ ಫ್ಲಶಿಂಗ್ ಜಾಲವನ್ನು ನಿರ್ವಹಿಸುತ್ತಿರುವ ವಿಶ್ವದ ಏಕೈಕ ಮೆಗಾಸಿಟಿ ಹಾಂಗ್ ಕಾಂಗ್ ಮಾತ್ರ. ಈ ವ್ಯವಸ್ಥೆಯಿಂದ ಉಳಿತಾಯವಾಗುತ್ತಿರುವ ಸಿಹಿನೀರಿನ ಪ್ರಮಾಣ ಅತ್ಯಂತ ಗಮನಾರ್ಹ.

ಅಂಕಿಅಂಶಗಳ ಪ್ರಕಾರ, ಹಾಂಗ್ ಕಾಂಗ್ ನಗರವು ದಿನವೊಂದಕ್ಕೆ ಸರಾಸರಿ 8,41,000 ಕ್ಯೂಬಿಕ್ ಮೀಟರ್ (ಅಂದರೆ ಸುಮಾರು 841 ಮಿಲಿಯನ್ ಲೀಟರ್) ಸಮುದ್ರದ ನೀರನ್ನು ಕೇವಲ ಶೌಚಾ ಲಯಗಳಿಗಾಗಿ ಬಳಸುತ್ತದೆ. ಇದರರ್ಥ ಪ್ರತಿದಿನ ಅಷ್ಟೇ ಪ್ರಮಾಣದ ಅಮೂಲ್ಯ ಸಿಹಿನೀರು ಚರಂಡಿ ಸೇರುವುದು ತಪ್ಪುತ್ತಿದೆ.

ವಾರ್ಷಿಕವಾಗಿ ಲೆಕ್ಕಹಾಕಿದರೆ ನೂರಾರು ಬಿಲಿಯನ್ ಲೀಟರ್ ಸಿಹಿನೀರು ಉಳಿತಾಯವಾಗುತ್ತಿದ್ದು, ನಗರದ ನೀರಿನ ಭದ್ರತೆಗೆ ಇದು ಅತಿದೊಡ್ಡ ರಕ್ಷಣಾ ಕವಚವಾಗಿದೆ. ಸಮುದ್ರದ ನೀರಿನ ಬಳಕೆಯು ತಾಂತ್ರಿಕ ಸವಾಲುಗಳನ್ನು ಸಹ ತಂದೊಡ್ಡಿದೆ. ಉಪ್ಪುನೀರಿನಲ್ಲಿರುವ ನೈಸರ್ಗಿಕ ಲವಣಾಂಶಗಳು ಲೋಹದ ಪೈಪುಗಳನ್ನು ಬೇಗನೆ ತುಕ್ಕು ಹಿಡಿಸುತ್ತವೆ. ಇದನ್ನು ಮೆಟ್ಟಿ ನಿಲ್ಲಲು ಹಾಂಗ್ ಕಾಂಗ್ ವಿಶೇಷ ಪ್ಲಾಸ್ಟಿಕ್, ಡಕ್ಟೈಲ್ ಐರನ್ ಮತ್ತು ತುಕ್ಕು ನಿರೋಧಕ ಲೇಪನ ಹೊಂದಿರುವ ಪೈಪ್‌ಗಳನ್ನು ಅಳವಡಿಸಿದೆ.

ಶೌಚಾಲಯಗಳ ಫಿಟ್ಟಿಂಗ್ಸ್‌ಗಳಲ್ಲೂ ತುಕ್ಕು ನಿರೋಧಕ ಸಾಮಗ್ರಿಗಳನ್ನು ಬಳಸಲು ಕಟ್ಟಡ ನಿಯಮಾವಳಿಗಳನ್ನು ಕಡ್ಡಾಯಗೊಳಿಸಲಾಗಿದೆ. ನಿರಂತರ ನಿರ್ವಹಣೆ ಮತ್ತು ನಿಗಾ ವ್ಯವಸ್ಥೆಯು ಈ ಜಾಲವನ್ನು ದಶಕಗಳಿಂದ ಸುಸ್ಥಿರವಾಗಿ ಇರಿಸಿದೆ. ಪರಿಸರ ಮತ್ತು ಆರ್ಥಿಕ ದೃಷ್ಟಿಯಿಂದಲೂ ಈ ಯೋಜನೆ ಅಪಾರ ಪ್ರಯೋಜನಕಾರಿ. ಸಿಹಿನೀರನ್ನು ಶುದ್ಧೀಕರಿಸಲು, ದೂರದ ನದಿಗಳಿಂದ ತರಲು ಅಥವಾ ಸಮುದ್ರದ ನೀರನ್ನು ಕುಡಿಯುವ ನೀರನ್ನಾಗಿ ಪರಿವರ್ತಿಸಲು ಅಗಾಧ ಪ್ರಮಾಣದ ವಿದ್ಯುತ್ ಮತ್ತು ಹಣ ಬೇಕಾಗುತ್ತದೆ.