ಬೆಂಗಳೂರು: ಮಾಗಡಿ ರಸ್ತೆಯಲ್ಲಿ ಸಂಭವಿಸಬಹುದಾಗಿದ್ದ ಅನಾಹುತವೊಂದನ್ನು ಹೊಯ್ಸಳ ಪೋಲೀಸ್ ಸಿಬ್ಬಂದಿಯ ಸಮಯಪ್ರಜ್ಞೆ ತಪ್ಪಿಸಿದೆ. ದ್ವಿಚಕ್ರ ವಾಹನ ಚಲಾಯಿಸುವಾಗ ದಿಢೀರ್ ಹೃದಯಾಘಾತಕ್ಕೊಳಗಾದ 34 ವರ್ಷದ ಚಾಲಕನಿಗೆ ಪೋಲೀಸರು ಸಿಪಿಆರ್ (CPR) ನೀಡುವ ಮೂಲಕ ನವಜೀವನ ನೀಡಿದ್ದಾರೆ.
ರವೀ (34) ಎಂಬ ವ್ಯಕ್ತಿ ಮಾಗಡಿ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ತಮ್ಮ ದ್ವಿಚಕ್ರ ವಾಹನದಲ್ಲಿ ಸಾಗುತ್ತಿದ್ದಾಗ ಹಠಾತ್ತನೆ ಎದೆನೋವು ಕಾಣಿಸಿಕೊಂಡಿದೆ. ತಕ್ಷಣವೇ ಎಚ್ಚೆತ್ತ ರವಿ, ವಾಹನವನ್ನು ರಸ್ತೆಯ ಬದಿಗೆ ನಿಲ್ಲಿಸಿದ್ದಾರೆ. ಅದೇ ಸಮಯದಲ್ಲಿ ಗಸ್ತಿನಲ್ಲಿದ್ದ 'ಹೊಯ್ಸಳ-88' ವಾಹನದ ಸಿಬ್ಬಂದಿ, ರಸ್ತೆಯ ಬದಿಯಲ್ಲಿ ತೀವ್ರ ಯಾತನೆಯಿಂದ ಒದ್ದಾಡುತ್ತಿದ್ದ ರವಿಯವರನ್ನು ಗಮನಿಸಿದ್ದಾರೆ.
ಪರಿಸ್ಥಿತಿಯ ಗಂಭೀರತೆಯನ್ನು ತಕ್ಷಣವೇ ಗ್ರಹಿಸಿದ ಹೊಯ್ಸಳ ಸಿಬ್ಬಂದಿ, ತಡಮಾಡದೇ ರವಿಯವರಿಗೆ ಪ್ರಥಮ ಚಿಕಿತ್ಸೆಯಾಗಿ 'ಸಿಪಿಆರ್' (ಕೃತಕ ಉಸಿರಾಟ ಮತ್ತು ಎದೆ ಒತ್ತುವ ಚಿಕಿತ್ಸೆ) ನೀಡಿದ್ದಾರೆ. ಪೋಲೀಸರ ಈ ಸಮಯೋಚಿತ ನಡೆಯಿಂದಾಗಿ ರವಿಯವರ ಜೀವ ಉಳಿದಿದ್ದು, ಬಳಿಕ ಅವರನ್ನು ಹೆಚ್ಚಿನ ಚಿಕಿತ್ಸೆಗಾಗಿ ಹತ್ತಿರದ ಆಸ್ಪತ್ರೆಗೆ ದಾಖಲಿಸಲಾಗಿದೆ.
ಸಮಯಪ್ರಜ್ಞೆ ಮೆರೆದು ಜೀವರಕ್ಷಕರಾದ ಹೊಯ್ಸಳ-88 ಸಿಬ್ಬಂದಿಯ ಕಾರ್ಯಕ್ಷಮತೆ ಹಾಗೂ ಕ್ಷಿಪ್ರ ಸ್ಪಂದನೆಗೆ ಸಾರ್ವಜನಿಕ ವಲಯದಲ್ಲಿ ವ್ಯಾಪಕ ಪ್ರಶಂಸೆ ವ್ಯಕ್ತವಾಗಿದೆ.
pic.twitter.com/bmvOE1PhLv