ಪಂದ್ಯದ ಆರಂಭದಲ್ಲೇ ಇಶಾನ್ ಕಿಶನ್ ಚೆಂಡನ್ನು ಮಿಡ್‌ವಿಕೆಟ್ ಕಡೆಗೆ ತಳ್ಳಿ ಸಿಂಗಲ್ ರನ್ ಓಡಲು ಮುಂದಾದರು. ಆದರೆ, ಇಂಗ್ಲೆಂಡ್ ತಂಡದ ಹ್ಯಾರಿ ಬ್ರೂಕ್ ಅತ್ಯಂತ ವೇಗವಾಗಿ ಚೆಂಡನ್ನು ತಡೆದಿದ್ದನ್ನು ನೋಡಿದ ಅಭಿಷೇಕ್ ಶರ್ಮಾ ರನ್ ಬೇಡ ಎಂದು ನಿರಾಕರಿಸಿದರು. ಅಷ್ಟರಲ್ಲಾಗಲೇ ಇಶಾನ್ ಕ್ರೀಸ್‌ನಿಂದ ಸಾಕಷ್ಟು ಮುಂದೆ ಬಂದಿದ್ದರು. ಅವರು ವಾಪಸ್ ಓಡಿ ಡೈವ್ ಮಾಡಿದರೂ ಕೂಡ ರನ್ ಔಟ್ ಆಗುವುದರಿಂದ ತಪ್ಪಿಸಿಕೊಳ್ಳಲು ಸಾಧ್ಯವಾಗಲಿಲ್ಲ. ಇದು ಇಶಾನ್ ಸತತವಾಗಿ ಎರಡನೇ ಬಾರಿಗೆ ರನ್ ಔಟ್ ಆದ ದುರಂತವಾಗಿತ್ತು.

ಈ ರನ್ ಔಟ್ ಅನ್ನು ಥರ್ಡ್ ಅಂಪೈರ್ ಪರಿಶೀಲಿಸುತ್ತಿದ್ದಾಗ, ಮೈದಾನದಲ್ಲಿ ಇಬ್ಬರ ನಡುವೆ ನಡೆದ ವಾಗ್ವಾದ ಸ್ಟಂಪ್ ಮೈಕ್‌ನಲ್ಲಿ ಸ್ಪಷ್ಟವಾಗಿ ದಾಖಲಾಗಿದೆ:

ಅಭಿಷೇಕ್: "ನೀನು ಕ್ರೀಸ್ ತಲುಪಿದ್ಯಾ ಇಲ್ವಾ?"

ಇಶಾನ್: "ನನಗೆ ಗೊತ್ತಿಲ್ಲ..."

ಅಭಿಷೇಕ್: "ತುಂಬಾ ಹತ್ತಿರ ಇತ್ತಾ (Close)?"

ಇಶಾನ್: "ಹೌದು, ಕ್ಲೋಸ್ ಇತ್ತು."

ಅಭಿಷೇಕ್: "ಏನ್ ಮಾಡ್ತಾ ಇದ್ದೀಯಾ ಮ್ಯಾನ್, ಇಶಾನ್ ನೀನು?"

ಇಶಾನ್: "ನಾನು ಮುನ್ನಡೆದಿದ್ದೆ ಅಲ್ವಾ? ಅದು ನನ್ನ ಕಾಲ್ (Call) ಆಗಿತ್ತು."

ಅಭಿಷೇಕ್: "ಆದರೆ ಫೀಲ್ಡರ್ ಎಲ್ಲಿ ನಿಂತಿದ್ದಾನೆ ಅಂತ ಕಣ್ಣು ಬಿಟ್ಟು ಸರಿಯಾಗಿ ನೋಡು!"

ಇಶಾನ್ ಕಿಶನ್ ರನ್ ಔಟ್ ಆದ ನಂತರ ಅಭಿಷೇಕ್ ಶರ್ಮಾ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದು ವಿಡಿಯೋದಲ್ಲಿ ಕಂಡುಬಂದಿದೆ. ಆದರೆ, ಈ ಆರಂಭಿಕ ಗೊಂದಲದ ಹೊರತಾಗಿಯೂ ಅಭಿಷೇಕ್ ಶರ್ಮಾ ಭರ್ಜರಿ ಬ್ಯಾಟಿಂಗ್ ನಡೆಸಿ ಕೇವಲ 24 ಎಸೆತಗಳಲ್ಲಿ 59 ರನ್ ಚಚ್ಚಿದರು. ಸದ್ಯ ಈ ಇಬ್ಬರು ಯುವ ಆಟಗಾರರ ಮೈದಾನದ ಬಿಸಿಬಿಸಿ ಚರ್ಚೆಯ ವಿಡಿಯೋ ಕ್ರಿಕೆಟ್ ವಲಯದಲ್ಲಿ ಭಾರಿ ಸದ್ದು ಮಾಡುತ್ತಿದೆ.