നിയമസഭാ തിരഞ്ഞെടുപ്പ് ഫലം വരുമ്പോള് കേരളത്തില് വലിയ അത്ഭുതങ്ങള് സംഭവിക്കുമെന്നും കേരളത്തിന്റെ രാഷ്ട്രീയ ഭൂപടത്തില് ബിജെപി നിർണ്ണായക ശക്തിയായി മാറുന്ന കാഴ്ചയാകും ഇത്തവണ കാണാൻ സാധിക്കുകയെന്നും കേന്ദ്രമന്ത്രി സുരേഷ് ഗോപി.
കേരളത്തില് സർപ്രൈസ് ഉണ്ടാകുമെന്നും ബിജെപി നിർണായക ഘടകമാകുമെന്നും അദ്ദേഹം വോട്ട് ചെയ്യാനെത്തിയപ്പോള് മാധ്യമങ്ങളോട് പറഞ്ഞു. ഗുരുവായൂരില് വോട്ട് ചെയ്യാൻ സാധിച്ചുവെന്നും ഗുരുവായൂരപ്പന് നന്ദിയുണ്ടെന്നും അദ്ദേഹം കൂട്ടിച്ചേർത്തു.
ജനങ്ങളുടെ മാറ്റത്തിനായുള്ള ആഗ്രഹം വോട്ടായി മാറുമെന്ന ഉറച്ച വിശ്വാസത്തിലാണ് ബിജെപി നേതൃത്വമെന്നും അദ്ദേഹം വ്യക്തമാക്കി. തിരഞ്ഞെടുപ്പ് വേളയില് ശോഭ സുരേന്ദ്രനെതിരെ ഉയർന്നുവരുന്ന ആരോപണങ്ങളെ സുരേഷ് ഗോപി തള്ളിക്കളഞ്ഞു. ഇതെല്ലാം രാഷ്ട്രീയ ശത്രുക്കള് മെനഞ്ഞെടുത്ത വെറും 'പൊറാട്ട് നാടകങ്ങള്' മാത്രമാണെന്ന് അദ്ദേഹം പരിഹസിച്ചു. ഇത്തരം വ്യാജ പ്രചരണങ്ങള് ജനങ്ങള്ക്കിടയില് വിലപ്പോകില്ലെന്നും ബിജെപിയുടെ വിജയസാധ്യതയെ തകർക്കാൻ ഇത്തരം നീക്കങ്ങള്ക്കൊന്നും കഴിയില്ലെന്നും അദ്ദേഹം കൂട്ടിച്ചേർത്തു.