നമ്മുടെ നിത്യജീവിതത്തിലെ ഒഴിച്ചുകൂടാനാവാത്ത ഭാഗമായി മാറിയ സ്മാർട്ട്ഫോണുകളുടെ ഓരോ ഫീച്ചറും വലിയ ഗവേഷണങ്ങള്ക്ക് ശേഷമാണ് കമ്പനികള് രൂപകല്പ്പന ചെയ്യുന്നത്.
ഇതില് പ്രധാനപ്പെട്ട ഒന്നാണ് പവർ ബട്ടണിന്റെ സ്ഥാനം. നിലവില് വിപണിയിലിറങ്ങുന്ന ഭൂരിഭാഗം ഫോണുകളിലും പവർ ബട്ടണ് വലതുവശത്താണ് കാണാറുള്ളത്. ആദ്യകാല ഫോണുകളില് പവർ ബട്ടണിന് കൃത്യമായ ഒരു സ്ഥാനമുണ്ടായിരുന്നില്ലെങ്കിലും, ഉപഭോക്താക്കളുടെ സൗകര്യം കണക്കിലെടുത്താണ് പിന്നീട് ഇത് വലതുവശത്തേക്ക് മാറ്റപ്പെട്ടത്.
ലോകജനസംഖ്യയിലെ ഭൂരിഭാഗം ആളുകളും വലംകൈ ഉപയോഗിക്കുന്നവരാണ് എന്നതാണ് ഇതിന്റെ പ്രധാന കാരണം. നമ്മള് വലതുകൈയില് ഫോണ് പിടിക്കുമ്പോള് നമ്മുടെ തള്ളവിരല് സ്വാഭാവികമായും ഫോണിന്റെ വലതുവശത്തെ അരികിലാണ് വരിക. പവർ ബട്ടണ് ഈ ഭാഗത്ത് ക്രമീകരിക്കുന്നതിലൂടെ, ഫോണ് പിടിക്കുന്ന രീതിയില് മാറ്റം വരുത്താതെ തന്നെ വളരെ എളുപ്പത്തില് അത് ഓണ് ചെയ്യാനോ ഓഫ് ചെയ്യാനോ സാധിക്കുന്നു. ഇത് ഉപയോക്താക്കള്ക്ക് മികച്ച ഗ്രിപ്പും ഉപയോഗക്ഷമതയും നല്കുന്നു.
ഫോണുകളുടെ വലിപ്പം കൂടുന്നതനുസരിച്ച് ഒരു കൈകൊണ്ട് ഉപയോഗിക്കാനുള്ള സൗകര്യത്തിനാണ് കമ്പനികള് മുൻഗണന നല്കുന്നത്. ഇടംകൈയ്യന്മാരെ സംബന്ധിച്ചിടത്തോളം ഫോണ് പിടിക്കുമ്പോള് ചൂണ്ടുവിരലോ നടുവിരലോ ഉപയോഗിച്ച് പവർ ബട്ടണ് അമർത്താൻ ഈ സ്ഥാനം സഹായിക്കുന്നു. കേവലം യാദൃച്ഛികമായ ഒന്നല്ല, മറിച്ച് മനുഷ്യന്റെ ശാരീരിക പ്രത്യേകതകളും ഉപയോഗശീലങ്ങളും മുൻനിർത്തിയുള്ള ശാസ്ത്രീയമായ നീക്കമാണ് പവർ ബട്ടണിന്റെ ഈ സ്ഥാനമാറ്റം.