1996 ലോകകപ്പ് ക്വാർട്ടർ ഫൈനല്‍. ബംഗളൂരുവിലെ ചിന്നസ്വാമി സ്റ്റേഡിയം തിങ്ങിനിറഞ്ഞിരിക്കുന്നു. ഇന്ത്യയും പാകിസ്ഥാനും നേർക്കുനേർ!

288 എന്ന വിജയലക്ഷ്യം തേടി പാകിസ്ഥാൻ കുതിക്കുന്നു. ക്യാപ്റ്റൻ ആമിർ സൊഹൈല്‍ ക്രീസില്‍ നിറഞ്ഞാടുന്നു. പാകിസ്ഥാൻ അനായാസം ജയത്തിലേക്ക് നീങ്ങുകയാണെന്ന് തോന്നിയ നിമിഷം. അവിടെയാണ് ചരിത്രം വഴിമാറിയത്!

15-ാം ഓവർ. വെങ്കിടേഷ് പ്രസാദ് പന്തെറിയുന്നു. സൊഹൈല്‍ ക്രീസില്‍ നിന്ന് ഇറങ്ങി വന്ന് പ്രസാദിന്റെ പന്ത് കവർ ബൗണ്ടറിയിലേക്ക് അടിച്ചകറ്റി. വെറുമൊരു ഷോട്ടായിരുന്നില്ല അത്, പ്രസാദിനെ നോക്കി ബാറ്റുകൊണ്ട് വെല്ലുവിളിച്ചുകൊണ്ട് സൊഹൈല്‍ ആംഗ്യം കാണിച്ചു: 'പോയി പന്തെടുത്തുവാ, അടുത്ത പന്തും ഞാൻ അവിടെ അടിക്കും!' സ്റ്റേഡിയം നിശബ്ദമായി. പ്രസാദിന്റെ കണ്ണുകളില്‍ രോഷം കത്തിപ്പടർന്നു

പ്രസാദ് ഒന്നും മിണ്ടിയില്ല. തിരിഞ്ഞു നടന്ന് ബോളിംഗ് മാർക്കിലേക്ക്. അടുത്ത പന്ത്… സൊഹൈല്‍ അതേ ആവേശത്തില്‍ വീണ്ടും ഒരു വലിയ ഷോട്ടിന് ശ്രമിച്ചു. പക്ഷെ ഇത്തവണ ബാറ്റും പന്തും തമ്മില്‍ ഒരു ബന്ധവുമില്ലായിരുന്നു! പന്ത് സൊഹൈലിന്റെ ഓഫ്-സ്റ്റമ്പ് തകർത്ത് വായുവില്‍ പറന്നു. ബംഗളൂരു ഗാലറി അലറിവിളിച്ചു! പ്രസാദ് അപ്പോള്‍ ചെയ്തത്? വിരല്‍ ചൂണ്ടി ഡ്രെസ്സിംഗ് റൂമിലേക്ക്, അതായത് 'പോയി വീട്ടിലിരിക്കാൻ'! ഇന്ത്യൻ ക്രിക്കറ്റ് ആരാധകർ ഒരിക്കലും മറക്കാത്ത ആ കാഴ്ച