ജൂലൈ ഒൻപതിനാണ് സംസ്കാര ചടങ്ങുകള്‍ നിശ്ചയിച്ചിരിക്കുന്നത് എന്ന് ഇറാന്റെ സ്റ്റേറ്റ് മീഡിയ വ്യക്തമാക്കുന്നു. ഇന്ത്യൻ പ്രധാനമന്ത്രി നരേന്ദ്ര മോദി ഉള്‍പ്പെടെയുള്ള പ്രമുഖ ലോകനേതാക്കളെ ചടങ്ങിലേക്ക് ഔദ്യോഗികമായി ക്ഷണിച്ചിട്ടുള്ളതിനാല്‍ ആഗോള ശ്രദ്ധയാകർഷിക്കുന്ന വിദേശ പ്രതിനിധികളുടെ സുരക്ഷയും, ലക്ഷക്കണക്കിന് വരുന്ന ജനക്കൂട്ടത്തെ നിയന്ത്രിക്കലുമാണ് ഇറാൻ നേരിടുന്ന ഏറ്റവും വലിയ വെല്ലുവിളികള്‍. മുൻകാല അനുഭവങ്ങളുടെ പശ്ചാത്തലത്തില്‍ അതീവ ജാഗ്രതയോടെയാണ് ഇറാൻ അധികൃതർ മുന്നൊരുക്കങ്ങള്‍ നടത്തുന്നത്.

പ്രധാനമായും രണ്ട് കാരണങ്ങളാലാണ് ഖമനയിയുടെ സംസ്കാര ചടങ്ങിലെ സുരക്ഷാ ക്രമീകരണങ്ങള്‍ ലോകമെമ്പാടും ചർച്ചയാകുന്നത്. ലോകനേതാക്കളുടെ സാന്നിധ്യമാണ് അതില്‍ ഒന്നാമത്തേത്. പശ്ചിമേഷ്യയില്‍ കടുത്ത രാഷ്ട്രീയ അനിശ്ചിതാവസ്ഥ നിലനില്‍ക്കുന്ന സാഹചര്യത്തില്‍, ഇത്രയധികം വിദേശ വിവിഐപികള്‍ ഒരേസമയം ടെഹ്റാനില്‍ എത്തുമ്പോള്‍ അവർക്ക് നല്‍കേണ്ടി വരുന്ന സുരക്ഷാ വലയം ചെറുതല്ല. രണ്ടാമത്തെയും ഏറ്റവും നിർണായകവുമായ വെല്ലുവിളി ജനക്കൂട്ടത്തെ നിയന്ത്രിക്കുക എന്നതാണ്. ഖമനയിയോടുള്ള ആദരസൂചകമായി രാജ്യത്തിന്റെ വിവിധ ഭാഗങ്ങളില്‍ നിന്നും ലക്ഷക്കണക്കിന് ജനങ്ങള്‍ തലസ്ഥാനത്തേക്ക് ഒഴുകിയെത്തുമെന്നാണ് കണക്കാക്കുന്നത്. ഇത്രയും വലിയ ജനക്കൂട്ടം ഒരുമിച്ച്‌ തള്ളിക്കയറിയാല്‍ ഉണ്ടായേക്കാവുന്ന ആള്‍ക്കൂട്ട ദുരന്തങ്ങള്‍ (Stampede) ഒഴിവാക്കുക എന്നത് ഇറാൻ ഭരണകൂടത്തിന് വലിയ പരീക്ഷണമാകും.

ഇറാൻ ചരിത്രത്തിലെ ഒരു കറുത്ത അധ്യായം മുന്നിലുള്ളതുകൊണ്ട് തന്നെയാണ് ഇത്തവണ അധികൃതർ മുൻകൂട്ടി കടുത്ത സുരക്ഷാ തയാറെടുപ്പുകള്‍ ആരംഭിച്ചിരിക്കുന്നത്. 1989 ജൂണ്‍ 3-ന് അന്നത്തെ പരമോന്നത നേതാവായിരുന്ന ആയത്തുല്ല രുഹൊല്ല ഖൊമൈനിയുടെ സംസ്കാര ചടങ്ങിനിടെയുണ്ടായ വൻ ജനക്കൂട്ട ദുരന്തത്തിന് ഇറാൻ സാക്ഷ്യം വഹിച്ചിട്ടുണ്ട്. അന്ന് നിയന്ത്രണം വിട്ട ജനക്കൂട്ടം പ്രിയ നേതാവിന്റെ ഭൗതികശരീരം വഹിച്ചുകൊണ്ടുള്ള പെട്ടിയിലേക്ക് ഇരച്ചുകയറുകയും വസ്ത്രങ്ങള്‍ കീറിയെടുക്കാൻ ശ്രമിക്കുകയും ചെയ്തതോടെ കടുത്ത നടപടികള്‍ സ്വീകരിക്കേണ്ടി വരികയും സംസ്കാര ചടങ്ങുകള്‍ തന്നെ നീണ്ടുപോകുകയും ചെയ്തിരുന്നു. ആ ചരിത്രം ഇത്തവണ ആവർത്തിക്കാതിരിക്കാൻ സൈന്യത്തെയും റവല്യൂഷണറി ഗാർഡുകളെയും ഉള്‍പ്പെടുത്തി വിപുലമായ സുരക്ഷാ പ്ലാനാണ് ഇറാൻ ഭരണകൂടം തയ്യാറാക്കിയിരിക്കുന്നത്.