കൊല്ക്കത്ത : തൃണമൂല് കോണ്ഗ്രസ് ഛാത്ര പരിഷത്തിന്റെ (ടിഎംസിപി) സ്ഥാപക ദിന റാലിയുമായി ബന്ധപ്പെട്ട് കല്ക്കട്ട ഹൈക്കോടതി പുറപ്പെടുവിച്ച നിബന്ധനകള് ലംഘിച്ചതിന് മുൻ പശ്ചിമ ബംഗാള് മുഖ്യമന്ത്രി മമത ബാനർജിക്കെതിരെ കൊല്ക്കത്ത പോലീസ് കേസെടുത്തു.
കൊല്ക്കത്തയിലെ ഹേസ്റ്റിംഗ്സ് പോലീസ് സ്റ്റേഷനിലാണ് പോലീസിന്റെ സ്വമേധയാ ഉള്ള നടപടിയുടെ ഭാഗമായി കേസ് (എഫ്ഐആർ) രജിസ്റ്റർ ചെയ്തിരിക്കുന്നത്. മമത ബാനർജിയെ കൂടാതെ റാലിയുടെ സംഘാടകർക്കെതിരെയും കോടതി ഉത്തരവ് ലംഘിച്ചതിന് കേസ് എടുത്തിട്ടുണ്ട്.
കോളേജ് സ്ട്രീറ്റിലും കാത്തഡ്രല് റോഡിലും സംഘടിപ്പിച്ച റാലിയില് പൊതുജനങ്ങള്ക്കും വാഹനങ്ങള്ക്കും തടസ്സമില്ലാത്ത രീതിയില് ഗതാഗതം ക്രമീകരിക്കണമെന്നും നിശ്ചിത മാനദണ്ഡങ്ങള് പാലിക്കണമെന്നും ഹൈക്കോടതി വ്യക്തമായി നിർദ്ദേശിച്ചിരുന്നു. എന്നാല് പരിപാടിയുടെ ഭാഗമായി കൊല്ക്കത്ത നഗരത്തിലെ പ്രധാന പാതകള് പൂർണ്ണമായി തടസ്സപ്പെടുകയും ഗതാഗതം മണിക്കൂറുകളോളം സ്തംഭിക്കുകയും ചെയ്തുവെന്നാണ് ആരോപണം. ഹൈക്കോടതി വിധിച്ച ഉപാധികള് കാറ്റില്പ്പറത്തിയാണ് പൊതുസമ്മേളനം നടത്തിയതെന്ന് കാണിച്ച് ബിജെപി നേതാക്കളും പ്രതിപക്ഷവും ശക്തമായ പ്രതിഷേധവുമായി രംഗത്തെത്തിയിരുന്നു.
കോടതി ഉത്തരവുകള് ലംഘിച്ചതിന്റെ പശ്ചാത്തലത്തില് പോലീസിന്റെ കേസിന് പുറമെ, വിഷയം വീണ്ടും കല്ക്കട്ട ഹൈക്കോടതിക്ക് മുന്നിലെത്തിക്കാൻ പ്രതിപക്ഷം ആലോചിക്കുന്നുണ്ട്. എന്നാല് പ്രതിപക്ഷത്തിന്റെ രാഷ്ട്രീയ സമ്മർദ്ദത്തിന് വഴങ്ങിയാണ് പോലീസ് അന്വേഷണം എന്ന് തൃണമൂല് കോണ്ഗ്രസ് വൃത്തങ്ങള് ആരോപിച്ചു. വരും ദിവസങ്ങളില് കേസിന്റെ തുടർനടപടികളില് എല്ലാ സാക്ഷികളുടെയും പങ്കാളിത്തവും സംഘാടകരുടെ പങ്കും വിശദമായി പരിശോധിക്കുമെന്ന് മുതിർന്ന പോലീസ് ഉദ്യോഗസ്ഥർ വ്യക്തമാക്കിയിട്ടുണ്ട്.