ജന്തർ മന്തറില് നടന്ന പ്രതിഷേധങ്ങള്ക്കിടെ പോലീസുകാർക്ക് നേരെ അരങ്ങേറിയത് സമാനതകളില്ലാത്ത ക്രൂരതയെന്ന് വ്യക്തമാക്കി പരിക്കേറ്റ ദില്ലി പോലീസ് ഉദ്യോഗസ്ഥരുടെ കുടുംബങ്ങള്.
സിജെപി (CJP) പ്രവർത്തകർ നടത്തിയ പ്രതിഷേധത്തിനിടെ ക്രൂരമായി ആക്രമിക്കപ്പെടുകയും പിന്നീട് സോഷ്യല് മീഡിയയിലൂടെ കള്ളപ്രചാരണങ്ങള് നേരിടേണ്ടി വരികയും ചെയ്ത ഉദ്യോഗസ്ഥരുടെ ദുരനുഭവങ്ങളാണ് കുടുംബാംഗങ്ങള് പരസ്യമായി വെളിപ്പെടുത്തിയത്. കുറ്റക്കാർക്കെതിരെ കർശന നടപടി സ്വീകരിക്കണമെന്നും പ്രതിഷേധിച്ച വിദ്യാർത്ഥികളെയും അക്രമം അഴിച്ചുവിട്ട സാമൂഹിക വിരുദ്ധരെയും കൃത്യമായി തിരിച്ചറിയണമെന്നും ഇവർ ആവശ്യപ്പെട്ടു.
മുൻ മരീൻ കമാൻഡോയും നിലവില് ദില്ലി പോലീസില് സബ് ഇൻസ്പെക്ടറുമായ ഉദ്യോഗസ്ഥന്റെ മകള് വെളിപ്പെടുത്തിയത് കേട്ടവർ ഞെട്ടലോടെയാണ് കേട്ടത്. ജൂലൈ 25-ന് ഉച്ചയ്ക്ക് രണ്ട് മണിയോടെ ജന്തർ മന്തറിലെ വേദിക്ക് സമീപത്തു വെച്ച് അക്രമികള് ഇയാളെ കൂട്ടത്തോടെ വലിിച്ചിഴച്ച് കൊലപ്പെടുത്താൻ ശ്രമിക്കുകയായിരുന്നു. ആക്രമണത്തില് ഗുരുതരമായി പരിക്കേറ്റ ഇയാള് റാം മനോഹർ ലോഹിയ ആശുപത്രിയില് നാല് മണിക്കൂറോളമാണ് ബോധരഹിതനായി കിടന്നത്. രാത്രി പത്ത് മണിയോടെ സഹപ്രവർത്തകർ രക്തം പുരണ്ട യൂണിഫോമുമായി ഇയാളെ വീട്ടിലെത്തിച്ചപ്പോള് കുടുംബം തകർന്നുപോയി. എന്നാല് പരിക്കേറ്റ ഉദ്യോഗസ്ഥനെ സോഷ്യല് മീഡിയയിലൂടെ ക്രിമിനലായി ചിത്രീകരിക്കാനാണ് പ്രതിഷേധക്കാർ ശ്രമിച്ചതെന്നും മകള് ആരോപിക്കുന്നു.
മറ്റൊരു അസിസ്റ്റന്റ് കമ്മീഷണർ ഓഫ് പോലീസിന്റെ (ACP) ഭാര്യയും ജൂലൈ 20-ന് നടന്ന സംഘർഷത്തില് ഭർത്താവിനേറ്റ പരിക്കുകളെക്കുറിച്ച് വൈകാരികമായി സംസാരിച്ചു. അന്നേദിവസം അർദ്ധരാത്രിയോടെ ശരീരമാസകലം പരിക്കുകളുമായി ഭർത്താവ് വീട്ടിലെത്തിയപ്പോള് താനും രണ്ടു വയസ്സുള്ള മകളും കടുത്ത ഭീതിയിലായെന്ന് ഇവർ പറഞ്ഞു. കടമ നിർവ്വഹിക്കുന്നതിനിടെ ക്രൂരമായ ആക്രമണം നേരിടേണ്ടി വന്ന ഉദ്യോഗസ്ഥരെ പിന്തുണയ്ക്കണമെന്നും, അക്രമത്തിന് പിന്നില് പ്രവർത്തിച്ചവർക്കെതിരെ ശക്തമായ നിയമനടപടി വേണമെന്നും കുടുംബങ്ങള് സർക്കാരിനോടും പോലീസിനോടും ആവശ്യപ്പെട്ടു.