കേസുമായി മുന്നോട്ട് പോകാൻ അമേരിക്കയ്ക്ക് നിയമപരമായ അധികാരമില്ലെന്ന് അദാനി ഗ്രൂപ്പ് വാദിച്ചു. ന്യൂയോർക്ക് ഈസ്റ്റേണ്‍ ഡിസ്ട്രിക്‌ട് കോടതിയാണ് അദാനിയുടെ അപേക്ഷ പരിഗണിച്ചത്. ഏപ്രില്‍ 30നകം കേസ് തള്ളണമെന്ന് ആവശ്യപ്പെട്ട് ഔദ്യോഗികമായി അപേക്ഷ നല്‍കാൻ കോടതി നിർദ്ദേശിച്ചു.

അദാനി ഗ്രൂപ്പിന്റെ പ്രധാന വാദങ്ങള്‍
കേസിനാസ്പദമായ ഇടപാടുകള്‍ നടന്നത് ഇന്ത്യയിലായതിനാല്‍ ഇതില്‍ ഇടപെടാൻ യുഎസ് കോടതികള്‍ക്ക് നിയമപരമായ അധികാരമില്ലെന്നാണ് അദാനി ഗ്രൂപ്പിന്റെ പ്രധാന വാദം. കൈക്കൂലി നല്‍കിയെന്ന ആരോപണത്തിന് അടിസ്ഥാനമില്ലെന്നും എസ്‌ഇസിയുടെ പരാതികള്‍ യുഎസ് സെക്യൂരിറ്റീസ് നിയമങ്ങളുടെ പരിധിയില്‍ വരില്ലെന്നും അദാനി കോടതിയില്‍ ബോധിപ്പിച്ചു. കൂടാതെ, അദാനി ഗ്രീൻ എനർജി പുറത്തിറക്കിയ 750 മില്യണ്‍ ഡോളറിന്റെ ബോണ്ടുകള്‍ 2024ല്‍ പലിശയടക്കം പൂർണ്ണമായും തിരിച്ചടച്ചതായും, നിക്ഷേപകർക്ക് യാതൊരുവിധ സാമ്പത്തിക നഷ്ടവും ഉണ്ടായിട്ടില്ലെന്നും അഭിഭാഷകർ ചൂണ്ടിക്കാട്ടി. ബോണ്ടുകള്‍ വിറ്റത് അമേരിക്കയ്ക്ക് പുറത്താണെന്നും ഈ ഇടപാടുകളില്‍ ഗൗതം അദാനി നേരിട്ട് പങ്കാളിയായിട്ടില്ലെന്നും നിയമസംഘം കോടതിയെ അറിയിച്ചു.

എന്താണ് കേസ്?
ഇന്ത്യയില്‍ സൗരോർജ്ജ കരാറുകള്‍ ഉറപ്പിക്കുന്നതിനായി ഗ്രൂപ്പ് ഉദ്യോഗസ്ഥർക്ക് 250 മില്യണ്‍ ഡോളറിലധികം കൈക്കൂലി നല്‍കിയെന്നും, ഈ വിവരം മറച്ചുവെച്ച്‌ യുഎസ് നിക്ഷേപകരില്‍ നിന്ന് ഫണ്ട് സമാഹരിച്ചെന്നുമാണ് എസ്‌ഇസി ആരോപിക്കുന്നത്. 2024 നവംബറിലാണ് ഈ കേസ് ഫയല്‍ ചെയ്തത്. എന്നാല്‍ ഈ ആരോപണങ്ങള്‍ അദാനി ഗ്രൂപ്പ് പൂർണ്ണമായും നിഷേധിച്ചു.

ആദ്യഘട്ട വിജയം
വാദം കേള്‍ക്കാനുള്ള കോടതിയുടെ തീരുമാനം അദാനി ഗ്രൂപ്പിന് ഈ നിയമപോരാട്ടത്തില്‍ നിർണ്ണായകമായ ആദ്യഘട്ട വിജയമാണ് നല്‍കിയിരിക്കുന്നത്. വിചാരണയിലേക്ക് കടക്കാതെ തന്നെ കേസ് തുടക്കത്തിലേ ഒഴിവാക്കാനുള്ള അവസരമാണ് ഇതിലൂടെ ഗ്രൂപ്പിന് ലഭിച്ചിരിക്കുന്നത്.

A US court allows the Adani Group to argue for the dismissal of the SEC's fraud suit. Adani claims the US lacks jurisdiction over Indian solar energy contracts.