റിലയൻസ് ഇൻഡസ്ട്രീസിന്റെ പ്രതിദിനം 660,000 ബാരല്‍ ശേഷിയുള്ള റിഫൈനറിയിലെ ക്രൂഡ് യൂണിറ്റും മറ്റ് അനുബന്ധ യൂണിറ്റുകളും ഈ മാസം പകുതിയോടെ അറ്റകുറ്റപ്പണികള്‍ക്കായി താല്‍ക്കാലികമായി അടച്ചിടുന്നു.

സാധാരണ നിലയിലുള്ള അറ്റകുറ്റപ്പണികള്‍ക്കായി മൂന്ന് മുതല്‍ നാല് ആഴ്ച വരെയാണ് ഈ നിയന്ത്രണം ഏർപ്പെടുത്തുന്നത്. ലോകത്തിലെ ഏറ്റവും വലിയ റിഫൈനറി സമുച്ചയമായ ഇവിടെ ആഭ്യന്തര വിപണിയിലേക്ക് പ്രധാനമായും ഇന്ധനം എത്തിക്കുന്ന രണ്ട് വലിയ ക്രൂഡ് ഡിസ്റ്റിലേഷൻ യൂണിറ്റുകളാണ് ഉള്ളത്. ഇതിലൊന്നാണ് ഇപ്പോള്‍ അറ്റകുറ്റപ്പണിക്കായി മാറ്റുന്നത്.

രാജ്യത്ത് ഇന്ധനക്ഷാമം ഉണ്ടാകാതിരിക്കാൻ സ്വകാര്യ എണ്ണക്കമ്പനിയായ നയാര എനർജി തങ്ങളുടെ റിഫൈനറിയിലെ പ്രവർത്തനങ്ങള്‍ പുനരാരംഭിച്ച ശേഷമായിരിക്കും റിലയൻസ് അറ്റകുറ്റപ്പണികള്‍ തുടങ്ങുക. മെയ് പകുതിയോടെ ഈ പ്രക്രിയ ആരംഭിക്കുമെന്നാണ് റിപ്പോർട്ടുകള്‍ സൂചിപ്പിക്കുന്നത്. നിലവില്‍ റിലയൻസിന് ഇതിനു പുറമെ പ്രതിദിനം 704,000 ബാരല്‍ ശേഷിയുള്ള കയറ്റുമതി കേന്ദ്രീകൃതമായ മറ്റൊരു റിഫൈനറി കൂടിയുണ്ട്.