ഇന്ത്യയുടെ ആകെ മെഡല് നേട്ടം 65 ആയി. ഗുസ്തിയിലും സെയ്ലിംഗിലുമായിരുന്നു ഇന്നലെ ഇന്ത്യയുടെ വെള്ളി നേട്ടം.

സെയ്ലിംഗ് പുരുഷ സ്കിഫില് മലയാളി താരങ്ങളായ മനു ഫ്രാന്സിസ്, പ്രിന്സ് നോബിള് കുരിശിങ്കല് ടീം വെള്ളി സ്വന്തമാക്കി. ഇരുവരും കസിൻസാണ്. ചൈനയ്ക്കു (16 പോയിന്റ്) പിന്നില് 23 പോയിന്റുമായാണ് ഇന്ത്യ വെള്ളിയിലെത്തിയത്. ഹോങ്കോംഗിനാണ് (23) വെങ്കലം.

വനിതാ സ്കിഫ് സെയ്ലിംഗില് ഹർഷിത തോമർ - ശീതള്‍ വർമ സഖ്യം ഇന്ത്യൻ അക്കൗണ്ടില്‍ വെങ്കലം എത്തിച്ചു.

പുരുഷ വിഭാഗം 97 കിലോഗ്രാം ഗുസ്തിയില് ഇന്ത്യയുടെ നിതേഷ് സിവാച്ച്‌ വെള്ളി സ്വന്തമാക്കി. ഫൈനലില് ജപ്പാന്റെ യൂറി നകാസോട്ടോയോട് 4-0നു പരാജയപ്പെട്ടാണ് നിതേഷ് വെള്ളിയിലൊതുങ്ങിയത്. മംഗോളിയയുടെ ഗന്ബാതര്യനെ സെമിയില് വീഴ്ത്തിയായിരുന്നു (9-0) ഇന്ത്യന് താരത്തിന്റെ ഫൈനല് പ്രവേശം.

സ്ക്വാഷ്, അമ്പെയ്ത്ത്

സ്ക്വാഷില് ഇന്നലെ രണ്ടു വെങ്കലം ഇന്ത്യന് അക്കൗണ്ടിലെത്തി. പുരുഷ-വനിതാ ടീം ഇനങ്ങളില് സെമിയില് പരാജയപ്പെട്ടതോടെയാണ് ഇന്ത്യ വെങ്കലത്തില് ഒതുങ്ങിയത്. വനിതാ ടീം ഇനത്തില് ഹോങ്കോംഗിനോടാണ് (2-1) ഇന്ത്യയുടെ തോല്വി. പുരുഷന്മാര് മലേഷ്യയോടും (2-1) സെമിയില് തോറ്റു.

അമ്പെയ്ത്തില് ടി.ജി. മണിരത്നമാണ് വെങ്കലം എയ്തു സ്വന്തമാക്കിയത്. പുരുഷ വ്യക്തിഗത കോംബോണ്ട് ഇനത്തിലായിരുന്നു മണിരത്നത്തിന്റെ വെങ്കലം.

റിക്കാര്ഡ് ബ്രോസ്...

ഏഷ്യന് ഗെയിംസ് ചരിത്രത്തില് പുരുഷ സ്കിഫ് സെയ്ലിംഗില് മെഡല് നേടുന്ന ആദ്യ ഇന്ത്യന് താരങ്ങള് എന്ന നേട്ടത്തോടെയാണ് കസിന് ബ്രോസായ പ്രിന്സും മനുവും വെള്ളിയണിഞ്ഞത്. കൊച്ചി സ്വദേശികളായ ഇരുവരും 2022, 2023 ഏഷ്യന് സെയ്ലിംഗ് ചാമ്പ്യന്ഷിപ്പ് വെങ്കല മെഡല് ജേതാക്കളാണ്.

2018 വെള്ളപ്പൊക്കത്തില് ജീവന് നഷ്ടപ്പെട്ട മത്സ്യത്തൊഴിലാളിയുടെ മകനാണ് പ്രിന്സ് നോബിള്. കുട്ടിക്കാലം മുതല് കടലും വെള്ളവും പ്രിന്സിന്റെ ജീവിതഭാഗമായിരുന്നു. പ്രിന്സും മനുവും ഒന്നിച്ചതോടെ രാജ്യത്തിനായി മെഡല് നേടുന്ന കേരളത്തിന്റെ അഭിമാനങ്ങളായി.

അച്ഛന്റെ മരണശേഷം തന്റെ സ്വപ്നത്തിനായി ഒപ്പം നിന്നത് അമ്മയാണെന്ന് പ്രിന്സ് മനസ് തുറന്നു. ഈ ചരിത്ര ഏഷ്യന് ഗെയിംസ് മെഡല് അച്ഛനും അമ്മയ്ക്കും കോച്ചുമാര്ക്കും സമര്പ്പിക്കുന്നതായും അദ്ദേഹം കൂട്ടിച്ചേര്ത്തു.

13-ാം വയസ് മുതല് പ്രിന്സ് സെയ്ലിംഗ് ആരംഭിച്ചതാണ്. നോബിള് 14-ാം വയസിലും തുടങ്ങി. ഇന്ത്യന് ആര്മി ജീവനക്കാരാണ് ഇരുവരും.