ന്യൂഡല്‍ഹി: എസ്‌ഐആർ പൂർത്തിയായ കേരളം അടക്കം സംസ്ഥാനങ്ങളില്‍ എസ്‌ഐആർ പട്ടികയില്‍നിന്ന് ഒഴിവായ വോട്ടർമാരെ തിരികെ ഉള്‍പ്പെടുത്താനുള്ള നടപടിക്ക് നിർദേശം നല്‍കി തെരഞ്ഞെടുപ്പ് കമ്മീഷൻ.
അർഹരായ ആരെയും ഒഴിവാക്കരുതെന്ന് സംസ്ഥാന ഇലക്ടറല്‍ ഉദ്യോഗസ്ഥരെ കമ്മീഷൻ അറിയിച്ചു.
പഴയ പട്ടികയും പുതിയ പട്ടികയും താരതമ്യം ചെയ്ത് ഒഴിവായവരെ കണ്ടെത്താനും നിർദേശത്തില്‍ പറയുന്നു. ഇവരുടെ വീടുകളില്‍ ഉള്‍പ്പെടെ പോയി ഫോം സിക്സ് വഴി വോട്ടർ പട്ടികയില്‍ ചേർക്കണം. എസ്‌ഐആർ പൂർത്തിയായ സംസ്ഥാനങ്ങളില്‍ പഴയ ഫോം സിക്സ് ആകും ഉപയോഗിക്കുക. എസ്‌ഐആർ നടക്കുന്ന മഹാരാഷ്ട്രയില്‍ വോട്ടർമാരെ ഒഴിവാക്കാൻ ധൃതി കാണിക്കരുതെന്ന് ഉദ്യോഗസ്ഥരോട് കമ്മീഷൻ അറിയിച്ചു.
സംശയത്തിന്റെ പേരില്‍ മാത്രം ലിസ്റ്റില്‍നിന്ന് ആരെയും ഒഴിവാക്കി നിർത്തരുതെന്നാണ് നിർദേശം. അതേസമയം ഒരു രാജ്യം ഒരു തെരഞ്ഞെടുപ്പ് ചർച്ച ചെയ്യുന്ന പാർലമെന്ററി സമിതി സുപ്രീംകോടതിയിലേക്കുള്ള സന്ദർശനം മാറ്റിവച്ചു. ചൊവ്വാഴ്ച നടത്താനിരുന്ന സന്ദർശനമാണ് സമിതി മാറ്റിയത്.