നഗോയ്: ഏഷ്യൻ ഗെയിംസിന്റെ 13-ാം ദിനത്തിലും ഇന്ത്യയ്ക്ക് സുവർണനേട്ടം. വനിതാ ബോക്സിംഗ്, ആർച്ചറി, പുരുഷ ഗുസ്തി, പുരുഷ ബോക്സിംഗ് എന്നിവ ഉള്‍പ്പെടെ നാല് സ്വർണം നേടിയ ഇന്ത്യയുടെ ആകെ സ്വർണനേട്ടം 15 ആയി ഉയർന്നു.
ഇതോടെ മെഡല്‍ പട്ടികയില്‍ ഇന്ത്യ അഞ്ചാം സ്ഥാനത്തെത്തി.
15 സ്വർണം, 25 വെള്ളി, 35 വെങ്കലം ഉള്‍പ്പടെ ആകെ 75 മെഡലായി. വനിതകളുടെ 65 കിലോഗ്രാം ബോക്സിംഗ് ഫൈനലില്‍ ചൈനീസ് തായ്പെയുടെ ചെൻ നിയെൻ-ചിന്നിനെ പരാജയപ്പെടുത്തി പർവീണ്‍ ഹൂഡ ഇന്ത്യയ്ക്കായി 13-ാം സ്വർണം സ്വന്തമാക്കി. പാരീസ് ഒളിമ്പിക്സിലെ വെങ്കല മെഡല്‍ ജേതാവാണ് ചെൻ നിയെൻ ചിൻ.
ഒരു ഏഷ്യൻ ഗെയിംസ് പതിപ്പില്‍ രണ്ട് ഇന്ത്യൻ വനിതാ ബോക്സർമാർ സ്വർണം നേടുന്നത് ഇതാദ്യമാണ്. നേരത്തെ വനിതകളുടെ 75 കിലോഗ്രാം വിഭാഗത്തില്‍ ചൈനയുടെ ബാവോ സിയെ 5-0ന് പരാജയപ്പെടുത്തി ലവ്ലിന ബൊർഗോഹെയ്ൻ ഇന്ത്യയുടെ 12-ാം സ്വർണം നേടിയിരുന്നു.
ഇതോടെ ഇതിഹാസ താരം മേരി കോമിന് ശേഷം ഏഷ്യൻ ഗെയിംസില്‍ സ്വർണം നേടുന്ന രണ്ടാമത്തെ മാത്രം ഇന്ത്യൻ വനിതാ ബോക്സറായി ലവ്ലിന മാറി. അതേസമയം ബോക്സിംഗ് പുരുഷന്മാരുടെ 80 കിലോഗ്രാം വിഭാഗത്തില്‍ അങ്കുഷ് പംഗലും സ്വർണം നേടി.
പിന്നാലെ ഗുസ്തിയിലും ഇന്ത്യക്കായി സുജീത് പൊന്നണിഞ്ഞു. പുരുഷന്മാരുടെ ഗുസ്തി ഫ്രീസ്റ്റൈല്‍ 65 കിലോഗ്രാം വിഭാഗത്തിസാണ് സുജീത് കല്‍കല്‍ സ്വർണം നേടിയത്. 2-9 എന്ന നിലയില്‍ നിന്ന് ശക്തമായി തിരിച്ചുവന്നാണ് സുജീത് ഒന്നാമതെത്തിയത്.