തിരൂരങ്ങാടി: പൊതുപണിമുടക്കു ദിവസം ഡ്രൈവിംഗ് സ്കൂളുകാരുടെ മദ്യസത്കാരത്തില് പങ്കെടുത്തുവെന്ന ആരോപണത്തെ തുടര്ന്നു മലപ്പുറം ജില്ലയിലെ തിരൂരങ്ങാടി സബ് ആര്.ടി ഓഫീസിലെ രണ്ട് എംവിഐമാരെ സസ്പെന്ഡ് ചെയ്തു. സുനില്ബാബു, ബെന്നി വര്ഗീസ് എന്നിവരെയാണ് സംസ്ഥാന ട്രാന്സ്പോര്ട്ട് കമ്മീഷണര് സസ്പെന്ഡ് ചെയ്തത്. തൃശൂരിലെ ഗതാഗത ഡെപ്യൂട്ടി ട്രാന്സ്പോര്ട്ട് കമ്മീഷണര് എം. സുരേഷ് തിരൂരങ്ങാടി ജോയിന്റ് ആര്ടി ഓഫീസിലെത്തി നല്കിയ അന്വേഷണ റിപ്പോര്ട്ടിന്റെ അടിസ്ഥാനത്തിലാണ് നടപടി.
ദേശീയ പണിമുടക്ക് ദിവസം തലപ്പാറയിലെ സ്വകാര്യ ഹോട്ടലില് ഡ്രൈവിംഗ് സ്കൂളുകാര്ക്കുള്ള ട്രാഫിക് ബോധവത്കരണ ക്ലാസിന് ശേഷമായിരുന്നു മദ്യസത്കാരം. ഹോട്ടലില് സത്ക്കാരം സംഘടിപ്പിച്ച കാര്യം എംവിഐ സുനില് ബാബു വാട്സ് ആപ്പ് ഗ്രൂപ്പില് ശബ്ദസന്ദേശമിട്ടിരുന്നു.
ഇതിന്റെ വീഡിയോ സമൂഹമാധ്യമങ്ങളില് വൈറലായി. ഇതോടെ ഗതാഗത മന്ത്രി എ.കെ ശശീന്ദ്രന് അന്വേഷണത്തിനു ഉത്തരവിട്ടു. തിരൂരങ്ങാടി ജോയിന്റ് ആര്ടിഒ, രണ്ട് എംവിഐമാര്, ഒരു എഎംവിഐ എന്നിവരാണ് ക്ലാസിനെത്തിയത്.