പാലക്കാട്: ഐഐടി പാലക്കാട് ടെക്നോളജി ഇന്നൊവേഷൻ ഫൗണ്ടേഷൻ (ടെക്‌ഇൻ) സംഘടിപ്പിക്കുന്ന 'സമഗ്ര 2.0 ഐഐടി പാലക്കാട് ഇന്നൊവേഷൻ സമ്മിറ്റ് 2026' 29, 30 തീയതികളില്‍ തിരുവനന്തപുരം ഹയാത്ത് റീജൻസിയില്‍ നടക്കും.
മുഖ്യമന്ത്രി വി.ഡി. സതീശൻ ഉദ്ഘാടനം ചെയ്യും.
മന്ത്രി പി.കെ. കുഞ്ഞാലിക്കുട്ടി ചടങ്ങില്‍ മുഖ്യാതിഥിയായി പങ്കെടുക്കും. ജലവും ശുചിത്വവും, മെഡിക്കല്‍ ടെക്നോളജി, അഗ്രി ആൻഡ് ഫുഡ് ടെക്നോളജി തുടങ്ങിയ പ്രധാന മേഖലകളിലെ വളർന്നുവരുന്ന നൂതനാശയങ്ങളില്‍ ശ്രദ്ധ കേന്ദ്രീകരിക്കുന്ന രണ്ടു ദിവസത്തെ സമ്മേളനത്തില്‍ ഉപയോക്താക്കളും നിക്ഷേപകരുമായി ആശയവിനിമയത്തിനും വിപണി സാധ്യതകള്‍ കണ്ടെത്താനും സർക്കാർ ഇതര സാന്പത്തിക സഹായം ഉറപ്പാക്കാനും സ്റ്റാർട്ടപ്പുകള്‍ക്ക് അവസരമൊരുക്കും.
ഐഐടിയില്‍നിന്നു തെരഞ്ഞെടുത്ത ഗവേഷണങ്ങളും സാങ്കേതികവിദ്യകളും ഇവയുടെ വ്യാവസായിക ഉപയോഗം, സാങ്കേതികവിദ്യാ കൈമാറ്റം, വാണിജ്യവത്കരണം എന്നിവയ്ക്കുള്ള സാധ്യതകള്‍ ഉള്‍പ്പെടുത്തി പ്രദർശിപ്പിക്കുന്ന ‘ഐഐടി പാലക്കാട് റിസർച്ച്‌ ഷോക്കേസ്’ സമഗ്രയുടെ പ്രധാന ആകർഷണങ്ങളിലൊന്നായിരിക്കും.
500ലധികം പങ്കാളികള്‍, തെരഞ്ഞെടുക്കപ്പെട്ട 40 സ്റ്റാർട്ടപ്പുകള്‍, 30 പ്രമുഖ പ്രഭാഷകർ എന്നിവർ സമഗ്രയുടെ ഭാഗമാകും. സംരംഭകർ, നിക്ഷേപകർ, വ്യവസായ പ്രതിനിധികള്‍, ഗവേഷകർ എന്നിവർക്കായി ബിസിനസ് കൂടിക്കാഴ്ചകള്‍ക്കും അവസരമുണ്ടാകും.
തെരഞ്ഞെടുത്ത സംരംഭങ്ങളും നവീനാശയങ്ങളും ഉള്‍പ്പെടുത്തി സ്റ്റാർട്ടപ്പ് എക്സ്പോ, ഇൻവെസ്റ്റർ പിച്ചിംഗ് സെഷനുകള്‍, ബിസിനസ് നിക്ഷേപങ്ങള്‍ക്കു വഴിയൊരുക്കുന്ന കൂടിക്കാഴ്ചകള്‍, വ്യവസായവിദ്യാഭ്യാസ സ്റ്റാർട്ടപ്പ് മേഖലകളിലെ വിദഗ്ധർ നയിക്കുന്ന സെഷനുകള്‍, സ്റ്റാർട്ടപ്പുകളെ ഉപഭോക്താക്കളുമായും പങ്കാളികളുമായും ബന്ധിപ്പിക്കുന്ന ബിസിനസ് സഹകരണാവസരങ്ങള്‍ എന്നിവയാണ് സമഗ്ര 2.0 യുടെ പ്രധാന സവിശേഷതകള്‍. പങ്കെടുക്കാൻ താത്പര്യമുള്ളവർക്ക് samagra.techin-iitpkd.org ലൂടെ രജിസ്റ്റർ ചെയ്യാം.