Thursday, 05 Aug, 12.06 pm ദീപിക

പ്രവാസി ഗള്‍ഫ്‌
സെപ്റ്റംബറില്‍ സ്കൂളുകള്‍ തുറന്ന് പ്രവര്‍ത്തിക്കുമെന്ന് കുവൈറ്റ് വിദ്യാഭ്യാസ മന്ത്രാലയം

കുവൈറ്റ് സിറ്റി : സെപ്റ്റംബര്‍ ആദ്യ വാരത്തില്‍ സര്‍ക്കാര്‍ ,സ്വകാര്യ സ്കൂളുകള്‍ തുറക്കുമെന്ന് അധികൃതര്‍ അറിയിച്ചു. നേരത്തെ വിദ്യാഭ്യാസ സമിതി നല്‍കിയ ശുപാര്‍ശയാണ് മന്ത്രിസഭ അംഗീകാരം നല്‍കിയത്. ആരോഗ്യ മന്ത്രാലയത്തിന്‍റെ കോവിഡ് മാര്‍ഗ്ഗ നിര്‍ദ്ദേശങ്ങള്‍ അനുസരിച്ചായിരിക്കും സ്കൂളുകള്‍ പ്രവര്‍ത്തിക്കുക. ഒരു ക്ലാസില്‍ പരമാവധി ഇരുപത് കുട്ടികള്‍ക്ക് മാത്രമാണ് പ്രവേശനം നല്‍കുക.

അതേസമയം കുത്തിവയ്പ് എടുക്കാത്ത വിദ്യാര്‍ത്ഥികള്‍ക്ക് സ്കൂളില്‍ പ്രവേശിക്കണമെങ്കില്‍ ഓരോ ആഴ്ചയിലും പിസിആര്‍ പരിശോധന ഫലം നല്‍കണമെന്നും വിദ്യാഭ്യാസ സമിതി ശുപാര്‍ശ ചെയ്തു. ഇത് സംബന്ധമായി സര്‍ക്കുലര്‍ വിദ്യാഭ്യാസ സ്ഥാപനങ്ങള്‍ക്ക് ഉടന്‍ കൈമാറുമെന്ന് പ്രാദേശിക പത്രം റിപ്പോര്‍ട്ട് ചെയ്തു. നിര്‍ദ്ദേശങ്ങള്‍ നടപ്പാക്കുന്നതിനായി വിദ്യാഭ്യാസ മന്ത്രിയുടെ നേതൃത്വത്തില്‍ ആരോഗ്യ, മാധ്യമ, ആഭ്യന്തര, മറ്റ് സര്‍ക്കാര്‍ ഉദ്യോഗസ്ഥരെ ഉള്‍പ്പെടുത്തി ഉന്നത സമിതി രൂപീകരിക്കുമെന്ന് അധികൃതര്‍ അറിയിച്ചു.

സ്കൂളിലേക്ക് മടങ്ങുന്ന തീയതികള്‍, ഓണ്‍ലൈനില്‍ നിന്ന് ഓഫ്‌ലൈന്‍ രീതികളിലേക്ക് മാറുന്നതിനുള്ള നടപടികളും സമിതി തീരുമാനിക്കും. സ്കൂളിലെ ആരോഗ്യ സാഹചര്യങ്ങള്‍ കൈകാര്യം ചെയ്യുന്നതിനായി ആരോഗ്യ വകുപ്പിന്‍റെ നേതൃത്വത്തില്‍ പരിശീലനവും ബോധവല്‍ക്കരണ പരിപാടികളും നടത്തുമെന്നും സെപ്റ്റംബറിന് മുമ്ബായി പരമാവധി വിദ്യാര്‍ത്ഥികള്‍ക്ക് പ്രതിരോധ കുത്തിവയ്പ്പ് നല്‍കാനും തീരുമാനിച്ചതായി അധികൃതര്‍ വ്യക്തമാക്കി.

റിപ്പോര്‍ട്ട്: സലിം കോട്ടയില്‍
Dailyhunt
Disclaimer: This story is auto-aggregated by a computer program and has not been created or edited by Dailyhunt. Publisher: Deepika
Top