പ്രശസ്ത ഛായാഗ്രാഹകൻ ഷാജി കുമാറിന്റെ അകാലവിയോഗത്തില് വികാരനിർഭരമായ കുറിപ്പുമായി സംവിധായകൻ തരുണ് മൂർത്തി. മോഹൻലാല് നായകനായ തുടരും, റിലീസിനൊരുങ്ങുന്ന അതിമനോഹരം എന്നീ ചിത്രങ്ങളില് തരുണ് മൂർത്തിയുടെ ഛായാഗ്രാഹകനായി പ്രവർത്തിച്ചത് ഷാജികുമാർ ആയിരുന്നു.
ഛായാഗ്രാഹകൻ എന്നതിലുപരി തനിക്കൊരു സഹോദരതുല്യനായ വഴികാട്ടിയായിരുന്നു ഷാജി കുമാറെന്ന് തരുണ് പറയുന്നു.
തരുണ് മൂർത്തിയുടെ കുറിപ്പിന്റെ പൂർണരൂപം
‘അതെ... ഇതാണ് ഞങ്ങളുടെ അവസാന ചിത്രം. അദ്ദേഹത്തെക്കുറിച്ച് എത്ര എഴുതിയാലും മതിയാകില്ല. എനിക്ക് അദ്ദേഹം ആരായിരുന്നുവെന്ന് വാക്കുകളിലൂടെ പൂർണ്ണമായി വിവരിക്കാനാകില്ല. ആശയങ്ങളിലോ, മനോഭാവത്തിലോ, സൗന്ദര്യബോധത്തിലോ എനിക്ക് ഒരിക്കലും ഒപ്പമെത്താൻ കഴിയില്ലെന്ന് ഞാൻ വിശ്വസിച്ചിരുന്ന ഒരാളായിരുന്നു അദ്ദേഹം.
സിനിമയില് ഞങ്ങള് രണ്ട് വിരുദ്ധ ധ്രുവങ്ങളിലാണെന്നായിരുന്നു എന്റെ ധാരണ. എന്നാല് ചുറ്റുമുള്ള സിനിമാലോകം ഉണ്ടാക്കിയെടുത്ത വെറും കാഴ്ചപ്പാടുകളോ വിശ്വാസങ്ങളോ മാത്രമായിരുന്നു അവ.
ഞങ്ങളുടെ ജോലിയിലൂടെയും, സംഭാഷണങ്ങളിലൂടെയും, നിരന്തരമായ യാത്രകളിലൂടെയും, ഫോണ് കോളുകളിലൂടെയും, അവസാനമില്ലാത്ത മെസ്സേജുകളിലൂടെയും കലയുടെ ഒരേ ധ്രുവത്തില് ഞങ്ങള് പതിയെ ഒന്നായി. അറിഞ്ഞോ അറിയാതെയോ ഞങ്ങളുടെ ചിന്തകള് ഒന്നായി, സൗന്ദര്യബോധം ഒന്നായി, കാഴ്ചപ്പാട് ഒന്നായി, ഒടുവില് ഞങ്ങളുടെ ലക്ഷ്യവും ഒന്നായി മാറി.
എന്റെ ഛായാഗ്രാഹകൻ എന്നതിലുപരി, എനിക്കൊരു സഹോദരതുല്യനായ മാലാഖയായിരുന്നു അദ്ദേഹം. ഈ മേഖലയിലെ ഏറ്റവും മുതിർന്ന വ്യക്തികളില് ഒരാളെന്ന നിലയില്, എപ്പോഴും യാഥാർത്ഥ്യബോധത്തോടെ നിലകൊള്ളാനും, ജീവിതയാഥാർത്ഥ്യങ്ങള് മനസിലാക്കാനും, കാഴ്ചപ്പാടുകള് കൈവിടാതിരിക്കാനും അദ്ദേഹം എന്നെ പ്രേരിപ്പിച്ചിരുന്നു. എന്നെ സംബന്ധിച്ചിടത്തോളം, എന്റെ കരിയറിലും ജീവിതത്തിലും ഇതൊരു വലിയ നഷ്ടമാണ്. അങ്ങയുടെ സാന്നിധ്യം എനിക്ക് എന്നും നഷ്ടമായിരിക്കും.
എന്റെ ആ വിളിയും. “ഷാജിയേട്ടാ...”അതിനുള്ള അങ്ങയുടെ ആ ഉടനടിയുള്ള മറുപടിയും..“റെഡി, സാർ!”എനിക്ക് തീർച്ചയായും മിസ്സ് ചെയ്യും.
ഷാജിയേട്ടാ, അങ്ങയെ ഒരുപാട് മിസ് ചെയ്യും.'അതിമനോഹരം' എന്ന ചിത്രത്തിലൂടെ അങ്ങ് എനിക്ക് നല്കിയത് എന്താണെന്ന് ലോകത്തിന് മുന്നില് കാണിക്കാൻ ഞാൻ ആകാംക്ഷയോടെ കാത്തിരിക്കുകയാണ്. ലോകം പറയട്ടെ...“ഇതാണ് നിങ്ങളുടെ ഏറ്റവും മികച്ചത്.”

