സംഭവത്തില്‍ സിംഗരേണി പോളിടെക്നിക് കോളജ് അധ്യാപകൻ നവീൻ കുമാർ (38), സിംഗരേണി കല്‍ക്കരി ഖനി ജീവനക്കാരൻ രവി കുമാർ (35) എന്നിവർ പിടിയിലായി. പെണ്‍കുട്ടിയെ ബലമായി വിഷം കുടിപ്പിച്ചു കൊലപ്പെടുത്തിയതാണെന്ന് കണ്ടെത്തിയതിനെ തുടർന്നാണ് ഇരുവരെയും പൊലിസ് അറസ്റ്റ് ചെയ്തത്.

സിംഗരേണി പോളിടെക്നിക് കോളജില്‍ മുമ്പ് ഡിപ്ലോമ വിദ്യാർഥിയായിരുന്ന താണ്ട്ര, ഉസ്മാനിയ യൂണിവേഴ്സിറ്റിയില്‍ എൻജിനിയറിംഗ് പഠനത്തിന് ശേഷം പരിശീലനത്തിനായി സിംഗരേണി കല്‍ക്കരി ഖനിയില്‍ എത്തിയിരുന്നു. ഡിപ്ലോമ കാലത്ത് വിദ്യാർഥിയുമായി അടുപ്പത്തിലായിരുന്ന നവീൻ കുമാർ, പെണ്‍കുട്ടി രവി കുമാറുമായി സൗഹൃദത്തിലായത് ഇഷ്ടപ്പെട്ടിരുന്നില്ല. ഇതാണ് കൊലപാതകത്തിലേക്ക് നയിച്ചത്.

സെപ്റ്റംബർ 12-ന് ജോലി കഴിഞ്ഞ് മടങ്ങുകയായിരുന്ന പെണ്‍കുട്ടിയെ നവീൻ കുമാർ കാറില്‍ കയറ്റുകയും, രവി കുമാർ തന്നെ ലൈംഗികമായി പീഡിപ്പിച്ചു എന്ന് കാണിച്ച്‌ ഒരു ആത്മഹത്യ കുറിപ്പ് എഴുതി വാങ്ങിയ ശേഷം ബലമായി വിഷം കുടിപ്പിക്കുകയായിരുന്നു. തുടർന്ന് ബോധരഹിതയായ കുട്ടിയുടെ ഫോണില്‍ നിന്ന് അമ്മയെ വിളിച്ച്‌ വിവരം അറിയിക്കുകയും, മാതാപിതാക്കളെയും കൂട്ടി ആശുപത്രിയില്‍ എത്തിയ ശേഷം പ്രതി രക്ഷപ്പെട്ടു. ചികിത്സയിലിരിക്കെ അടുത്ത ദിവസം പെണ്‍കുട്ടി മരണത്തിന് കീഴടങ്ങുകയായിരുന്നു.

തുടർന്ന് പൊലിസ് നടത്തിയ അന്വേഷണത്തിലാണ് ഇത് ആത്മഹത്യയല്ലെന്നും, നവീൻ കുമാർ കൊലപെടുത്തിയതാണെന്നും കണ്ടെത്തിയത്. കേസിലെ മുഖ്യപ്രതിയായ നവീൻ കുമാറിനെയും, ലൈംഗിക പീഡന ആരോപണത്തിന് വിധേയനായ രവി കുമാറിനെയും പൊലിസ് അറസ്റ്റ് ചെയ്തു. സംഭവത്തില്‍ കൂടുതല്‍ അന്വേഷണം നടന്നുവരികയാണ്.