കേരളത്തില് കഴുകന്മാരുടെ ഏക ആവാസവ്യവസ്ഥയാണ് വയനാട്.

സര്വേയില് 54 ചുട്ടികഴുകന്മാരെയും 11 കാതിലകഴുകന്മാരെയുമാണ് കാണാനായതെന്ന് ഹ്യും സെന്റര് ഡയറക്ടര് സി.കെ. വിഷ്ണുദാസ് പറഞ്ഞു. വന്യജീവി സങ്കേതത്തിലെ എടക്കൊമ്പം, നല്ലതണ്ണി(ബത്തേരി റേഞ്ച്), കാക്കപ്പാടം, മരതകം(മുത്തങ്ങ റേഞ്ച്), ദൊഡ്ഡക്കുലശി(കുറിച്യാട് റേഞ്ച്), പുഞ്ചവയല്, അയ്യപ്പന്പാറ(തോല്പ്പെട്ടി റേഞ്ച്) എന്നിവിടങ്ങളിലെ തെരഞ്ഞെടുത്ത ഏഴ് നിരീക്ഷണ കേന്ദ്രങ്ങളിലാണ് സര്വേ നടന്നത്.

സംസ്ഥാനത്തിന്റെ വിവിധ ഭാഗങ്ങളില്നിന്നുള്ള 42 പക്ഷി നിരീക്ഷകരും ഗവേഷകരും വിദ്യാര്ഥികളും വന്യജീവി സ്നേഹികളും സര്വേയില് പങ്കാളികളായി. ഇവരെ ഒമ്പത് സംഘങ്ങളാക്കി വിവിധ കേന്ദ്രങ്ങളില് വിന്യസിച്ച്‌ ഒരേസമയത്തായിരുന്നു നിരീക്ഷണം.

സങ്കേതത്തിന്റെ വിവിധ ഭാഗങ്ങളെ പ്രതിനിധാനം ചെയ്യുന്ന തരത്തിലായിരുന്നു നിരീക്ഷണ കന്ദ്രങ്ങളുടെ തെരഞ്ഞെടുപ്പ്. കഴുകന്മാര് ആകാശത്ത് ഉയര്ന്നുപറക്കുന്നതും ചുറ്റിപ്പറക്കുന്നതും എളുപ്പത്തില് ശ്രദ്ധയില്പ്പെടുന്ന തുറന്ന കാഴ്ചയുള്ള പ്രദേശങ്ങള്ക്കാണ് നിരീക്ഷണ കേന്ദ്രങ്ങളുടെ തെരഞ്ഞെടുപ്പില് പ്രാധാന്യം നല്കിയത്.

സര്വേയില് കഴുകന്മാരുടെ ഇനം, എണ്ണം, നിരീക്ഷിച്ച സ്ഥലം, സമയം, പറക്കലിന്റെ ദിശ, പെരുമാറ്റ സവിശേഷതകള് എന്നിവ രേഖപ്പെടുത്തി. വിവിധ കേന്ദ്രങ്ങളില് 108 നിരീക്ഷണങ്ങളിലൂടെ 243 കഴുകന്മാരെയാണ് രേഖപ്പെടുത്തിയത്.

കഴുകന് വിശാല പ്രദേശങ്ങളില് സഞ്ചരിക്കുന്ന പക്ഷിയായതിനാല് വിവിധ കേന്ദ്രങ്ങളില് ഒരേപക്ഷിയെ ഒന്നിലധികം തവണ രേഖപ്പെടുത്താന് സാധ്യതയുണ്ട്. ഇത് പരിഗണിച്ച്‌ നിരീക്ഷണ സമയം, നിരീക്ഷണ കേന്ദ്രത്തില് നിന്നുള്ള ദൂരം, പറക്കലിന്റെ ദിശ, സഞ്ചാരരീതി തുടങ്ങിയ ഘടകങ്ങള് പരിശോധിച്ചാണ് സര്വേ കാലയളവില് രേഖപ്പെടുത്തിയ ചുട്ടി, കാതില കഴുകന്മാരുടെ എണ്ണം 65 ആയി കണക്കാക്കിയത്.

വിശാലമായ വനപ്രദേശങ്ങളുമായുള്ള ബന്ധവും വലിയ സസ്തനികളുടെ ജഡങ്ങള് ഉള്പ്പെടെ ഭക്ഷ്യലഭ്യതയും കഴുകന്മാര്ക്ക് യോജ്യമായ ആവാസവ്യവസ്ഥയായി വയനാട് വന്യജീവി സങ്കേതത്തെ മാറ്റുന്നതാണെന്ന് വിഷ്ണുദാസ് പറഞ്ഞു. കഴുകന്മാരുടെ എണ്ണം, സഞ്ചാരപഥങ്ങള് എന്നിവയും വിഷബാധ, വൈദ്യുതാഘാതം തുടങ്ങിയ ഭീഷണികളും മനസിലാക്കുന്നതിന് തുടര്ച്ചയായ നിരീക്ഷണം അനിവാര്യമാണെന്ന് അദ്ദേഹം അഭിപ്രായപ്പെട്ടു.