ടാറ്റ ഗ്രൂപ്പിന്റെ ഫാഷൻ, ലൈഫ്സ്റ്റൈല്‍ റീട്ടെയില്‍ കമ്പനിയായ ട്രെന്റ് ലിമിറ്റഡിന്റെ (BSE: 500251, NSE: TRENT ) ബോണസ് ഇഷ്യൂ, വ്യാഴാഴ്ച (ജൂണ്‍ 4) അരങ്ങേറും.

അർഹരായ ഓഹരി ഉടമകള്‍ക്ക് 1:2 അനുപാതത്തില്‍ ബോണസ് ഷെയർ വിതരണം (ബോണസ് ഇഷ്യൂ) ചെയ്യുമെന്നാണ് ട്രെന്റ് കമ്പനിയുടെ പ്രഖ്യാപനം. നിക്ഷേപകരുടെ കൈവശമുള്ള രണ്ട് ട്രെന്റ് ഓഹരിക്ക് അധികമായി ഒരു സൗജന്യ ഓഹരി വീതം ലഭിക്കുമെന്ന് സാരം.

ഇതിന്റെ ഭാഗമായി അർഹരായ നിക്ഷേപകരെ കണ്ടെത്തുന്നതിനായുള്ള റെക്കോഡ് തീയതി 2026 ജൂണ്‍ 4 (വ്യാഴാഴ്ച) ആണ്. അതുപോലെ ബോണസ് ഇഷ്യൂ നിലവിലെ ഓഹരി വിലയില്‍ പ്രതിഫലിക്കുന്ന എക്സ്-ബോണസ് തീയതിയായും ജൂണ്‍ 4 തന്നെയാണ് നിശ്ചയിച്ചിരിക്കുന്നത്. ട്രെന്റ് ഓഹരിയുടെ ചരിത്രത്തില്‍ ആദ്യമായാണ് നിക്ഷേപകർക്ക് ബോണസ് ഷെയർ സമ്മാനിക്കുന്നത്.

ബോണസ്: അർഹത എങ്ങനെ?

നിശ്ചിത റെക്കോഡ് തീയതിയില്‍ തങ്ങളുടെ ഡീമാറ്റ് അക്കൗണ്ടില്‍ ഓഹരികള്‍ സ്വന്തമായുള്ളവർക്കാണ് ബോണസ് ഷെയർ (ഏത് കോർപറേറ്റ് ആക്ഷനായാലും അങ്ങനെ തന്നെ) ലഭിക്കാനുള്ള അർഹത കൈവരുന്നത്. നിലവില്‍ T+1 സെറ്റില്‍മെന്റ് സൈക്കിളായതിനാല്‍ റെക്കോഡ് തീയതിയുടെ തലേദിവസം (ജൂണ്‍ 3) എങ്കിലും ഓഹരി വാങ്ങിയവർക്കാണ് ജൂണ്‍ 4-ന് (ട്രെന്റിന്റെ റെക്കോഡ് തീയതി) ഡീമാറ്റ് അക്കൗണ്ടില്‍ ആ ഓഹരി ക്രെഡിറ്റ് ചെയ്യപ്പെടുകയുള്ളു. അതുകൊണ്ട് റെക്കോഡ് തീയതിയില്‍ ഓഹരി വാങ്ങുന്നവർക്ക് ബോണസ് ഷെയർ കിട്ടാനുള്ള സാധ്യതയില്ല (T+1 സെറ്റില്‍മെന്റ് കഴിയുമ്പോള്‍ ജൂണ്‍ 5 ആകും).

ഓഹരിയിലെ മാറ്റം എങ്ങനെ?

ട്രെന്റ് ഓഹരിയുടെ ബോണസ് ഇഷ്യൂ 1:2 അനുപാതത്തിലാണ്. ഉദാഹരണത്തിന് റെക്കോഡ് തീയതിയില്‍ 10 ട്രെന്റ് ഓഹരികള്‍ ഡീമാറ്റ് അക്കൗണ്ടില്‍ സ്വന്തമായുള്ളവർക്ക് 5 ഓഹരി കൂടി സൗജന്യമായി കിട്ടും. അതോടെ ആ നിക്ഷേപകന്റെ പക്കലുള്ള മൊത്തം ട്രെന്റ് ഓഹരിയുടെ എണ്ണം 15 ആയി ഉയരും.

എന്നാല്‍ ബോണസ് ഇഷ്യൂവിന്റെ അനുപാതത്തില്‍ തന്നെ ഓഹരിയുടെ വിപണി വില ക്രമീകരിക്കപ്പെടും. അതുവഴി നിക്ഷേപകന്റെ കൈവശമുള്ള ഓഹരികളുടെ എണ്ണത്തില്‍ വർധനയുണ്ടാകുമെങ്കിലും മൊത്തം ഓഹരികളുടേയും വിപണി മൂല്യം മാറ്റമില്ലാതെ തുടരും. കമ്പനിയുടെ കരുതല്‍ ധനശേഖരത്തില്‍ നിന്നും ചെലവഴിക്കുന്ന മൂല്യം ഓഹരി വിലയില്‍ നിന്നും തട്ടിക്കിഴിക്കുന്നതിനും ഓഹരി വില്‍ക്കുന്നവരും വാങ്ങുന്നവരും തമ്മില്‍ നീതിപൂർവ്വകമായ ഇടപാടു നടത്തുന്നതിനും ഒക്കേ വേണ്ടിയാണ് ഇത്തരത്തില്‍ എക്സ്-തീയതികളില്‍ നിർദിഷ്ട കോർപറേറ്റ് ആക്ഷന്റെ ഗുണഫലം ഓഹരി വിലയില്‍ നിന്നും തട്ടിക്കിഴിക്കുന്നത്.

ഇത് പ്രകാരം, 1:2 അനുപാതത്തിലുള്ള ബോണസ് ഇഷ്യൂവിന്റെ എക്സ്-തീയതിയില്‍, ട്രെന്റ് ഓഹരിയുടെ വിലയില്‍ മൂന്നിലൊന്ന് കുറവുണ്ടാകും. ഉദ്ദാഹരണത്തിന് ട്രെന്റ് ഓഹരിയുടെ ഇന്നത്തെ ക്ലോസിങ് വിലനിലവാരം 4,279 രൂപയാണെങ്കില്‍, എക്സ്-ബോണസ് തീയതിയുടെ രാവിലത്തെ ഓപ്പണിങ്ങില്‍ ഓഹരിയുടെ വിപണി വിലയായി 2,853 രൂപയായാകും ആദ്യം രേഖപ്പെടുത്തുക. പിന്നീട് വ്യാപാരം പുരോഗമിക്കുമ്പോള്‍ അന്നത്തെ മാർക്കറ്റ് സെന്റിമെന്റ്സ് അനുസരിച്ച്‌ വിലയില്‍ വ്യത്യാസമുണ്ടാകും.