ഇന്ത്യയില് ഓരോ വർഷവും ദശലക്ഷക്കണക്കിന് ലൈഫ് ഇൻഷുറൻസ് പോളിസികള് വില്ക്കപ്പെടുന്നുണ്ടെങ്കിലും, അവ പുതുക്കുന്നവരുടെ (Renewal) എണ്ണത്തിലുണ്ടാകുന്ന ഇടിവ് ആശങ്കാജനകമാണെന്ന നിരീക്ഷമാണ് ധനമന്ത്രാലയം പങ്കുവെക്കുന്നത്.
കുടുംബത്തിന്റെ സാമ്പത്തിക സുരക്ഷിതത്വത്തിനായി ദീർഘകാലം തുടരേണ്ട ഒന്നാണെന്നിരിക്കെ, എന്തുകൊണ്ടാണ് ഉപഭോക്താക്കള് ഇത്തരം തീരുമാനങ്ങളില് നിന്ന് പിന്നോട്ട് പോകുന്നത് എന്നത് ഗൗരവകരമായ ചർച്ചകള്ക്ക് വഴിതുറക്കുന്നു.
പിന്മാറ്റത്തിനുള്ള പ്രധാന കാരണങ്ങള്
ഒരു സ്ട്രീമിംഗ് സബ്സ്ക്രിപ്ഷൻ റദ്ദാക്കുന്നതുപോലെ ലളിതമല്ല ഇൻഷുറൻസ് പോളിസി ഉപേക്ഷിക്കുന്നത്; അതിന് വലിയ സാമ്പത്തിക നഷ്ടമുണ്ടാകുമെന്ന് അറിഞ്ഞിട്ടും പലരും ഇതിന് തയ്യാറാകുന്നത് ആ പോളിസിയിലുള്ള വിശ്വാസം നഷ്ടപ്പെടുന്നത് കൊണ്ടാണ്.
മൂല്യത്തെക്കുറിച്ചുള്ള തെറ്റായ ധാരണ: പലപ്പോഴും ഇൻഷുറൻസ് വില്ക്കപ്പെടുന്നത് സാമ്പത്തിക സംരക്ഷണം എന്നതിനേക്കാള് നികുതി ലാഭിക്കാനോ, ഉറപ്പുള്ള ലാഭം നേടാനോ ഉള്ള മാർഗമായിട്ടാണ്. മറ്റ് നിക്ഷേപ മാർഗങ്ങളുമായി താരതമ്യം ചെയ്യുമ്പോള് കുറഞ്ഞ വരുമാനം മാത്രമേ ലഭിക്കുന്നുള്ളൂ എന്ന് ബോധ്യപ്പെടുമ്പോള് ഉപഭോക്താക്കള് പോളിസിയില് നിന്ന് പിന്മാറുന്നു.
വാഗ്ദാനങ്ങളും അനുഭവവും: പോളിസി വാങ്ങുമ്പോള് ലഭിക്കുന്ന വാഗ്ദാനങ്ങളും പിന്നീട് അത് ഉപയോഗിക്കുമ്പോള് ലഭിക്കുന്ന അനുഭവവും തമ്മിലുള്ള പൊരുത്തക്കേടുകള് ഉപഭോക്താക്കളെ നിരാശരാക്കുന്നു.
സാമ്പത്തിക സാഹചര്യങ്ങള്: വിലക്കയറ്റവും മാറുന്ന ജീവിതസാഹചര്യങ്ങളും വരുമാനത്തിലെ മാറ്റങ്ങളും പ്രീമിയം അടയ്ക്കുന്നത് ഒരു ഭാരമായി തോന്നിപ്പിക്കാൻ കാരണമാകുന്നു.
ഇൻഷുറൻസ് മേഖലയിലെ പോരായ്മകള്
ഇൻഷുറൻസ് കമ്പനികള് പുതിയ ഉപഭോക്താക്കളെ കണ്ടെത്തുന്നതിനാണ് (Acquisition) ഇപ്പോള് കൂടുതല് മുൻഗണന നല്കുന്നത്. എന്നാല്, നിലവിലുള്ള ഉപഭോക്താക്കളെ നിലനിർത്തുന്നതിനും അവരുമായുള്ള ദീർഘകാല ബന്ധത്തിനും വേണ്ടത്ര പ്രാധാന്യം നല്കുന്നില്ല. ഒരു ഇൻഷുറൻസ് പോളിസിയുടെ യഥാർത്ഥ വിജയം അത് എത്രത്തോളം വില്ക്കപ്പെട്ടു എന്നതിലല്ല, മറിച്ച് പത്ത് വർഷത്തിന് ശേഷവും എത്രത്തോളം ഉപഭോക്താക്കള് ആ പോളിസിയില് വിശ്വസിക്കുന്നു എന്നതിലാണ് അടങ്ങിയിരിക്കുന്നത്. വിശ്വാസം എന്നത് വില്പ്പനയുടെ സമയത്ത് മാത്രം ഉണ്ടാകേണ്ടതല്ല, മറിച്ച് ഉപഭോക്താവിന്റെ യാത്രയിലുടനീളം ഉറപ്പാക്കേണ്ട ഒന്നാണ്.