ഇന്ധന വിതരണം സാധാരണ നിലയിലാകാൻ ആഴ്ചകളല്ല, മറിച്ച്‌ മാസങ്ങള്‍ തന്നെ വേണ്ടിവരുമെന്നാണ് അയാട്ട ഡയറക്ടർ ജനറല്‍ വില്ലി വാല്‍ഷ് വ്യക്തമാക്കുന്നത്.

പ്രധാന കാരണങ്ങള്‍

മിഡില്‍ ഈസ്റ്റിലെ ഇന്ധന ശുദ്ധീകരണ ശാലകള്‍ക്കുണ്ടായ (Refining capacity) വ്യാപകമായ നാശനഷ്ടങ്ങളാണ് ഈ പ്രതിസന്ധിക്ക് പ്രധാന കാരണം. ക്രൂഡ് ഓയില്‍ നീക്കം പുനരാരംഭിച്ചാലും, അത് വിമാന ഇന്ധനമാക്കി മാറ്റുന്നതിനുള്ള തടസങ്ങള്‍ നിലനില്‍ക്കുന്നിടത്തോളം കുറവ് തുടരും. ഇന്ത്യയിലെയും നൈജീരിയയിലെയും ശുദ്ധീകരണ ശാലകള്‍ക്ക് ഈ കുറവ് നികത്താൻ സഹായിക്കാനാകുമെങ്കിലും അതിന് സമയം എടുക്കുമെന്ന് വില്ലി വാല്‍ഷ് പറഞ്ഞു.

യാത്രക്കാരെ എങ്ങനെ ബാധിക്കും?

സംഘർഷത്തെത്തുടർന്ന് വിമാന ഇന്ധന വില ഇരട്ടിയിലധികമായി വർദ്ധിച്ചിരുന്നു. വിമാനക്കമ്പനികളുടെ പ്രവർത്തനച്ചെലവിന്റെ ഏകദേശം 27 ശതമാനവും ഇന്ധനത്തിനായാണ് ചെലവാക്കുന്നത്. അതിനാല്‍ ഈ അധികച്ചെലവ് ടിക്കറ്റ് നിരക്ക് വർദ്ധനയിലൂടെ യാത്രക്കാരിലേക്ക് കൈമാറാൻ കമ്പനികള്‍ നിർബന്ധിതരാകും. ഈ പ്രതിസന്ധി കോവിഡ് കാലത്തെയത്ര രൂക്ഷമല്ലെങ്കിലും, 9/11 ആക്രമണത്തിന് ശേഷമുണ്ടായതിന് സമാനമായ തിരിച്ചുവരവ് കാലതാമസം (ഏകദേശം 4 മാസത്തിലധികം) വ്യോമയാന മേഖല നേരിടേണ്ടി വരുമെന്നാണ് വിദഗ്ധർ വിലയിരുത്തുന്നത്.