സുഹൈലിന്റെ പിറന്നാളിനു വാഹനം വാങ്ങിക്കൊടുത്തതായി നൂഹ സമൂഹമാധ്യമത്തിലൂടെ മുൻപു വ്യക്തമാക്കിയിരുന്നു. ഇതിന്റെ കൂടുതല്‍ വിവരങ്ങള്‍ അന്വേഷണസംഘം തേടിയേക്കും.

അതിനിടെ ഇത്രയും ദുഷ്കരമായ സാഹചര്യത്തില്‍ തനിക്കും തന്റെ കുടുംബത്തിനും കുറച്ചു സ്വകാര്യത നല്‍കണമെന്ന് അഭ്യർഥിക്കുന്നുവെന്നു നൂഹ സമൂഹ മാധ്യമത്തില്‍ പങ്കുവച്ച വിഡിയോയില്‍ പറഞ്ഞു. നഷ്ടപ്പെട്ടതു വിലപ്പെട്ട 3 ജീവനുകളാണ്. മക്കളെ നഷ്ടപ്പെടുന്നതിന്റെ വേദന ചിന്തിക്കാനാവില്ല. മരിച്ചവരുടെ കുടുംബങ്ങളെ പറ്റുന്നത്ര പിന്തുണയ്ക്കുമെന്നും കേസില്‍ സത്യസന്ധമായ അന്വേഷണം നടക്കട്ടെയെന്നും ഒട്ടേറെ അസത്യങ്ങള്‍ പ്രചരിക്കുകയാണെന്നും നൂഹ പറഞ്ഞു.

ഒക്ടോബർ 11നാണ് അപകടം നടന്നത്. സുഹൈല്‍ ഓടിച്ച ആഡംബര കാർ സ്കൂട്ടറില്‍ ഇടിച്ച്‌ കർണാടക സുള്ള്യ കനകമജലു സുണ്ണമൂല പെല്‍ത്തടുക്ക പി.എ.ഇബ്രാഹിമിന്റെ മകൻ മുഹമ്മദ് ഇയാസ് (22), വയനാട് കല്‍പ്പറ്റ മടക്കിമല സന്തോഷ്ഭവനില്‍ സന്തോഷിന്റെ മകള്‍ കെ.വി.ദേവിക (21), പാലക്കാട് മണ്ണാർക്കാട് കരിമ്പ ഇടക്കുറിശ്ശി നീലാറ്റ മുള്ളൻകുഴിയില്‍ പ്രദീപിന്റെ മകള്‍ എം.പി.ഗോപിക(22) എന്നിവരാണു മരിച്ചത്.