കാർ വാങ്ങുമ്പോള് മൈലേജും എൻജിനും ഫീച്ചറുകളും പുറംമോടിയുമൊക്കെയാണ് പലരും ആദ്യം നോക്കുന്നത്. എന്നാല് കാറിനുള്ളിലെ സീറ്റുകളും സ്റ്റിയറിങ്ങും ഡാഷ്ബോർഡും ഗിയർ ഏരിയയും ഒരുക്കാൻ ഉപയോഗിക്കുന്ന ലെതർ എവിടെനിന്നാണ് വരുന്നതെന്ന് പലർക്കും അറിയില്ല.
കാറിലെ ലെതർ ഇന്റീരിയറിനെക്കുറിച്ചുള്ള ഈ ചോദ്യം ഇപ്പോള് ശ്രദ്ധ നേടുകയാണ്.
സ്വാഭാവിക ലെതർ സാധാരണയായി കന്നുകാലികളുടെ, പ്രത്യേകിച്ച് പശുക്കളുടെയും കാളകളുടെയും തോലില് നിന്നാണ് നിർമ്മിക്കുന്നത്. ഇറച്ചി വേർതിരിച്ചശേഷം ലഭിക്കുന്ന തോല് പ്രത്യേക ടാനിങ് പ്രക്രിയയിലൂടെ ദൃഢമായ ലെതറായി മാറ്റുകയാണ് ചെയ്യുന്നത്. പിന്നീട് കാറിന്റെ സീറ്റുകള്, ഡാഷ്ബോർഡ്, ഗിയർ ഏരിയ തുടങ്ങിയ ഭാഗങ്ങളുടെ ആവശ്യത്തിനനുസരിച്ച് ഇത് മുറിച്ച് ഫിനിഷ് ചെയ്യും. ശക്തിയും കട്ടിയും കൂടുതലായതിനാലാണ് കന്നുകാലികളുടെ തോല് പല നിർമാതാക്കളും തിരഞ്ഞെടുക്കുന്നത്.
എന്നാല് കാറുകളില് ഉപയോഗിക്കുന്ന ലെതർ കന്നുകാലികളുടെ തോല് മാത്രമല്ല. ചില ആവശ്യങ്ങള്ക്ക് ആടിന്റെയും ചെമ്മരിയാടിന്റെയും തോലും ഉപയോഗിക്കാറുണ്ട്. മൃദുത്വവും വഴക്കവും കൂടുതലുള്ളതിനാല് ചെമ്മരിയാടിന്റെ ലെതർ ചില പ്രീമിയം ഇന്റീരിയറുകളില് ഉപയോഗിക്കുന്നു. അതേസമയം, താരതമ്യേന ചെലവ് കുറഞ്ഞതിനാല് എരുമയുടെ ലെതറും ചില വാഹനങ്ങളില് ഉപയോഗിക്കാം. കാറിനുള്ളിലെ ലെതർ സാധാരണ ലെതറില്നിന്ന് വ്യത്യസ്തമായി വൃത്തിയാക്കല്, സ്ഥിരമായ ഉപയോഗം, ചൂട്, സൂര്യപ്രകാശം, അള്ട്രാവയലറ്റ് രശ്മികള് എന്നിവയെ പ്രതിരോധിക്കാൻ പ്രത്യേകമായി ട്രീറ്റ് ചെയ്യുകയും ചെയ്യും.
അതേസമയം, മൃഗങ്ങളുടെ തോലില് നിന്നുള്ള ലെതറിന് പകരമായി സിന്തറ്റിക് ലെതറിന്റെ ഉപയോഗവും വർധിച്ചുവരികയാണ്. പോളിയുറത്തീൻ (PU), PVC തുടങ്ങിയ വസ്തുക്കള് ഉപയോഗിച്ച് യഥാർഥ ലെതറിന്റെ രൂപവും ടെക്സ്ചറും അനുകരിക്കുന്ന രീതിയിലാണ് ഇവ നിർമ്മിക്കുന്നത്. കുറഞ്ഞ ചെലവും പരിപാലിക്കാൻ എളുപ്പവുമാണ് സിന്തറ്റിക് ലെതറിനെ വാഹന ഇന്റീരിയറുകളില് ജനപ്രിയമാക്കുന്നത്. ആഡംബര വാഹനങ്ങളില് ഫുള്-ഗ്രെയിൻ, നുബക്ക്, ബോവൈൻ നാപ്പ തുടങ്ങിയ ഉയർന്ന നിലവാരത്തിലുള്ള ലെതറുകളും ഉപയോഗിക്കുന്നുണ്ട്. അതിനാല് ഒരു കാറിന്റെ സീറ്റില് കാണുന്ന ലെതർ ഏത് ഉറവിടത്തില് നിന്നുള്ളതാണെന്ന് വാഹനത്തിന്റെ മോഡല്, നിർമാതാവ്, വില വിഭാഗം എന്നിവ അനുസരിച്ച് വ്യത്യാസപ്പെടാം.