തൃക്കാക്കരയിലെ വോട്ടർ കൂടിയായ മമ്മൂട്ടിയോട് തനിക്ക് വോട്ട് നല്‍കണമെന്നും അനുഗ്രഹിക്കണമെന്നും അഭ്യർത്ഥിച്ചുകൊണ്ട് അഖില്‍ അയച്ച സന്ദേശത്തിന് ‘ബെസ്റ്റ് വിഷസ്’ എന്നാണ് താരം മറുപടി നല്‍കിയത്. രാഷ്ട്രീയ പ്രവേശനത്തെക്കുറിച്ചും പുതിയ കാഴ്ചപ്പാടുകള്‍ സൃഷ്ടിക്കാനുള്ള ആഗ്രഹത്തെക്കുറിച്ചും മമ്മൂട്ടിയെ അറിയിച്ച അഖില്‍, മറുപടിക്ക് നന്ദിയും രേഖപ്പെടുത്തി.

മോഹൻലാലിനും തന്റെ സ്ഥാനാർത്ഥിത്വം പ്രഖ്യാപിച്ച ഉടൻ തന്നെ അഖില്‍ മാരാർ സന്ദേശം അയച്ചിരുന്നു. ‘ജനവിധി തേടിയുള്ള മറ്റൊരു മത്സരം, ലാലേട്ടൻ അനുഗ്രഹിക്കണം’ എന്ന അഖിലിന്റെ വാക്കുകള്‍ക്ക് ‘സ്നേഹവും പ്രാർത്ഥനകളും’ എന്നാണ് മോഹൻലാല്‍ പ്രതികരിച്ചത്. ഈ രണ്ട് സൂപ്പർ താരങ്ങളുടെയും വാട്സാപ്പ് ചാറ്റുകളുടെ സ്ക്രീൻഷോട്ടുകള്‍ സോഷ്യല്‍ മീഡിയയില്‍ പങ്കുവെച്ചുകൊണ്ട് ‘മലയാളത്തിന്റെ മഹാനടന്മാരുടെ ആശംസകള്‍, ഒരായിരം സ്നേഹം’ എന്ന് അഖില്‍ മാരാർ തന്റെ ഫേസ്ബുക്കില്‍ കുറിച്ചു.

എൻഡിഎ മുന്നണിയുടെ ഭാഗമായി ട്വന്റി 20 സ്ഥാനാർത്ഥിയായാണ് അഖില്‍ മാരാർ തൃക്കാക്കരയില്‍ ജനവിധി തേടുന്നത്. ട്വന്റി 20 ചെയർമാൻ സാബു എം. ജേക്കബിനൊപ്പം വാർത്താസമ്മേളനത്തില്‍ പങ്കെടുത്തുകൊണ്ടാണ് താൻ രാഷ്ട്രീയത്തിലേക്ക് ഇറങ്ങുന്ന വിവരം അദ്ദേഹം നേരത്തെ അറിയിച്ചത്. യുഡിഎഫ് സ്ഥാനാർത്ഥി ഉമ തോമസും എല്‍ഡിഎഫ് സ്ഥാനാർത്ഥി പുഷ്പ ദാസും അണിനിരക്കുന്ന തൃക്കാക്കരയിലെ ശക്തമായ ത്രികോണ മത്സരത്തില്‍ അഖില്‍ മാരാരുടെ സാന്നിധ്യം ശ്രദ്ധേയമായ ചർച്ചകള്‍ക്കാണ് വഴിതുറന്നിരിക്കുന്നത്.