ആദ്യ വാരാന്ത്യത്തില്‍ മികച്ച കളക്ഷൻ നേടിയെങ്കിലും പ്രവൃത്തിദിനങ്ങളില്‍ ചിത്രത്തിന്റെ വരുമാനത്തില്‍ ഇടിവ് സംഭവിച്ചു. റിലീസ് ചെയ്ത ആറാം ദിവസമായ ബുധനാഴ്ച ഇന്ത്യൻ ബോക്സ് ഓഫീസില്‍ നിന്ന് 2.85 കോടി രൂപ മാത്രമാണ് ചിത്രത്തിന് നേടാനായത്. ഇതോടെ ആഭ്യന്തര വിപണിയിലെ ആകെ നെറ്റ് കളക്ഷൻ 44.95 കോടി രൂപയായും മൊത്തം കളക്ഷൻ 53.59 കോടി രൂപയായും ഉയർന്നു. വിദേശ വിപണിയില്‍ നിന്ന് ആറാം ദിവസം 1.5 കോടി രൂപ നേടിയതോടെ ചിത്രത്തിന്റെ ആകെ അന്താരാഷ്ട്ര കളക്ഷൻ 21.3 കോടി രൂപയായി. ഈ കണക്കുകള്‍ പ്രകാരം ലോകമെമ്പാടുമുള്ള തീയേറ്ററുകളില്‍ നിന്നായി 74.89 കോടി രൂപയാണ് ചിത്രം ഇതുവരെ സ്വന്തമാക്കിയത്.

ആദ്യ വെള്ളിയാഴ്ച 9.25 കോടി രൂപയുമായി തുടക്കം കുറിച്ച ചിത്രം ശനിയാഴ്ച 11.50 കോടിയും ഞായറാഴ്ച 13.25 കോടിയും നേടി മികച്ച വളർച്ചാ പ്രവണത കാണിച്ചിരുന്നു. എന്നാല്‍ വാരാന്ത്യത്തിന് ശേഷം തിങ്കളാഴ്ച കളക്ഷൻ 3.85 കോടിയായി കുത്തനെ ഇടിഞ്ഞു. ചൊവ്വാഴ്ച 4.25 കോടിയുമായി ചെറിയ തിരിച്ചുവരവ് നടത്തിയെങ്കിലും ബുധനാഴ്ച വീണ്ടും കളക്ഷൻ കുറഞ്ഞത് ചിത്രത്തിന് തിരിച്ചടിയായി. വരും ദിവസങ്ങളില്‍ ചിത്രം മികച്ച പ്രകടനം പുറത്തെടുത്താല്‍ മാത്രമേ ആഭ്യന്തര വിപണിയില്‍ മുന്നേറാൻ സാധിക്കൂ. ആലിയ ഭട്ടിനും ഷർവാരിക്കുമൊപ്പം ബോബി ഡിയോള്‍, അനില്‍ കപൂർ, ദിയ മിർസ എന്നിവർ പ്രധാന വേഷങ്ങളിലെത്തുന്ന ചിത്രം ശിവ് റാവൈല്‍ ആണ് സംവിധാനം ചെയ്തിരിക്കുന്നത്. ഉദയ് ചോപ്ര തിരക്കഥയെഴുതിയ ചിത്രത്തില്‍ ഹൃതിക് റോഷൻ അതിഥി വേഷത്തിലും എത്തുന്നുണ്ട്.