‘The Autobiography of God’ എന്ന പുസ്തകത്തിലൂടെ തന്റെ ഉള്ളിലെ ചിന്തകള്‍ വായനക്കാരിലെത്തിച്ച താരം, തന്റെ വിവാഹശേഷവും നിലപാടുകളില്‍ മാറ്റമില്ലെന്ന് വ്യക്തമാക്കുകയാണ്. 2025-ല്‍ പ്രശാന്ത് നായരുമായുള്ള വിവാഹത്തിന് ശേഷവും ഈ ജന്മത്തില്‍ തനിക്ക് കുട്ടികള്‍ വേണ്ടെന്ന തന്റെ പഴയ തീരുമാനത്തില്‍ ഉറച്ചുനില്‍ക്കുകയാണെന്ന് ലെന പറയുന്നു. ‘വനിത’യ്ക്ക് നല്‍കിയ അഭിമുഖത്തിലാണ് താരം മനസ്സ് തുറന്നത്.

തന്റെ പത്താം ക്ലാസ് പ്രായത്തില്‍ തന്നെ എടുത്ത തീരുമാനമാണിതെന്ന് ലെന വെളിപ്പെടുത്തി. അമ്മയുടെ ആ കാലഘട്ടത്തിലെ ശാരീരികവും മാനസികവുമായ മാറ്റങ്ങള്‍ കണ്ടപ്പോഴാണ് ഇത്തരമൊരു ചിന്ത തന്നിലുണ്ടായതെന്ന് താരം പറയുന്നു. കുട്ടികളുണ്ടായിരുന്നെങ്കില്‍ തന്റെ ആത്മീയ യാത്രയ്ക്കോ കരിയറിനോ ഇത്രയധികം സമയം കണ്ടെത്താൻ കഴിയില്ലായിരുന്നുവെന്ന് ലെന വിശ്വസിക്കുന്നു. കുട്ടികള്‍ വേണമെന്നുണ്ടെങ്കില്‍ കരിയറില്‍ വിട്ടുവീഴ്ചകള്‍ ചെയ്യേണ്ടി വരുമെന്നും, അത് രണ്ടും കൂടി കൊണ്ടുപോകുന്നതിലെ പ്രായോഗിക ബുദ്ധിമുട്ടുകളും താരം ചൂണ്ടിക്കാട്ടി.

കുട്ടികള്‍ക്ക് വേണ്ടി പൂർണ്ണമായി സമയം മാറ്റിവെക്കാൻ കഴിയാത്തവർ മാതാപിതാക്കളാകുന്നത് ശരിയല്ലെന്ന നിലപാടാണ് താരത്തിന്റേത്. ഇപ്പോള്‍ 45 വയസ്സിലേക്ക് കടക്കുന്ന തനിക്ക്, ഈ തീരുമാനത്തില്‍ യാതൊരു ഖേദവുമില്ലെന്നും തന്റെ കരിയറിലും ആത്മീയ ജീവിതത്തിലും താൻ അതീവ സന്തുഷ്ടയാണെന്നും ലെന കൂട്ടിച്ചേർത്തു.