2026 ഏപ്രില്‍ രണ്ടിന് അവതരിപ്പിക്കപ്പെട്ട ഈ മോഡലിന്റെ ഏറ്റവും വലിയ സവിശേഷത, ഇത് ക്ലൗഡ് സഹായമില്ലാതെ തന്നെ സ്മാർട്ട്‌ഫോണുകളില്‍ നേരിട്ട് പ്രവർത്തിപ്പിക്കാം എന്നതാണ്. ഉപയോക്താക്കളുടെ ഡാറ്റ ക്ലൗഡിലേക്ക് അയക്കാതെ ഫോണിലെ പ്രോസസ്സർ ഉപയോഗിച്ച്‌ തന്നെ പ്രവർത്തിക്കുന്നതിനാല്‍ വിവരങ്ങളുടെ സുരക്ഷയും സ്വകാര്യതയും പൂർണ്ണമായി ഉറപ്പാക്കാൻ സാധിക്കും. മുൻ മോഡലുകളെ അപേക്ഷിച്ച്‌ 60 ശതമാനം കുറവ് ബാറ്ററി മാത്രമേ ഇത് ഉപയോഗിക്കൂ എന്നതും വേഗതയില്‍ നാല് മടങ്ങ് വർദ്ധനവുണ്ടെന്നതും ശ്രദ്ധേയമാണ്.

ഒരു ഓപ്പണ്‍ സോഴ്സ് മോഡലായതിനാല്‍ അപ്പാച്ചെ 2.0 ലൈസൻസിന് കീഴിലാണ് ജെമ്മ 4 ലഭ്യമാകുന്നത്. ഇത് ഡെവലപ്പർമാർക്കും സാധാരണക്കാർക്കും വലിയ കമ്പനികളുടെ നിയന്ത്രണമില്ലാതെ തന്നെ അത്യാധുനിക എഐ സാങ്കേതികവിദ്യ ഉപയോഗിക്കാൻ വഴിയൊരുക്കുന്നു. ടെക്സ്റ്റ് കൂടാതെ ചിത്രങ്ങള്‍, വീഡിയോകള്‍, ഓഡിയോ എന്നിവ മനസ്സിലാക്കാനും വിശകലനം ചെയ്യാനും ഈ മോഡലിന് ശേഷിയുണ്ട്. മലയാളം ഉള്‍പ്പെടെ 140-ലധികം ഭാഷകളില്‍ ജെമ്മ 4-ന് പ്രാവീണ്യമുണ്ടെന്നത് പ്രാദേശിക ഭാഷാ ഉപയോക്താക്കള്‍ക്ക് വലിയ ഗുണകരമാകും. കോടിക്കണക്കിന് വരുന്ന ആൻഡ്രോയിഡ് ഫോണുകളിലും ലാപ്ടോപ്പ് ജിപിയുകളിലും ഈ സേവനം ലഭ്യമാകുമെന്ന് ഗൂഗിള്‍ അറിയിച്ചു.

സ്വന്തം സെർവറുകളിലോ ക്ലൗഡിലോ എവിടെ വേണമെങ്കിലും സുരക്ഷിതമായി എഐ ആപ്ലിക്കേഷനുകള്‍ നിർമ്മിക്കാനും വിന്യസിക്കാനും ജെമ്മ 4 സഹായിക്കുമെന്ന് ഗൂഗിള്‍ വ്യക്തമാക്കി. ഡെവലപ്പർമാർക്ക് ഈ മോഡലിന്മേല്‍ പൂർണ്ണമായ ഡിജിറ്റല്‍ പരമാധികാരവും നിയന്ത്രണവും നല്‍കുന്നതിലൂടെ എഐ സാങ്കേതികവിദ്യയുടെ ജനാധിപത്യവല്‍ക്കരണമാണ് ഗൂഗിള്‍ ലക്ഷ്യമിടുന്നത്. നിലവിലെ പ്രമുഖ എഐ മോഡലുകളില്‍ കാണാത്ത വിധത്തിലുള്ള പ്രവർത്തനസ്വാതന്ത്ര്യവും വേഗതയും ജെമ്മ 4 വാഗ്ദാനം ചെയ്യുന്നുണ്ട്. ആധുനിക സ്മാർട്ട്‌ഫോണുകളെ കൂടുതല്‍ സ്മാർട്ടാക്കുന്ന ഈ നീക്കം എഐ വിപണിയില്‍ വലിയ ചലനങ്ങള്‍ സൃഷ്ടിക്കുമെന്നാണ് വിലയിരുത്തല്‍.