ടോസ് നേടി ബാറ്റിംഗ് തിരഞ്ഞെടുത്ത രാജസ്ഥാൻ, ധ്രുവ് ജുറലിന്റെ വെടിക്കെട്ട് ബാറ്റിംഗിന്റെ (42 പന്തില്‍ 75) കരുത്തില്‍ ആറ് വിക്കറ്റ് നഷ്ടത്തില്‍ 210 റണ്‍സെന്ന കൂറ്റൻ സ്കോറാണ് പടുത്തുയർത്തിയത്. ജുറലിന് പുറമെ ഓപ്പണർ യശസ്വി ജയ്‌സ്വാള്‍ (55), വൈഭവ് സൂര്യവംശി (31) എന്നിവരും രാജസ്ഥാൻ നിരയില്‍ തിളങ്ങി. അവസാന ഓവറുകളില്‍ രവീന്ദ്ര ജഡേജയും ജോഫ്ര ആർച്ചറും പുറത്താകാതെ നിന്ന് സ്കോർ 200 കടത്തുകയായിരുന്നു.

മറുപടി ബാറ്റിംഗിന് ഇറങ്ങിയ ഗുജറാത്തിന് കുമാർ കുശാഗ്രയും (18) സായ് സുദർശനും (73) ചേർന്ന് 78 റണ്‍സിന്റെ മികച്ച തുടക്കമാണ് നല്‍കിയത്. എന്നാല്‍ മധ്യ ഓവറുകളില്‍ നാല് വിക്കറ്റുകള്‍ വീഴ്ത്തിയ രവി ബിഷ്‌ണോയിയുടെ സ്പിൻ കെണിയില്‍ ഗുജറാത്ത് പതറി. ജോസ് ബട്‌ലർ (26), രാഹുല്‍ തെവാട്ടിയ (12) തുടങ്ങിയവർക്ക് കാര്യമായ പ്രകടനം പുറത്തെടുക്കാനായില്ല. ഒരു ഘട്ടത്തില്‍ ഏഴ് വിക്കറ്റിന് 161 എന്ന നിലയില്‍ തകർന്ന ഗുജറാത്തിനെ റാഷിദ് ഖാനും (24) കഗിസോ റബാദയും (23) ചേർന്ന് വിജയത്തിനടുത്തെത്തിച്ചെങ്കിലും അവസാന ഓവറുകളിലെ ജോഫ്ര ആർച്ചറുടെയും തുഷാർ ദേശ്പാണ്ഡെയുടെയും കൃത്യതയാർന്ന ബൗളിംഗ് രാജസ്ഥാന് വിജയം സമ്മാനിച്ചു.

എട്ട് വിക്കറ്റ് നഷ്ടത്തില്‍ 204 റണ്‍സിനാണ് ഗുജറാത്തിന്റെ പോരാട്ടം അവസാനിച്ചത്. സായ് സുദർശൻ ഗുജറാത്തിനായി അർദ്ധ സെഞ്ച്വറി നേടി മികച്ച പോരാട്ടം കാഴ്ചവെച്ചെങ്കിലും ഫിനിഷിംഗിലെ പാളിച്ചകള്‍ തിരിച്ചടിയായി. രാജസ്ഥാന് വേണ്ടി രവി ബിഷ്‌ണോയ് നാല് വിക്കറ്റ് വീഴ്ത്തിയപ്പോള്‍ റിയാൻ പരാഗ് ബ്രേക്ക് ത്രൂ നല്‍കി ശ്രദ്ധേയനായി. ബാറ്റിംഗിലും ബൗളിംഗിലും ഒരുപോലെ മികച്ചുനിന്ന രാജസ്ഥാൻ റോയല്‍സ്, ഐപിഎല്ലിലെ തങ്ങളുടെ കരുത്ത് ഒരിക്കല്‍ കൂടി തെളിയിച്ചിരിക്കുകയാണ്.