ഇന്ത്യൻ പ്രതിരോധ മേഖലയ്ക്ക് വൻ ഉത്തേജനം നല്കിക്കൊണ്ട് തദ്ദേശീയമായി നിർമ്മിച്ച അത്യാധുനിക സ്റ്റെല്ത്ത് ഫ്രിഗേറ്റ് 'മഹേന്ദ്രഗിരി' കമ്മീഷൻ ചെയ്യാൻ ഒരുങ്ങുന്നു.
ജൂലൈ 11-ന് വിശാഖപട്ടണത്ത് വെച്ച് നടക്കുന്ന ചടങ്ങില് കപ്പല് നാവികസേനയുടെ ഭാഗമാകും. സർക്കാരിന്റെ ‘ആത്മനിർഭർ ഭാരത്’ സംരംഭത്തിന് കരുത്തുപകരുന്ന പ്രൊജക്ട് 17എ (Project 17A) പ്രകാരമുള്ള നീലഗിരി ക്ലാസിലെ ആറാമത്തെ കപ്പലാണിത്.
പ്രത്യേകതകളും സവിശേഷതകളും
- അദൃശ്യ ശത്രു (Stealth Capability): കുറഞ്ഞ റഡാർ സിഗ്നേച്ചർ ഉള്ളതിനാല് ശത്രുക്കളുടെ റഡാറുകളില് പെടാതെ ഒളിച്ചിരിക്കാൻ മഹേന്ദ്രഗിരിക്ക് സാധിക്കും. ഉയർന്ന ഓട്ടോമേഷനും മികച്ച അതിജീവനക്ഷമതയുമുള്ള ഇത് ഇന്ത്യയില് നിർമ്മിച്ച ഏറ്റവും സങ്കീർണ്ണമായ ഫ്രണ്ട്ലൈൻ യുദ്ധക്കപ്പലുകളില് ഒന്നാണ്.
- മാരകായുധങ്ങള്: കിഴക്കൻ ഘട്ടത്തിലെ പർവതനിരയുടെ പേരിട്ടിരിക്കുന്ന കപ്പലില് ഉപരിതലത്തില് നിന്ന് ഉപരിതലത്തിലേക്കും, ഉപരിതലത്തില് നിന്ന് വായുവിലേക്കും തൊടുക്കാവുന്ന മിസൈലുകളും നൂതന ഇലക്ട്രോണിക് യുദ്ധ ശേഷികളും സജ്ജമാക്കിയിട്ടുണ്ട്.
ALSO READ;തേക്കല്ലേ തേഞ്ഞുപോവും..! മെർക്കുറിയുടെ അളവ് കൂടുതല്, ചർമം വെളുക്കാനുള്ള മൂന്ന് ക്രീമുകള്ക്ക് നിരോധനം - നിർമ്മാണം: ഇന്ത്യൻ നാവികസേനയുടെ വാർഷിപ്പ് ഡിസൈൻ ബ്യൂറോ (WDB) രൂപകല്പ്പന ചെയ്ത ഈ കപ്പല് മുംബൈയിലെ മസഗോണ് ഡോക്ക് ഷിപ്പ് ബില്ഡേഴ്സ് ലിമിറ്റഡ് (MDL) ആണ് നിർമ്മിച്ചത്.
- വേഗതയും പ്രൊപ്പല്ഷനും: ഇതിലെ ആധുനിക കമ്പൈൻഡ് ഡീസല് അല്ലെങ്കില് ഗ്യാസ് (CODOG) പ്രൊപ്പല്ഷൻ സിസ്റ്റം അതിവേഗ പ്രവർത്തനങ്ങള്ക്കും ദീർഘദൂര വിന്യാസങ്ങള്ക്കും കപ്പലിനെ പ്രാപ്തമാക്കുന്നു.
- ബഹുമുഖ ദൗത്യങ്ങള്: വ്യോമവിരുദ്ധ, ഉപരിതലവിരുദ്ധ, അന്തർവാഹിനിവിരുദ്ധ പോരാട്ടങ്ങള്ക്ക് പുറമെ മാനുഷിക സഹായം, ദുരന്ത നിവാരണം (HADR), തിരച്ചില്, രക്ഷാപ്രവർത്തനം എന്നിവയ്ക്കും ഇത് അനുയോജ്യമാണ്.
ഈ ക്ലാസിലെ ആദ്യ കപ്പലായ ഐഎൻഎസ് നീലഗിരി 2025 ജനുവരി 15-നാണ് ഉള്പ്പെടുത്തിയത്. തുടർന്ന് ഐഎൻഎസ് ഉദയഗിരിയും ഐഎൻഎസ് ഹിമഗിരിയും 2025 ഓഗസ്റ്റ് 26-നും, നാലാമത്തേതായ ഐഎൻഎസ് താരഗിരി ഈ വർഷം ഏപ്രില് 3-നും കമ്മീഷൻ ചെയ്തു. തദ്ദേശീയ യുദ്ധക്കപ്പല് നിർമ്മാണത്തില് ഇന്ത്യയുടെ സ്ഥാനം ഉറപ്പിക്കുന്നതാണ് മഹേന്ദ്രഗിരിയുടെ വരവ്.