ജൂണ്‍ 1 തിങ്കളാഴ്ച ആരംഭിക്കുന്ന പുതിയ വാരത്തില്‍ ഇന്ത്യൻ ഓഹരി വിപണിയില്‍ കടുത്ത ചാഞ്ചാട്ടമുണ്ടാകാൻ സാധ്യതയുണ്ടെന്ന് വിപണി വിദഗ്ധർ വിലയിരുത്തുന്നു.

പശ്ചിമേഷ്യയിലെ ഇറാൻ-യു.അമേരിക്ക തർക്കങ്ങള്‍, ക്രൂഡ് ഓയില്‍ വിലയിലുണ്ടാകുന്ന മാറ്റങ്ങള്‍, വിദേശ നിക്ഷേപകരുടെ (FII) വൻതോതിലുള്ള വിറ്റഴിക്കല്‍ എന്നിവയാണ് വിപണിയുടെ ഗതി നിശ്ചയിക്കുന്ന പ്രധാന ഘടകങ്ങള്‍. കഴിഞ്ഞ ആഴ്ചയില്‍ നിഫ്റ്റി 50 സൂചിക 171.55 പോയിന്റ് (0.72%) ഇടിഞ്ഞ് 23,547.75 ലാണ് വ്യാപാരം അവസാനിപ്പിച്ചത്. വരും ദിവസങ്ങളില്‍ യു.എസ് – ഇറാൻ സമാധാന ചർച്ചകളില്‍ അനുകൂലമായ തീരുമാനമുണ്ടായാല്‍ വിപണിയില്‍ ശക്തമായ തിരിച്ചുവരവ് (റാലി) പ്രതീക്ഷിക്കാം; എന്നാല്‍ ചർച്ചകള്‍ അനിശ്ചിതത്വത്തിലായാല്‍ ഊർജ്ജ വിതരണത്തെക്കുറിച്ചുള്ള ആശങ്കകള്‍ ഓഹരി വിപണിയെ കൂടുതല്‍ സമ്മർദ്ദത്തിലാക്കും.

സാങ്കേതിക വിശകലനങ്ങള്‍ പ്രകാരം നിഫ്റ്റിക്ക് തിങ്കളാഴ്ച 23,250 – 23,300 മേഖലയാണ് ഏറ്റവും പ്രധാനപ്പെട്ട സപ്പോർട്ട് (പിന്തുണ) നിലവാരം. ഈ നിലവാരത്തില്‍ നിന്നും താഴോട്ട് പോയാല്‍ നിഫ്റ്റി 23,000 മാർക്കിലേക്ക് വരെ വീഴാൻ സാധ്യതയുണ്ട്. അതേസമയം, വിപണിക്ക് മുന്നേറാൻ 23,800 – 24,000 മേഖല ശക്തമായ തടസ്സമായി (പ്രതിരോധം) തുടരുകയാണ്. വിപണി ഈ പ്രതിരോധം മറികടക്കാത്തപക്ഷം ഓരോ മുന്നേറ്റത്തിലും ഓഹരികള്‍ വിറ്റൊഴിയുന്ന ‘സെല്‍ ഓണ്‍ റൈസ്’ തന്ത്രമായിരിക്കും സുരക്ഷിതമെന്ന് വിദഗ്ധർ വ്യാപാരികള്‍ക്ക് മുന്നറിയിപ്പ് നല്‍കുന്നു. വിദേശ നിക്ഷേപകർ കഴിഞ്ഞ ആഴ്ച 23,734 കോടിയുടെ വൻ വിറ്റഴിക്കല്‍ നടത്തിയപ്പോള്‍ ആഭ്യന്തര നിക്ഷേപകർ 25,803 കോടിയുടെ ഓഹരികള്‍ വാങ്ങി വിപണിയെ ഒരു പരിധി വരെ താങ്ങിനിർത്തിയിട്ടുണ്ട്.